Yasamal Rayon Məhkəməsində qəsdən sağlamlığa yüngül zərər vurmada təqsirləndirilən Vahid Qənbərovun (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Orxan Məmmədovun sədrliyi ilə keçirilən prosesdə hökm elan olunub.

Məhkəmənin hökmü ilə Vahid Qənbərov cinayət məsuliyyətindən azad edilib və barəsində olan cinayət təqibinə xitam verilib.

İttihama görə, hadisə 24 iyul 2025-ci il tarixdə, saat 06:40 radələrində baş verib.

Belə ki, Vahid Qənbərov kirayə yaşadığı evdə həyat yoldaşı ilə mübahisə edib. Onları sakitləşdirmək məqsədilə yaxınlaşan qaynı, zərərçəkmiş Ömər Bəşirovla (adı, soyadı şərtidir) təqsirləndirilən şəxsin arasında şəxsi münasibətlər zəminində mübahisə yaranıb.

Bu zaman Vahid Qənbərov əsəbiləşərək zərərçəkmişin sifət nahiyəsinə — sağ gözünün alt hissəsinə iki dəfə yumruqla zərbə vurub. Nəticədə o, Ömərin sağlamlığa yüngül zərər yetirib.

Məhkəmənin hazırlıq iclasında zərərçəkmiş şəxs bildirib ki, təqsirləndirilənlə barışıb, dəymiş ziyan tam ödənilib və Vahid Qənbərova qarşı hər hansı şikayət və tələbi yoxdur. Bu səbəbdən məhkəmə tərəfindən cinayət təqibinə xitam verilib.