Son günlər Ermənistanda yerləşən 102-ci Rusiya hərbi bazasının gələcək taleyi gündəmdədir.

1995-ci ildə yaradılan və hazırda təxminən 5 min hərbçidən ibarət olan baza Rusiya Silahlı Qüvvələrinin Cənub Hərbi Dairəsinə tabedir. İrəvan və Gümrüdə yerləşən hərbi kontingentin 2044-cü ilə qədər ölkədə qalmasına dair razılaşma mövcuddur. Lakin regionda geosiyasi dəyişikliklər, xüsusilə də ABŞ Zəngəzur dəhlizinə gələndən sonra rus hərbçilərinin vaxtından əvvəl getməsi mümkündürmü?

Mövzu ilə bağlı “Cebheinfo.az”a danışan beynəlxalq münasibətlər üzrə ekspert Əziz Əlibəyli bildirib ki, rus hərbçilərinin bölgədən çıxarılması real görünmür.

Onun sözlərinə görə, həm müqavilə, həm də əlavə hərbi ehtiyat hissələrinin həmin bölgəyə toplanması səbəbindən prosesin həyata keçirilməsi çətindir:

“Onları çıxarmaq mümkün deyil. Çünki həm müqavilə var, həm də əlavə hərbi ehtiyat hissələri həmin bölgəyə yığırlar. Toqquşmaya meyillidirlər, amma bu, baş verməyə də bilər. Bu isə yalnız Alyaska görüşündən nəticə çıxacağı halda mümkündür”.

Politoloq qeyd edib ki, əsas sual Cənubi Qafqazın ABŞ-yə "təhvil" verilib-verilməyəcəyi ilə bağlıdır:

“Burada açığı əsas sual budur ki, Cənubi Qafqazı ABŞ-yə "təhvil vermək" fikri varmı? Bəzi ehtimallara görə, Ukrayna məsələsində razılaşma əldə oluna bilər və bunun qarşılığında Qafqazda Rusiya mövqelərini zəiflədəcək. Prinsip etibarilə belə bir ssenari mümkündür. Lakin rus hərbçilər bölgədən çıxmadıqca, tərəflər arasında ciddi qarşıdurma ehtimalı qalacaq”.