"Yas mərasimlərində dəbdəbəli ehsan süfrələrinin yığışdırılması məsələsi uzun müddətdir ki, müzakirə olunur və mən də fikrimi bildirmişəm. Bunun iki yolu var: birincisi inzibati yoldur, ikincisi isə insanların özlərinin bu prosesi aparması və könüllü şəkildə imtina etməsi. Dövlətr bunu məcburi şəkildə edərsə, insanlar narazı qalacaqlar. Belə yanaşmalar da olacaq ki, dövlət bizim işimizə niyə müdaxilə edir. Ən yaxşı hal insanların özünün təkamül yolu ilə bu prosesə getməsidir ki, hazırda o baş verir".

Bu sözləri Sitat.info-ya açıqlamasında deputat Ceyhun Məmmədov bildirib.

O qeyd edib ki, bir çox bölgələrdə müvafiq addımlar atılıb: " Bütün bölgələrimizdə eyni vaxtda bunun baş verməsi çətin olar. Çünki bu həm də böyük bir biznes sahəsidir, burada ciddi maraqlar var. Bu maraq sahibləri təbii ki, prosesə mane olmağa çalışacaqlar. Onlar müxtəlif yollarla prosesin qarşısını almağa can atacaq, müəyyən irəliləyişlərə mane olmağa çalışacaqlar. Artıq bunun müəyyən qədər şahidi oluruq. Məlumatlar da var ki, guya artıq insanlar yemək verilməyən yaslara gəlmir, mütləq yemək verilməlidir".

Deputat hesab edir ki, zamanla proses gedəcək, dövr insanları buna məcbur edəcək: "Mən artıq 20 ildir bu istiqamətdə maarifləndirmə aparıram, çıxışlar edirəm, fikirlərimi bildirirəm. Zamanla məsələlər həllini tapacaq. İnsanlarımız geri çəkilməməlidir, davam etməlidir.

Bəzi ölkələrdə belə bir qanuncilik aktları, normalar var. Ancaq hesab edirəm ki, biz məsələnin hüquqi yolla həllinə hazır deyilik. Doğru yol təkamül yolu ilə prosesin davam etməsidir. İnsanlar israrlı şəkildə öz fikirlərində qalmalı, sadə ehsan süfrələrinin açılmasına çalışmalıdırlar. Bu yolla tədricən məsələ tədricən həllini tapacaq. "İnsanlar yasa yemək üçün gəlir, yemək verilməsə gəlməyəcək" - kimi fikirlər də düzgün deyil. Bu məsələdə ayrı-ayrı insanların marağı yox, cəmiyyətin marağı nəzərə alınmalıdır".