Son günlər sosial şəbəkələr və yerli media orqanlarının əsas müzakirə mövzularından biri də ictimai nəqliyyatda gedişhaqqının bahalaşacağı barədədir. Hətta konkret rəqəmlər səsləndirənlər də var: paytaxtda avtobus və metroda indiyədək 50 qəpik olan gedişhaqqının 1 manata qədər artacağı iddia olunur.

"DİA-AZ" xəbər verir ki, tədris ilinin başlanmasına günlər qalmış belə müzakirələr əhali arasında narahatlığa səbəb olub. Çünki təcrübə göstərir ki, adətən bu cür müzakirələr ictimai rəydə “nəbz yoxlamağa” xidmət edir. İnsanlar da ondan ehtiyatlanır ki, bu müzakirələrin ardınca bahalaşma qərarı gələcək.

Qiymət artımı ilə bağlı mediada gedən müzakirələrə Rəqəmsal İnkişaf və Nəqliyyat Nazirliyinin tabeliyində Azərbaycan Yerüstü Nəqliyyat Agentliyi (AYNA) belə münasibət bildirib: “İctimai nəqliyyatda gedişhaqqı hazırda 50 qəpikdir və tariflərin artırılması ilə bağlı hər hansı qərar qəbul edilməyib”.

Hazırda gedişhaqqının 50 qəpik olduğunu hamı bilir, burada yenilik yoxdur. İnsanları maraqlandıran isə yaxın gələcəkdə qiymət artımının olub-olmayacağıdır. AYNA isə bu barədə heç nə demir. Yəni ictimai nəqliyyatda gedişhaqqının bahalaşmayacağını konkretləşdirmir. Bu da şübhələri daha da artırır.

Bakı sakinləri hələ bahalaşma olmadan, indiki qiymətlərlə gedişhaqqının onlar üçün yüksək olduğunu deyirlər.

“Kartıma 10 manat yükləyirəm, heç 3 gün getmir. Çünki “Günəşli”dən işə gedib çıxana qədər 2 avtobusa minirəm, bir dəfə də metroya, qayıdanda da həmçinin. Bəzən deyirlər ki, bizdə gedişhaqqı ucuzdur. Gözünün içinə qədər yalan danışır. Bu ölkədə 340 manat pensiya alan adam var, onun üçün 50 qəpik gedişhaqqı ucuzdur? Avropa ölkələri ilə müqayisə edirlər. Avropa ölkələrində nəqliyyatda pensiyaçılara, tələbələrə güzəşt var. Bizdə hardadır o güzəşt?”, - deyə Tərlan Məmmədov bildirib.

Kəmalə Əliyeva da ictimai nəqliyyatda qiymətlərin bahalaşacağından narahatdır. Onun sözlərinə görə, uşaqlarından biri tələbədir, digəri məktəbli: “Məktəbli həm də hazırlığa gedir. Hamısı da avtobusdan, metrodan istifadə edir. Yolpulu çox xərc aparır. Elə neçə vaxtdır qiymət artımını oxuyuram, çox narahatam ki, bunun axırı necə olacaq. Evin xərclərinin bir hissəsi də yolpuludur. Çox nahaq fikirləşirlər ki, ucuzdur. Qətiyyən elə deyil. Toxun acdan nə xəbəri...”