Dövlət əleyhinə cinayətlərdə ittiham edilmiş Ramiz Mehdiyevlə bağlı yeni xəbər var. APA bir məktub yayıb. Agentliyin məlumatına görə, bu məktubu Mehdiyev Rusiyanın "müəyyən strukturlarının rəhbərlərinə" göndərib.

Həmin məktubda Azərbaycanda referendum keçirilməsi, "Dövlət Şurası" yaradılması təklif olunur. Ölkədə bütün dövlət hakimiyyətinin 50 nəfərdən ibarət olması nəzərdə tutulan bu "Şura" ya verilməsi də bu təklifə daxildir. Şura həm dövlət başçısının, həm Konstitusiya Məhkəməsinin, həm Təhlükəsizlik Şurasının bütün səlahiyyətlərini özündə cəmləşdirməli imiş. İcra hakimiyyətini - Nazirlər Kabinetini isə parlament seçkilərinin nəticələri əsasında ən çox səs qazanmış partiyanın lideri olan baş nazir formalaşdıracaqmış və sair.

Əgər bu məktubu, doğrudan da, Ramiz Mehdiyev yazıbsa, bu, istintaqla rəsmən sübut olunsa və məhkəmə hökmü ilə məntiqi sonluğa bağlansa, deməli, ölkədə çevriliş cəhdi olub. O halda bu, dövlətin qanuni seçilmiş hakimiyyət orqanlarını devirmək planı imiş. Həm də xarici dövlətin (konkret halda Rusiyanın) köməyi ilə!

Belə bir niyyət hakimiyyəti xalqdan deyil, xarici ölkədən almaq cəhdidir. Bunlar çox ağır cinayət şübhələridir və təsdiqini tapacağı halda təkcə Ramiz Mehdiyev deyil, onun siyahısında olan ən azı 50 nəfər də məsuliyyətə cəlb oluna bilər.

Bəs həmin o 50 nəfər kimlərdir? Bu suala, əlbəttə, istintaq cavab verə bilər. Mediada belə bir versiya da irəli sürülür ki, əgər Azərbaycanın xüsusi xidmət orqanları çevriliş cəhdi ilə bağlı mötəbər əməliyyat məlumatları əldə edibsə, yəqin ki, "Dövlət Şurası" nda təmsiı olunacaq 50 nəfərin adları da bəllidir. Bu adamların hamısının olmasa da, bir qisminin kimliyini az-çox təxmin etmək olar. Mediada artıq bəzi adlar çəkilib, müəyyən ehtimallar irəli sürülüb. Ramiz Mehdiyevin yaradılmasını nəzərdə tutduğu iddia edilən "Dövlət Şurası"nın tərkibinə dair mümkün siyahıdakı adamların çoxmilyonluq, hətta çoxmilyardlıq varidatları yavaş-yavaş açıqlanır. Bunlar vaxtilə dövlət idarəçiliyində təmsil olunmuş, yaxud hələ də təmsil olunan adamlardır. Ehtimal olunur ki, qanunsuz yolla əldə olunmuş bu onmilyonlar, yüzmilyonlar, milyardlar ölkədə çevriliş planlarının maliyyələşməsinə yönəlməli imiş. Bu məlumatlar istintaqla təsdiqini tapdığı zaman xeyli keçmiş məmur, deputat, iş adamı və sair qanunun ən sərt üzü ilə qarşılaşmalı olacaq. Ancaq mediada yayılan əvvəlki məlumatlarda açıq qoyulmuş "tövbə qapısı" haqda bir işarə də var idi. Məlumatı yayan media resursunun iddiasına görə, bu çevriliş planlarından xəbəri və bu əməllərdə hər hansı formada iştirakı olanlar istintaqla əməkdaşlıq etsələr, onlar cəzadan azad ola və az cəza ala bilərlər.

Yenidən "Dövlət Şurası" məsələsinə qayıtmaq istərdim. Bu, orta çağlardan gəlmə bir ideyadır. Kralların, çarların yanında belə şuralar olub. Həm də məşvərətçi statusunda. Mehdiyevə aid edilən məktubda isə bu "Şura" əsas (ali) hakimiyyət səlahiyyətlərini özündə cəmləşdirən struktur olaraq keçir. Bu məsələ şərh edilərkən, bəzən tarixdə mövcud olmuş Milli Şuralar da məlum "Dövlət Şurası" nın prototipi kimi təqdim olunur. Hətta iqtidar mediasında yazılanlara görə

12 il bundan əvvəl Azərbaycandakı bəzi qruplar da Rusiya prezidenti Vladimi Putinə bir məktub göndəriblər və Ramiz Mehdiyevə aid edilən son məktub da əvvəlkinin analoqu, protptipi kimi şərh edilir.

Daha əvvəl Azərbaycandan kimlərsə Rusiya hakimiyyətinə belə bir məktub göndəribmi? O məktubla bu gün yayılan mətn arasında bir əlaqə varmı, yoxmu, bunu bilmirəm. Tək bildiyim bir şey var: Azərbaycan öz tarixinin çox mürəkkəb və məsul bir anını - tarixi dönüş məqamını yaşayır. Ortada dövlətə xəyanət varsa, Rusiyanın, yaxud başqa bir xarici dövlətin, xarici bir qüvvənin əli ilə dövlət çevrilişi etməyə cəhd varsa, bu əməlin təşkilatçıları və iştirakçıları kimliyindən asılı olmayaraq, öz cəzasına çatmalıdır. Çünki elə günahlar var, onu bağışlamaq özü böyük günahdır.

Bahəddin Həzi, bizimyol.info