Son illərdə bəzi universitetlərin imtahansız tələbə qəbulu sistemini tətbiq etməsi təhsilin keyfiyyətinə və tələbəyə göstərilən diqqətə yeni baxış açısı gətirir.

Bu yanaşma tələbənin inkişaf imkanlarını nəzərə alaraq onun potensialını ortaya çıxarmağa yönəlib.

Eyni zamanda, universitetin strateji məqsədlərinə uyğun olaraq tələbəyə verdiyi dəyəri və etibarlılığını göstərir.

Belə bir sistem tələbələr üçün həqiqətən də ən optimal yol hesab edilə bilərmi?

Mövzu ilə bağlı Gununsesi.info-ya danışan dosent İlham Əhmədov bildirib ki, imtahansız tələbə qəbulu aparan universitetlər özünə hörmət edir və tələbəyə keyfiyyətli təhsil verməyə arxayındır:

“Belə universitetlər inanır ki, hətta ən zəif tələbə də lazımi tədris və metodiki dəstək vasitəsilə inkişaf edə bilər. Tələbənin təhsil nəticələri 1-ci kursdan etibarən izlənilir və onun gələcək taleyi əldə etdiyi bilik və bacarıqlara əsasən müəyyən edilir”.

İlham Əhmədov vurğulayıb ki, bu yanaşma tələbənin vaxtını, ailənin maddi resurslarını və əlavə xərcləri israf etmədən təhsilin keyfiyyətini təmin edir.

“Universitetin imtahansız qəbul sisteminə olan arxayınlığı, əvvəlki illərdəki müsbət təcrübəsi və ənənələrindən qaynaqlanır və bu, onun özünə olan hörmətinin ifadəsidir.

İmtahansız qəbul tələbələrə həm təhsil almaq, həm də öz bacarıqlarını sınamaq imkanı verir, eyni zamanda universitetin strateji baxışını, tələbəyə verdiyi əhəmiyyəti və etibarlılığını nümayiş etdirir”-deyə o əlavə edib.