Xəbər verdiyimiz kimi, dünən axşam Moskva gözlənilmədən “naməlum dronların” hücumuna məruz qalıb. Rusiya rəsmiləri bütün hədəflərin vurulduğunu iddia etsələr də, şəhərin müxtəlif hissələrində partlayış səsləri və tüstü sütunları hələ də müşahidə olunur.

Bizim.Media xəbər verir ki, bu barədə RBC-Ukrayna məlumat yayıb və Məlumatın Dezinformasiyaya Qarşı Mübarizə Mərkəzinin rəhbəri Andrey Kovalenkoya, həmçinin Rusiya KİV-lərinə istinad edib.

Kovalenko yalnız qısa açıqlama ilə kifayətlənib:

“Moskva dron hücumuna məruz qalıb”, – deyib, lakin təfərrüatları açıqlamayıb.

Rusiya mediası isə paytaxtda partlayış səslərinin eşidildiyi və bir sıra rayonlarda tüstü sütunlarının qalxdığı çoxsaylı foto və videolar yayıb. RBC-Ukraynanın qeyd etdiyinə görə, Rusiya telekanalları “Ukrayna dronunun çoxmərtəbəli binanı vurduğunu” bildirirlər.

Moskva meri açıqlayıb ki, səhərdən etibarən hava hücumundan müdafiə qüvvələri 6 PUA-nı vurub. Onun sözlərinə görə, dron qalıqlarının düşdüyü ərazilərdə xilasedici və fövqəladə xidmət əməkdaşları işləyir.

Sosial şəbəkələrdə artıq Kremlin qarşısında yerləşdirilmiş Rusiya mobil zenit qrupunun – yəni pulemyotla təchiz olunmuş pikap üzərində dayanan əsgərlərin fotoları yayılıb. Hazırda Rusiya Silahlı Qüvvələrinin mobil zenit qrupları Kreml divarları yaxınlığında növbə çəkirlər. Buna səbəb, Rusiya paytaxtının Ukrayna pilotsuz uçuş aparatlarının hücumuna məruz qalmasıdır.