“Hər bir parad hərbi deyil, hərbi-siyasi tədbirdir, güc nümayişidir. Bu səbəbdən də, hərbi parad təşkil edən dövlətlər ora ən azından öz ölkəsində olan səfirliklərin hərbi ataşelərini dəvət edirlər. Yəni peşəkarları. Onlara nümayiş etdirirlər ki, güclü silahları, ordularının nizam-intizamı var və qarşıya qoyulan vəzifələri həll etməyə qadirdilər. Hesab edirəm ki, Çinin paytaxtı Pekində baş tutan parad da bu məqsədlə həyata keçirildi. Üstəlik, bu paradı çoxlu sayda dövlət və hökumət başçısı izlədi”.

Bunu “Reytinq” qəzetinə açıqlamasında hərbi ekspert Azad İsazadə dünən Çində baş tutan hərbi paraddan danışarkən deyib.

“Cənub-şərq ölkələri Çinin liderliyində Qərbə güc nümayiş etdirdi. Xüsusilə, nəzərə almaq lazımdır ki, son 30 ildə Çin hərbi imkanlarından istifadə etməyib, daha çox iqtisadi əlaqələr və investisiya yatırmaqla nisbətən kiçik ölkələri özündən asılı vəziyyətə salıb, böyük iqtisadi sıçrayış həyata keçirib. Ancaq biz indi görürük ki, Çin gərgin qlobal dünyada hərbi parad keçirərək güc və imkanlarını nümayiş etdirir. Bu, eyni zamanda ambissiyaların olduğuna işarədir”,- İsazadə izah edib.

Müsahibimizin sözlərinə görə, Çin ordusu uzun müddətdir ki, müharibələrdə iştirak etməyib: “Səhv etmirəmsə, Çin ordusu sonuncu dəfə ada uğrunda sovet ordusu ilə qarşıdurmaya girib və bu savaşda uduzub. Eyni zamanda Çin ordusu Vyetnam ordusunda da məğlub olub. Amma bu o demək deyil ki, Çin ordusu hazırda gücsüzdür və hərbi imkanları aşağıdır. Hazırda Çin ordusu zəif olmadığını göstərir. Üstəlik, nəzərə almaq lazımdır ki, ordunun sayına, habelə istifadə etdiyi silahların hamısını özü istehsal etdiyinə görə, dünyanın ikinci ordusudur. Rusiya ordusunun hazırda Ukraynada taqətdən düşdüyünü nəzərə alsaq, Çin ordusunun imkanları daha da artır”.

İsazadənin fikrincə, ABŞ başda olmaqla Qərb dünyasının bu hərbi parada reaksiyası Çinin addımının öz təsirini göstərdiyinə işarədir: “ABŞ prezidenti Donald Tramp açıq reaksiya verərək deyib ki, siz ora toplaşaraq mənim əleyhimə iş aparırsınız. Britaniyanın da parada reaksiyası ortadadır. İndi Ukrayna-Rusiya müharibəsindən sonra Avropanın qabaqcıl ölkələri dayanmadan silahlanır, hərbi qüdrətlərini artırmağa çalışırlar. Bunlar əbəs yerə deyil. Üstəlik, ABŞ liderliyində Cənubi Koreya, Yaponiya və Avstraliyadan ibarət hərbi-siyasi müttəfiqlik birliyi yaradılıb və bunun məqsədi Asiya regionunda Çinin davranışlarını nəzarətdə saxlamaqdır. Amma biz görürük ki, Çin güclənir və dünyaya meydan oxuyur”.