Amma böyük güclər niyə sülhə nail olmaq istəyir, onların strateji hədəfləri nədir? Bilmirik. Bununla belə, biz, hələki regionda nələrin planlaşdırıldığından da xəbərsizik. Özümüzü elə aparırıq ki, sanki bütün dünya güclərinin, eləcə də ABŞ-ın əsas hədəfi Azərbaycanı daha güclü etmək və Naxçıvanla Azərbaycanın qərb rayonlarını birləşdirməkdir. Bütün bunlar bizim strateji hədəfimizdir, onların deyil.

Və tələsirik... Məsələn, 8 avqust görüşündən sonra ermənilərin təriflənməsi prosesi başlayıb, sanki ermənilərin müsbət obrazının yaradılması üçün tələsirik. Halbuki, Ermənistanda eyni tendensiya müşahidə edilmir, Azərbaycanla bağlı “isti” təriflərə rast gəlmək olmur. 80 yaşlı Misir Mərdanov 2017-ci ildən AMEA-nın Riyaziyyat və Mexanika İnstitutunun direktorudur. Nə vaxt baxırsan, müsahibələr verir, xatirələr danışır, nazir olduğu dövrün eyforiyasından hələ də çıxa bilmir. Bu dəfə də Paşinyanın əmisini tərifləyib. Yəni, bu qədərmi qovhaqovdayıq, bu qədərmi qaçhaqaçdır?! M.Mərdanov gedib bir düstur kəşf eləsin, riyaziyyat institutu batır, oranı diriltsin də, elə bil ədəbiyyatçıdır, poetikaya köklənib. Erməniləri tərifləmək sonrakı mərhələnin məsələsidir axı...

Ölkədə hələ də müalicə alan qazilər, həyatını qaydaya sala bilməyən şəhid ailələri və hər gün övladının məzarı başında üsyan qoparan şəhid anaları var. Gözləyin, sülh müqaviləsi imzalansın, sonra erməniləri tərifləyərsiniz. Onsuz da dövlətin mövqeyi nə olacaqsa, xalq da bu mövqedən çıxış edəcək. Amma çay gəlməmiş çırmanırıq.