Şamaxı rayonu, Yenikənd kənd sakini Mustafayev Ağasəf Azad oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi bildirir ki, 44 günlük müharibə iştirakçısı olan nəvəsi Nihad Mustafayev 5 ildir işsizlikdən əziyyət çəkir:

“Mən, Mustafayev Ağasəf Azad oğlu, yazaraq bildirirəm ki, nəvəm 44 günlük müharibədə Şuşa şəhərinin alınmasına qədər vuruşub və 20 gün itkin düşmüşdür. Nəvəm ölkənin Prezidenti İlham Əliyev və Baş nazir Əli Əsədov tərəfindən 4 medalla təltif olunmuşdur. Hazırda nəvəm 5 ildir işsizdir.

Məşğulluq Agentliyinin cavabı bizi qane etmir. Dəfələrlə getməyimizə və müraciət etməyimizə baxmayaraq, iş vermirlər. Onlar necə dolanmalıdır, nə ilə yaşamalıdır?

Nəvəm ali təhsil almayıb. Müharibə iştirakçısı olub. İmkan etdikcə onun müalicələrini etdiririk. Elə veteranlar var ki, özü də, ailəsi də işlə təmin olunub. Məşğulluq idarəsi mənim nəvəm Mustafayev Nihada Rauf oğluna iş vermir.

Səlahiyyətli qurumlardan xahiş edirəm, mənim nəvəmi işlə təmin etsinlər".

Məsələ ilə bağlı Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi ilə əlaqə saxladıq. Qurumdan bildirdilər ki, Şamaxı rayon sakini Nihad Mustafayevin müraciəti tərəfimizdən araşdırılıb. Vətəndaş müharibə iştirakçısıdır və məşğulluq sistemində qeydiyyatdadır. 2021-ci ildə avtotəmizləmə xidmətləri zərfi üzrə özünüməşğulluq proqramına müraciət edib. Araşdırma zamanı aktiv əmək müqaviləsinin olduğu aşkarlanıb və "Məşğulluq" haqqında Qanuna əsasən proqrama cəlbi mümkün olmayıb. Daha sonra 2024-cü ildə yeni müraciəti əsasında Nihad Mustafayev işsiz kimi qeydiyyata alınıb və maldarlıq təsərrüfatı zərfi üzrə növbəlilik sisteminə əlavə edilib. Qeyd edək ki, özünüməşğulluq proqramı növbəli qaydada icra olunur. Növbəlilik sisteminə əsasən Nihad Mustafayev proqramın mərhələlərinə cəlb edilərək uyğun olduğu halda aktivlərlə təmin ediləcək. Vətəndaşın özünə də bu barədə məlumat verilib və prosedur izah edilib.