Gəncə şəhər sakini, hazırda Bakı şəhərində yaşayan İsayev Rəfail Müzəffər oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi qəzetimiz vasitəsilə Baş Prokuror Kamran Əliyevə müraciət edir:

“Cənab Kamran Əliyev!

Mən, İsayev Rəfail Müzəffər oğlu, yazaraq bildirirəm ki, oğlanlarım - İsayev Cavidan Rəfail oğlu və İsayev Cəlal Rıfail oğlu - külli miqdarda dələduzluğun qurbanı olublar. Belə ki, evimə gəlib-gedən, bir tərəfdən qohumum olan Gəncə şəhər sakini Bayramov Cavid Azər oğlu və atası Bayramov Azər Nizami oğlu yüksək vəzifəli şəxslərin adından istifadə edərək, oğlanlarımın 60 min manata yaxın pulunu mənimsəyiblər.

Adlarını qeyd etdiyim şəxslər hüquq-mühafizə orqanlarında yüksək səlahiyyət sahibi olan nüfuzlu məmurlar tərəfindən himayə olunduqlarını bildirirlər.

Qısa olaraq bildirim ki, Polis Akademiyasına daxil olduğu deyilən Bayramov Cavid Azər oğlunun, eləcə də atası Bayramov Azər Nizami oğlunun Bakı şəhərində yaşamağa yerləri olmadığı üçün müvəqqəti olaraq mənim evimdə qalırdılar. Mən öz mədəniyyətimi, qohumcanlılığımı göstərib, bu ata-balaya evimdə, masamda yer açmışdım.

Heç vaxt hüquq-mühafizə orqanlarında işimiz olmadığı üçün, həm də masamda oturub çörəyimi yeyən qohumlarımın belə bir biabırçı addım atacaqlarını heç ağlıma da gətirməzdim. Halbuki, onlar hər iki oğlumu aldadaraq, banklara salaraq, 60 min manata yaxın pullarını mənimsəyiblər.

Qarşı tərəfdən pulumuzu tələb etdikdə Azər Bayramov deyir ki, “hüquq-mühafizə orqanlarında işləyən vəzifəli şəxs mənə 150 min manat ödəniş edəcək, onun da 50 minini gətirib sizə verəcəm”.

Dələduzluğu törədən şəxslər polis bölmələrində olan zaman oğlanlarıma 50 min manat verməli olduqlarını etiraf ediblər. Onlar 10 min manat pulu kəssələr də, onu da tamamilə danmamışlar.

Cənab Baş Prokuror!

Nə qədər qəribə səslənsə də, son vaxtlar yaşadığımız hadisələr dələduz ata və oğulun hüquq-mühafizə orqanlarında yüksək yetki sahibi olan məmurlar tərəfindən himayə olunduqları haqda şübhələr yaradır. Söhbət ondan gedir ki, bu şəxslərin dələduzluqları ilə bağlı çoxsaylı faktları (telefon danışıqlarını, mesajları, “WhatsApp” yazışmalarını və s.) aidiyyəti qurumlara təqdim etsək də, 3 aya yaxındır nəinki cinayət işi açılır, hətta dələduz ata-bala aşkar şəkildə kimlərsə tərəfindən müdafiə edilir.

Görünür, məhz bu səbəbdən də qarşı tərəf çox rahatdır. Açıq şəkildə bildirirlər ki, “bizi heç kəs tuta bilməz, lazımi adamların hamısını görmüşük”.

Odur ki, bu ata-balaya cinayət işinin açılmaması, o cümlədən qanunlarımızın sıradan bir vətəndaş tərəfindən açıq şəkildə tapdalanması bizi ciddi narahat edir.

Cənab Kamran Əliyev!

Biz Sizə güvənirik və inanırıq ki, Baş prokuror olaraq, bu məsələnin həlli istiqamətində ailəmizə kömək göstərəcəksiniz.

Sizə əvvəlcədən öz minnətdarlığımı çatdırıram”.