Sabiq səhiyyə naziri Əli İnsanov və AMEA prezidenti, Prezident Administrasiyasının (PA) keçmiş rəhbəri Ramiz Mehdiyevin iqtidara qarşı birləşdikləri yönündə iddialar səslənir.
Sabiq nazir Amerikanin sesi-nə verdiyi son müsahibəsində bu iddialardan danışıb.
O deyib: “Danışırlar ki, Ramiz Mehdiyevlə birləşmişəm. Bu, qeyri-mümkündür. Mən ona bir insan, keçmiş əməkdaş, yoldaş kimi hörmət edə bilərəm. Ancaq onunla bir yerdə ola bilmərəm. Bunun sadə izahatı var. Biz siyasətin müxtəlif qütblərindəyik. Onun konkret istiqamətini bilirsiniz, bu adam haranın tərəfdarıdır, kimlə dostluq, kimlə yaxınlıq edir. Əli İnsanov isə partiya nizamnaməsinə konkret yazıb: Avroatlantik məkana inteqrasiya. Görün, bu heç uyğun gələn şeydir?”
İnsanov Mehdiyevin hansı qütbdə olması barədə fikirlərini növbəti sualda daha aydın şəkildə izah edib: “Ramiz Mehdiyev hər zaman böyük qonşumuz Rusiyanın tərəfdarıdır və onların yaxın münasibətləri olub. Ona böyük hörmət, dəstək olub və sairə”...
Bütün bu deyilənlərə rəğmən, ümumiyyətlə, bu iki şəxs birləşərsə, hökumət üçün problem yarada bilərdilərmi?
BAXCP sədrinin müavini, politoloq Elçin Mirzəbəyli hər iki şəxs barədə kifayət qədər sərt danışdı: “Əli İnsanov məlum müsahibəsində Ramiz Mehdiyevi müdafiə edib, amma birlikdə ola bilməyəcəklərini açıqlayıb. Həm də bunu Mehdiyevin rusiyapərəst, özünün isə qərbpərəst olması ilə əlaqələndirib. Əslində məsələnin mahiyyətini də elə burada axtarmaq lazımdır. Bu, sadəcə, siyasi simasızlığın, ikiüzlülüyün apageyasıdır. Bu adamda siyasi əxlaq, dövlət mənafeyi, milli qürur və təəssübkeşlik hissi yoxdur. Əgər olsaydı, deyərdi ki, mən Azərbaycan dövlətinin suverenliyini, müstəqil siyasət yürütməsini hər şeydən üstün tuturam. Amma nə edir? Guya qərbpərəst olduğunu xüsusi şəkildə vurğulamaqla xarici dairələrə mesaj verir. Əslində Əli İnsanov da, Ramiz Mehdiyev də maraq ovçularıdır, siyasi yırtıcılardır. Belələrinin ideoloji prinsipləri olmur. Onlar yalnız maraqlarının təmin olunacağı istiqamətə yönəlirlər. Maraqlıdır, Avroatlantik məkana inteqrasiya tərəfdarı olduğunu iddia edən Əli İnsanovun, görəsən, Avropanın hüquqi dəyərlərindən bir anlayışı var? Səhiyyə naziri olanda vətəndaşlara qəssab psixologiyası ilə yanaşan, hər kəsi tapdalamağa, alternativ fikir söyləyənləri kəsib doğramağa hazır olan, jurnalistləri təhqir edən bu adam hansı üzlə Avroatlantik məkandan danışır? Çox güman ki, İnsanov bu sözləri deyəndə Çörçillin, Adenauerin, Şumanın, Spaakın, Qasperinin, Bevinin məzarları ”çatlayıb". İnsan siyasi baxışlarına korrektələr edə bilər, amma xarakterini dəyişə bilməz. Digər tərəfdən, həm Əli İnsanov, həm də Ramiz Mehdiyev Azərbaycanın dünənidir. Bu adamlar ölkənin siyasi münasibətlər sisteminə yeni heç nə verə bilməzlər. Bu adamlar tükəniblər və düşünçələrini də toz basıb. Azərbaycan siyasətçisi Azərbaycanpərəst olmalıdır. Bunun başqa alternativi yoxdur. Əgər hansısa siyasətçi qərbdən, şərqdən, şimaldan, cənubdan mədəd gözləyirsə, deməli, Azərbaycanın suverenliyini, milli maraqlarını başqalarının ayaqları altına atmağa hazırdır".
Siyasi şərhçi Yeganə Hacıyevanın fikirləri də maraqlı oldu: “Daha öncələr də Əli İnsanovun siyasi kimliyi haqqında danışmış, zamanında cəmiyyətdə və müxalifətdə rüşvətxor, qəddar məmur kimi, hakimiyyətdə isə ambisiyasına görə nüfuzunu itimiş bir sima olaraq xarakterizə etmişik. Öncə dövlət çevrilişinə cəhd iddiaları ilə saxlanılmış, ardınca isə rüşvət, dövlət mülkiyyətini mənimsəməsinə görə həbs olunmuş Əli İnsanov heç bir halda birləşdirici müxalif siyasi fiqur və ya lider olmasının mümkünsüzlüyü haqqında fikirlərimi, həmçinin Əli İnsanovun Azərbaycan hakimiyyəti ilə uzlaşması, razılaşmasının mümkünsüzlüyü haqqında qənaətimi bölüşmüşəm. Bu rabitənin olması üçün uyğun şərtlərin, hər iki tərəfin maraqları və ona gələn təhlükənin uyğun olmaması haqqında danışmışıq. Əli İnsanovun hakimiyyətlə uzlaşması üçün heç bir daxili potensial, təhlükə və ya xarici şərt mövcud deyil. Əli İnsanovun müəyyən bir qrupun hələ də ağsaqqal hesab etdiyi, ona ciddi faydalar verdiyi bir şəxs olması, həbsi zamanı göstərdiyi duruş və dirəniş ona qarşı bu çevrənin hörmətini daha da artırmasını qeyd etmişəm. O, Ramiz Mehdiyevlə və ya daha öncə işdən azad edilmiş digər nüfuzlu məmurlarla birləşməsi haqqında da danışmışıq və mən sabiq məmurlar haqqında səsləndirdiyi fikirlərindən qaynaqlanan mümkün konfiqurasiyalar haqqında təsəvvürlər yaratmağa çalışması, lakin belə bir konfiqurasiyanın mövcudluğuna işarə edə biləcək heç bir hərəkətliliyin mövcud olmaması haqqında fikirlərimi söyləmişəm. Bugünlərdə Əli İnsanov belə bir rabitənin olmamasını özü təsdiqləyib. Burada bir haşiyə çıxmaq istəyirəm. Bu iki şəxs haqqında danışsaq, bir neçə məqamı aydınlaşdırmaq lazımdır. Mövcud siyasi hakimiyyət ikimərhələli inkişaf yolunu keçib. Birinci mərhələ 2003-cü ilə qədər, ikinci mərhələ isə 2003-dən sonraya təsadüf edir. Birinci mərhələ siyasi və təhlükəsizlik anlamından təlatümlərlə, ikinci mərhələ isə stabil inkişaf mərhələsidir. Hər iki mərhələdə Əli İnsanov sistemin iştirakçısı və imtiyazlarının istifadəçisi, Ramiz Mehdiyev isə hər iki mərhələdə sistemin quruculuğunda iştirak etmiş, bu sistemin hər boltuna bələd bir şəxsdir. Nəinki Əli İnsanov, Azərbaycanda siyasi iddiası olan istənilən mövcud müxalif qrup Ramiz Mehdiyevin subliminal koordinasiyasını arzu edərdi. Burada ikinci bir haşiyəni açmaq istəyərdim ki, Əli İnsanovun siyasi iddiasının əsasında şəxsi qisas hissi durur. Onun son müsahibəsindəki fikirləri də məhz bu subliminal koordinasiyanı formalaşdırmaq cəhdidir. Uzun illər Azərbaycanda hakimiyyət daxilində müxtəlif qruplar olmasına rəğmən həmişə monolit komanda görüntüsü verilsin kimi bir daxili sifariş var idi. İndi belə bir daxili sifariş yoxdur, yenilənən komandada belə bir görüntü vermək kimi təşəbbüsü müşahidə etmirəm. Müşahidə etdiyim yeni qrupların müəyyən proseslərə hesablanmış, ”cəmiyyətdə daha çox biz dəstəklənirik" görüntüsü vermək təşəbbüsünün olmasıdır. Təcrübəsiz bir qrup isə bu görüntünün verilməsi üçün bir sıra yanlış addımlar atır, istər Əli İnsanov, istərsə də digər müxalif qruplar bu səhvlərin üzərindən güclənir, belə “münbit” məqamlardan maksimum istifadə edə bilmək təşəbbüsü göstərirlər. Konkret olaraq “bu iki şəxsin birləşəcəyi halda hökumət narahat olmalıdırmı” sualına gəlsək, qeyd edim ki, bu birliyi şərtləndirəcək məqamlar hələ ki mövcud deyil".
“Yeni Müsavat”
