İran prezidenti Məsud Pezeşkianın ölkənin xarici işlər naziri Abbas Əraqçıdan şikayət etməsi və ABŞ-la aparılan gizli danışıqlar barədə ona məlumat verilmədiyi üçün naziri vəzifəsindən uzaqlaşdıracağı ilə bağlı məxfi məlumatlar mediaya sızdırılıb.

Mövzu ilə bağlı politoloq Elçin Xalidbəyli Yenicag.az-a açıqlama verərək, bu iddiaların təsdiqlənəcəyi təqdirdə İranda hakimiyyət uğrunda ciddi xaosun yarandığını bildirib:

“Əgər iddialar doğrudursa, bu, İranın siyasi elitasında artıq dərin parçalanmaların və ziddiyyətlərin mövcudluğundan xəbər verir. Faktiki olaraq hazırda İrana SEPAH rəhbərlik edir, Pezeşkianın prezident kimi fəaliyyəti isə kəskin şəkildə məhdudlaşdırılıb. Əslində, ən başından məlum idi ki, Pezeşkianın geniş səlahiyyətlərlə fəaliyyət göstərməsinə maneələr yaradılacaq. Çünki Pezeşkian SEPAH-a yaxın siyasətçilər kateqoriyasına aid deyil; o, daha çox islahatçı qanadın təmsilçisidir.

İran siyasi elitasındakı nöqsanları və səhvləri açıq şəkildə ifadə edən Pezeşkian, özünü xalqın maraqlarının daşıyıcısı kimi təqdim edir. Məhz bu səbəbdən o, SEPAH və ona bağlı siyasi dairələr tərəfindən qəbul olunmur. Böyük ehtimalla, SEPAH Pezeşkianın hər hansı sülh prosesində iştirakında maraqlı deyil. Bu səbəbdən danışıqlar prosesinin detalları barədə prezidentə geniş məlumat verməyə ehtiyac duymurlar.

Xarici işlər naziri Əraqçının prezidentə məhdud məlumatlar ötürməsi onu göstərir ki, Pezeşkian qeyri-rəsmi şəkildə bütün kritik proseslərdən kənarlaşdırılıb. Burada təəccüblü məqam yoxdur; Əraqçı vəzifəyə təyin olunarkən hər kəs onun SEPAH-ın kadrı olduğunu bilirdi. İndi SEPAH öz təyin etdiyi nazir vasitəsilə idarəçiliyi tamamilə ələ almağa çalışır.

Pezeşkianın bu vəziyyətə hüquqi baxımdan necə reaksiya verəcəyi, ümumiyyətlə, ona belə bir imkanın tanınıb-tanınmayacağı böyük şübhə doğurur. Müxtəlif təzyiqlərlə onun Əraqçını istefaya göndərməsinin qarşısını ala bilərlər. Qısacası, İranda hazırda hakim dairələr arasında amansız mübarizə gedir. Ziddiyyətlər getdikcə dərinləşir və bu proses ciddi hakimiyyət böhranına qədər inkişaf edə bilər. Belə bir şəraitdə İran xalqının hansı tərəfi dəstəkləməsindən çox şey asılıdır. Həmin dəstək hakimiyyətin gələcək taleyini və gücün hansı tərəfin əlində cəmləşəcəyini müəyyən edəcək. Yaxın vaxtlarda bir çox gizli məqamlar gün üzünə çıxacaq”.