İrəvanda fəaliyyət göstərən “Right Side NGO” və “Pink Armenia” adlı təşkilatlar bu ölkədə “Trans Akademiyası” adlandırılan yeni maarifləndirici proqramı işə salıblar.
Musavat.com xəbər verir ki, layihə “International Trans Fund” və bir sıra Qərb donor qurumları tərəfindən maliyyələşdirilir.
Akademiyanın məqsədi özlərini “gender kimliyi dəyişkən” sayan şəxslərə hüquqi, sosial və psixoloji dəstək vermək, həmçinin onları “liderlər kimi yetişdirmək”dir.
Lakin bu təşəbbüs Ermənistan cəmiyyətində ciddi mübahisələr yaradıb. Çünki əksər ermənilər üçün bu tip Qərb mənşəli layihələr milli-mənəvi dəyərlərə, ənənəvi ailə modelinə və dini təsəvvürlərə zidd hesab olunur. Sosial mediada yayılan görüntülərdə uzun saçlı, plastik əməliyyatlı gənclərin “gender azadlığı” adı altında təbliğat aparması ictimai narazılığa səbəb olub.
Qərb fondlarının maliyyələşdirdiyi bu proqramlar İrəvanda bir neçə ildir ki, fəaliyyət göstərir. “Right Side” təşkilatı 2016-cı ildən trans fərdlərə hüquqi yardım, sənədlərin dəyişdirilməsi, cins tanınması və “gender bərabərliyi” üzrə təlimlər keçirir. “Pink Armenia” isə LGBT ideologiyasının təbliğatını mədəniyyət, təhsil və mediaya inteqrasiya etmək üçün müxtəlif layihələr reallaşdırır.
Bu proseslər, xüsusilə də “Trans Akademiyası” adlanan təşəbbüs, Ermənistanda sosial parçalanmanı daha da dərinləşdirib. Cəmiyyətin böyük hissəsi hesab edir ki, Qərb fondları bu yolla erməni gəncliyinin mənəvi kimliyini dəyişdirməyə, onları milli və dini köklərdən uzaqlaşdırmağa çalışır.
ABŞ prezidenti Donald Trampın yenidən hakimiyyətə qayıdışından sonra bu mövzu beynəlxalq miqyasda da gündəmin mərkəzinə çıxıb. Tramp açıq şəkildə bildirib:
“Amerikada kişi kişidir, qadın qadındır. Cəmi iki cins var – kişi və qadın. Uşaqları cinsi çaşqınlığa sürükləyənlərə qarşı mübarizə aparacağıq”.
Bu bəyanatla Tramp ABŞ-da “gender ideologiyasına” qarşı siyasi kursu sərtləşdirib. Lakin görünən odur ki, Ermənistan bu istiqamətdə tam əks istiqamətdə hərəkət edir - yəni Qərb fondlarının diktəsi ilə “iki cinsli” anlayışı aradan qaldıran yeni sosial model qurmağa çalışır.
Ekspertlərin fikrincə, bu, artıq sadəcə sosial məsələ deyil, geopolitik müstəviyə keçən ideoloji qarşıdurmadır. Azərbaycan dövləti də öz daxili və xarici siyasətində (Tramp administrasiyası kimi) ənənəvi ailə dəyərlərini, mühafizəkar dünyagörüşünü, islami sütunları və bioloji cins anlayışını müdafiə etdiyi halda, Ermənistan "liberal Avropa dəyərləri"ni örnək alaraq Qərb təsiri altında uçuruma doğru yuvarlanır.
Beləliklə, Qərb dəstəkli “Trans Akademiyası” İrəvanda fəaliyyət göstərsə də, onun arxasında dayanan ideoloji məqsəd çox aydındır: regionda ailə institutunu zəiflətmək, milli dəyərləri dəyişmək və Qərb liberal modelini “insan haqları” pərdəsi altında yeritmək.
