Son zamanlar Dövlət Təhlükəsizliyi Xidmətinin (DTX) keçirdiyi əməliyyatlar nəticəsində bir çox məmur cinayət başında yaxalanıb və cinayət məsuliyyətinə cəlb edilib. Və prosesin davam edəcəyi də istisna deyil. AYNA-nın mövzu ətrafında suallarını Milli Məclisin Hüquq siyasəti və dövlət quruculuğu komitəsinin üzvü, Vəhdət Partiyasının (VP) sədri Tahir Kərimli cavablandırıb.
- Tahir bəy, həbs olunan məmurlar, barələrində çıxarılan qərarlardan apellyasiya şikayəti verərək, günahsız olduqlarını iddia edirlər. Məsələnin hüquqi tərəfi aydındır, amma siyasi və mənəvi tərəfləri maraqlıdır...
- Əlbəttə ki, bütün vətəndaşların apellyasiya, kassasiya şikayətləri vermək hüquqları var və buna heç kim bir söz deyə bilməz. Lakin bunun siyasi və mənəvi tərəfi var. Bunun ən əsas tərəfi də ondan ibarətdir ki, həmin insanlar düşmürlər ki, nə üçün onlarla eyni işi görən digər adamlar azadlıqda qalır, amma onlar azadlıqdan məhrum olurlar. Ona görə də mən həmişə demişəm ki, cənab Prezidentin başlatdığı islahatları mahiyyəti üzrə, kompleks şəkildə həyata keçirmək lazımdır ki, ədalət tərəzisi pozulmasın. Hər halda kimlərsə görk üçün açıq cinayətlər törədiblər, cinayətləri sübut olunub və haqlarında məhkəmə hökmləri çıxarılıb. Adətən, onların bu məqamda şikayətləri həbs qətimkan tədbirinin dəyişdirilməsi ilə bağlı olur. Amma bu, cəmiyyətdə heç də xoş qarşılanmır. Çünki bir müddət əvvəl Dövlət Təhlükəsizliyi Xidmətinin öz əməkdaşı Akif Çovdarov azadlığa çıxdı, yeyib-içmək məclisi nümayiş etdirdi və bu, cəmiyyətdə böyük aqressiya ilə qarşılandı. Ona görə də ən başlıcası, daha böyük cinayət törədən daha böyük insanlar məsuliyyətə cəlb olunmalı və əllərindən varidatları alınıb dövlətə təhvil verilməlidir. Adətən, orta səviyyəli məmurlar həbs edilirlər, digərləri azadlıqda qalır deyə, ola bilər ki, bu, onları həvəsləndirir. Yəni, həm cinayət məsuliyyətindən yaxa qurtarmaq istəyirlər, həm də ictimai mənada “niyə görə yalnız mən həbs olunmalıyam” düşüncəsi ilə hərəkət edirlər.
Amma başa düşmək lazımdır ki, ölkə başçısının da dediyi kimi, “qanunun əli hamının qapısını döyəcək” və döyməlidir də. Heç kim məsuliyyətdən azad ola bilməz. Məsələn, elə təəssürat yaranmışdı ki, bu cür adamlar rahatlıqla xalqı yağmalayır, divan tuturlar. Amma görürük ki, bunlar da məsuliyyətə cəlb edilirlər və cəmiyyət də bunu alqışlayır. Amma biz də bu işlərdə ölkə başçısının köməkçisi olmalıyıq. Vəzifədən çıxarılanlar, cinayət əməli törədənlər, onların adamları özlərinin çirkin yolla topladıqları pulları dövlət əleyhinə yönəldir, başqalarına sərmayə verirlər. Ona görə də cənab Prezidentin başlatdığı islahatların tərəfində durmağa, o cümlədən bu cür kadr təmizliyi ilə müşahidə olunan və digər kadrların məsuliyyətə cəlb olunması məsləsinə yardımçı olmaq vacibdir.
- Bəs, bu cür şəxslərə necə cəza verilməlidir ki, digərlərinə də ibrət olsun?
- Düzdür, onlar cinayət məsuliyyətinə cəlb olunanda, yaxud inzibati və ya intizam məsuliyyətinə cəlb olunanda, bu, digər vəzifəli şəxslərə də təsir edir. Ancaq müəyyən müddət keçəndən sonra soyuma baş verir, yenə öz əməllərini təkar edirlər və düşünürlər ki, belə bir aqibət onların başına gəlməz. Biz gördük ki, bir neçə icra başçısı məsuliyyətə cəlb olunmuşdu, amma başqaları yenə də həmin rolu oynamağa davam edirdilər. Ona görə də bu, daha yüksək vəzifəli şəxslərə də aid olmalıdır. Məsələn, Türkiyənin Azərbaycana dəstək verməsi, nəinki hərbi sahədə, bütün sahələrdə Rusiya və kadrlarının Azərbaycandan təmizlənməsinə kömək edir. Amma bunların çox güclü müqavimət potensialları, əks tədbirlər görmək imkanları var. Ona görə də dövlət və xalqın birliyi çox zəruridir. Təkcə deputatlar yox, cəmiyyətin hər bir fərdi bu məsələdə aktiv rol oynamalı, dövlətlə birlik nümayiş etdirməlidir. Ki, daha ağır cinayət törədənlər, daha çox dövlət və xalqın malını mənimsəyənlər cinayət məsuliyyətinə cəlb edilsinlər.
- Daha ağır cinayət törətmiş şəxslərin güclü müqavimət potenisalları və əks tədbirlər görmək imkanlarının olduğunu vurğuladınız. Bu amil daxili qarşıdurmalarla nəticələnə bilərmi?
- Hazırkı hakimiyyətin ənənəvi resursları var. Yəni cənab İlham Əliyevin tarixi təcrübəsi var, ətrafını möhkəmləndirib və xeyli dərəcədə hakimiyyət bacarıqları ənənələrinə malikdir. Ancaq bununla belə, biz post-sovet məkanında yaşayırıq deyə, Sovet dövründən qalan ənənələr digərlərini stimullaşdırıb və onlar çoxlu inzibati və maliyyə resursları əldə ediblər. Ona görə də onları hər bir vəchlə diqqətdə saxlamaq lazımdır. Çünki bir dəqiqənin içində müxalifətlə gizli əlbir olub dərhal açıq müstəviyə keçirlər. Necə ki, Əli İnsanovda biz bunun şahidi olduq. Müxalifətə dərin nifrət edən adam dərhal müxalifətlə hakimiyyətə qarşı birləşdi. O cümlədən bu, digərlərinə də aiddir. Ona görə də həmişə ayıq-sayıq olmaz lazımdır. Ən başlıcası isə xalqla iqtidarın birliyi olmalıdır ki, bunlara qarşı mübarizə aparsınlar. “5-ci kolon” deyirlər, onlar müxalifət təmsilçiləri deyil, zaman-zaman başqa dövlətlərin nümayəndələrini Azərbaycanda kadr kimi işləməyə məcbur edənlərdir. Onları himayə ediblər, kənarlaşmağa qoymayıblar. Hətta, bəzən təyinatlara da nail olublar və digər dövlətlərin marağını ifadə ediblər. Özlərinə də böyük sərvətlər toplayıblar. Bax, bunların hamısına qarşı biz birlikdə olmasaq, onda vəziyyət pis olar. Mən müxalifətə də müraciət etmək istəyirəm. Ki, onlar da ayıq-sayıq olsunlar. İmkan verməsinlər ki, daha çirkin qüvvələr onlardan istifadə etsinlər. Yəni, onlar hakimiyyətə olan nifrətlərini daha böyük nifrətə layiq olan adamlarla birləşdirməsinlər. Ölkəmizi istəməyənlərə, müstəqilliyimizi qəsb edənlərə, zaman-zaman xalqın varidatını mənimsəyib xaricə daşıyanlara qarşı birgə mübarizə aparmaq lazımdır. Burada isə hakimiyyət-müxalifət -xalq birliyi lazımdır.
- Yəni, iqtidar-müxalifət birliyi bu cür hadisələrin qarşısını almağa yardım edə bilər?
- Əlbəttə! Mən dəfələrlə Milli Məclisdəki çıxışlarımda da, müsahibələrimdə də bunu demişəm. Bu gün ən əsas məsuliyyət hakimiyyətin üzərinə düşür. Hakimiyyət yeri gəlsə, müxalifətin nazı ilə oynamalıdır. Hər dəfə müxalifətə də müraciət edirəm ki, daşı ətəyinizdən tökün! Çünki indiki vəziyyətdə sizin hakimiyyətə gəlmək imkanınız yoxdur və siz ancaq daha çirkin qüvvələr üçün alət ola bilərsiniz. Hakimiyyətə də dəfələrlə müraciət etmişəm ki, müxalifətdə yüzlərlə, minlərlə təmiz, bacarıqlı və peşəkar şəxslər var. Onları da cəlb edin dövlət idarəçiliyinə. Bütün xalqımız hakimiyyət-müxalifət bölgüsündə, idarəçiliyində iştirak eləsin. Qarabağımızı da birlikdə azad edək.
