Xankəndi şəhərində, Ağdərə və Xocalı rayonlarında aparılan genişmiqyaslı tikinti və bərpa işləri çərçivəsində ərazilərdə işğal dövründə inşa edilmiş qanunsuz tikililərin söküntüsü aparılır. Bunu Xankəndi şəhərində, Ağdərə və Xocalı rayonlarında Prezidentin xüsusi nümayəndəsi Elçin Yusubov “Gələcəyin Qarabağı üçün birgə addımlar” konsept mesajı ilə keçirilən Qarabağ Təhsil və Tərəfdaşlıq Forumunda deyib. Onun sözlərinə görə, 30 ildən artıq işğal altında olan Xankəndi şəhəri, Ağdərə və Xocalı rayonlarında ermənilər tərəfindən xeyli sayda özbaşına tikinti işləri aparılıb: "Pərakəndə tikintilər şəhər və rayonların memarlıq üslubuna xeyli zərər gətirib. Azərbaycanın memarlıq üslubuna aid olmayan bu tikililərin əksəriyyəti tikinti qaydalarına və normalarına görə çox keyfiyyətsiz inşa edilib. Bu səbəbdən də həmin tikililər sökülür". E.Yusubov onu da bildirib ki, hazırda Xankəndi şəhərində yerləşən Qarabağ Universitetinin böyük şəhərciyi salınır. "Buna görə universitet ətrafında da böyük ərazidə söküntü işləri həyata keçirilir. Ərazidə tikinti normalarına cavab berən tikililər isə saxlanılır".

Xatırladaq ki, Ermənistan Silahlı Qüvvələrinin işğal etdiyi Qarabağ və ətraf bölgələrdə 30 il müddətində aparılmış qanunsuz tikililərin sökülməsinə ötən il başlanmışdı. Separatçı xunta rejiminin yerləşdiyi Xankəndi şəhərində 1994-cü ildə inşa edilmiş və 2009-cu ildə yenidənqurma işləri aparılmış “parlament binası” Azərbaycan Hökumətinin göstərişinə əsasən söküldü. Sökülən digər bina isə “Arsaxı azad etmiş döyüşçülər” İttifaqının binası oldu. (Ermənistan Respublikasının Könüllülər İttifaqı da (“YERKRAP”). Hazırda Xankəndi şəhərində qanunsuz tikililərin, Azərbaycan – Qarabağ memarlıq üslubuna yad binaların söküntüsü davam etdirilir və hər nə qədər ermənilər xislətlərinə uyğun şəkildə vay-şüvən salmaq istəsələr də, Azərbaycan dövlətinin siyasi iradəsinə təsir edə bilməyəcəklər.

- Erməni separatçılarının şər yuvaları, canilərin məskənləri olmuş binalar, əlbəttə, sökülməlidir. İçərisində xalqımıza, dövlətimizə qarşı faciəli planların qurulduğu binaların sökülməsi təqdirəlayiqdir. Sizə deyim ki, Xankəndidə böyük tikinti işlərinə Ulu Öndər Heydər Əliyevin Azərbaycana rəhbərliyi zamanında başlanılıb. Bildiyiniz kimi, Ulu Öndər Qarabağın inkişafına xüsusi diqqət ayırırdı. Nəinki Xankəndi, Ağdərə, Şuşa... Qarabağın bütün bölgələrində Ulu Öndərin siyasi rəhbərlikdə olduğu illərdə nəhəng tikinti-quruculuq işləri aparılıb. Xankəndi (o zaman Stepanakert) Pedaqoji İnstitutu, yataqxanalar, xəstəxana, xəstəxananın cərrahiyyə korpusu, kitabxanalar, İpək fabriki, yaşayış binaları, bunlar hamısı Heydər Əliyevin zamanında və Azərbaycanın dövlət büdcəsindən ayrılmış vəsait hesabına tikilib. Baxmayaraq ki, nankor qonşularımız Moskvaya yazdıqları danoslarda guya “Dağlıq Qarabağ”ın iqtisadi inkişafdan geri qaldığını iddia edirdilər, bizim tədqiqatçılar, iqtisadçılar statistik rəqəmlərlə sübut etdilər ki, bunlar ağ yalandır. “Dağlıq Qarabağ”a hər il dövlət büdcəsindən nə qədər vəsaitlər ayrılıb, bura Azərbaycanın ən inkişaf etmiş bölgələrindən biri olub. Xankəndinin tikilməsində, müasirləşməsində hər bir azərbaycanlının əməyi var. Ermənilərsə tarixən öz məkrli siyasətlərinin əsiri olublar. Onlar həmişə çalışırdılar ki, tikintisində iştirak etdikləri binalara xaç işarəsi qoysunlar. Sonra da haray salıb desinlər ki, orada erməni izləri var. Onlar torpaqda da saxta tarixi izlərini qoymağa çalışırdılar. Bunlar gələcəyə hesablanmış hədəflər idi ki, qazıntılar zamanı erməni xaçı, erməni yazısı “üzə çıxsın” və saxta tarixi sübutları dünyaya nümayiş etdirsinlər. Lakin ədalət, həqiqət gec də olsa, həmişə aşkara çıxır. Qarabağda, eləcə də Xankəndidə ermənilərə məxsus heç bir tarix, tarixi bina yoxdur. Sovet vaxtı tikilənlər də Azərbaycanın pulu ilə tikilib. Ermənilər heç nəyə iddia edə bilməz. Biz qarabağlılar ermənilərin tikdirdiyi binalarda heç yaşamarıq da. Öz dövlətimizə nə gəlib?! Sağ olsun, dövlətimiz, dövlət başçımız, cənab İlham Əliyev. Doğma Qarabağa qayıdacaq əhalimiz üçün yeni binalar tikməyə Azərbaycan dövlətinin iqtisadi gücü yetərincədir. Yaşayış üçün münasib olan binalar da var, hansılar ki, dediyim kimi sovet illərində Azərbaycanın vəsaiti ilə tikilib.

- Ermənilər bu binaların, eləcə də digər qanunsuz tikililərin sökülməsinə siyasi don geyindirməyə çalışa bilərlər, lakin bu iddiaların heç bir əsası olmayacaq. Xankəndi şəhərinin Baş planı hələ SSRİ zamanında Ulu Öndər Heydər Əliyevin rəhbərliyi ilə təsdiqlənib, şəhərdə Azərbaycan SSR tərəfindən geniş tikinti-quruculuq işləri aparılıb. Ermənistanın Qarabağı işğal etməsindən sonra isə Xankəndidə lazımsız tikinti işləri həyata keçirilib, şəhərin Baş planına uyğun olmayan tikililər inşa olunub. Bunlar qanunsuz tikililərdir, Qarabağ memarlıq üslubuna yad elementləri özündə əks etdirirlər, ona görə də sökülmələrində heç bir məhdudiyyət ola bilməz.