“Himayəmdə əlil oğlum var. Səhhəti pisləşdiyi üçün Türkiyəyə müalicəyə göndərdim. Gedib müalicəsini alıb gəldi. Əlbəttə ki, yaxın qohumlarım kömək etdi. Bir millət vəkili var, anamın bibisi nəvəsidir. O mənə əl tutdu. Efirə çıxmamağımın səbəbləri də fərqlidir. Bizim nəsildən olan müğənnilərdən-Əməkdar artistlər Firuzə İbadova və Ruhəngiz Musəvidən savayı heç kim efirə çıxmır. Səkinə İsmayılova, mən, Kəmalə Rəhimli və s. müğənniləri efirlərdə görə bilməzsiz. Çıxıb əsəbləşə bilərəm. Kiməsə cavab qaytara bilərəm. Bizim dövranımız getdi. Həcilərin saxladığı müğənnilərlə efirə çıxıb dilləşməyə səhhətim imkan vermir. İnfarkt keçirə bilərəm. Bu yaxınlarda yüngülvari insult keçirmişəm. Həm də onurğa sütunum implantdır. Gəzmə məhdudiyyətim var. İkiqat oluram. Bu vəziyyətdə efirə çıxmaq olmaz”.
Bunu Moderator.az-a açıqlamasında tanınmış müğənni, əməkdar artist Ədilə Əflaki deyib.
O daha sonra əlavə edib:
“Məni tanıyanlar bilir ki, milli mədəniyyətimiz üçün nələr etmişəm. İndiyə qədər nə işlər görmüşəmsə bəsimdir. Sənətimə, millətimə yetərincə xidmət etmişəm. Ali təhsilliyəm. Mənim həmkarlarım var ki, musiqi kollecini bitirib, amma xalq artisti Səkinə İsmayılova ilə mən ali təhsil almışıq. O vaxt mən, Səkinə xanım, Alim Qasımov birlikdə xarici ölkələrə konsertlərə gedirdik. Bizə dedilər ki, sizin anket məlumatınızda mütləq ali təhsilli olmağınız qeyd olunmalıdır. Ona görə də təhsil aldıq” deyə xanəndə bildirib.
Ədilə Əflaki bildirib ki, babasının mülkü ondan alınıb və çox pis şəraitdə yaşayır:
“Bir-iki dəfə danışdım, nəsə etmədilər. 2020-ci ildə mərhum millət vəkili Qənirə Paşayeva gəlib evdə mənimlə görüşdü. Gedəndən sonra nazirliyə məlumat verdi və mənə müvəqqəti də olsa Prezident mükafatı verməyə nail oldu. 3 il verildi, o da kəsildi. İndi nə evim var, nə də bu məvacibi alıram. Çalışıb-vuruşuram, amma bir nəticəsi yoxdur. Mədəniyyət Nazirliyinə yazmaqdan yorulmuşam. Əlil oğlumun və özümün dərman pullarını məktublara verirəm. Oğlumun bədəni 70 faiz çürüyüb, ayaqları pis gündədir. Qaziyə bərabər oğlandır, əlillik pulu almır, onu da kəsiblər. 300 manat pensiya ilə onu saxlayıram. Mənim yaşıdlarım nəticə oynadır, evsizlikdən 42 yaşında oğlumu evləndirə bilmirəm. Mən də bu yaşımda oğul toyu, nəvə görmək istəyirəm (ağlayır). Əlilin də ailə qurmaq hüququ var. Oğlumun gözyaşlarına dözə bilmirəm” deyə sənətkar bildirib.
