Bu gün dünyanın ən gəlirli sahələrindən biri də turizmdir.

Təsadüfi deyil ki, dünyanın bir sıra ölkələri artıq bu sektorda tanınır. Mövsümdən asılı olmayaraq əhali turizm ölkələrinə üz tutur.

UNWTO dünyanın ən çox səyahət edilən 20 ölkəsini açıqlayıb. BMT-nin Ümumdünya Turizm Təşkilatının (UNWTO) dərc etdiyi son məlumatlara görə, dünya üzrə səyahət etmək istəyi 2024-cü ildə pandemiyadan əvvəlki səviyyəyə qayıdıb. Məlumata görə, 2024-cü ildə 1,47 milyard beynəlxalq səfər edilib. Fransa yenidən siyahıya başçılıq edir.

Paytaxtı Paris və Fransa Rivierası kimi bölgələri ilə diqqət çəkən ölkə təxminən 102 milyon beynəlxalq turisti qəbul edib. 2024-cü il Paris Olimpiadası da bu marağın artmasına səbəb olub. Turistlərdən böyük tələbat görən İspaniya Balear və Kanar adaları ilə birlikdə Barselona, Madrid və Sevilya kimi şəhərlərlə ikinci olub. Ötən il ölkəni 93,8 milyon ziyarətçi qəbul edib. Üçüncü yerdə 72,4 milyon ziyarətçi ilə ABŞ gəlir.

Nyu- York, Los-Anceles və Las- Veqas kimi böyük şəhərlər diqqəti cəlb edir. Dördüncü yerdə olan Türkiyə 2024-cü ildə 60,6 milyon turistə ev sahibliyi edib. İstanbul və Egey və Aralıq dənizi sahillərindəki istirahət mərkəzləri diqqət çəkən istiqamətlər arasında olub.

İtaliya beşinci, Meksika, Çin, Böyük Britaniya, Almaniya və Yaponiya üçüncü yerdədir. Yaponiyadakı böyük artım diqqəti cəlb edib. Zəif yen məzənnəsi sayəsində ölkə 47 faiz artımla 36,9 milyon turistə çatıb.

Digər tərəfdən, Avropada dağ və ada istiqamətləri seçildiyi halda, Asiya ölkələrində turizmin bərpası diqqəti çəkir. Səudiyyə Ərəbistanı 2019-cu illə müqayisədə beynəlxalq ziyarətçilərinin sayını təxminən iki dəfə artırıb. Ən çox ziyarət edilən 20 ölkə (2024) bunlardır:

Fransa – 102 milyon
2.İspaniya – 93,8 milyon
3.ABŞ – 72,4 milyon
4.Türkiyə – 60,6 mln
5.İtaliya – 57,7 milyon
6.Meksika – 45 milyon
7.Çin – Rəsmi məlumat yoxdur
8.Birləşmiş Krallıq – Təxminən 39 milyon
9.Almaniya – 37,5 mln
10.Yaponiya – 36,9 milyon
11.Yunanıstan – 36 milyon
12.Tayland – 35,5 milyon
13.Avstriya – 32,2 mln
14.Birləşmiş Ərəb Əmirlikləri
15.Səudiyyə Ərəbistanı – 29,7 milyon
16.Portuqaliya
17.Malayziya
18.Honq Konq
19.Hollandiya – 21,3 milyon
20.Hindistan – 20,6 milyon.

Azərbaycanda turizm prioritet olsa da, hələlik dünyanın inkişaf etmiş ölkələri sırasında yer ala bilmir. Ölkəyə ən çox turist pandemiyadan öncə gəlib ki, bu da 3 milyon nəfər təşkil edib. 2025-ci ilin yanvar-aprel aylarında Azərbaycana dünyanın 174 ölkəsindən 735,8 min və ya əvvəlki ilin müvafiq dövrü ilə müqayisədə 1,3 faiz çox əcnəbi və vətəndaşlığı olmayan şəxs gəlib.

Dövlət Statistika Komitəsinin məlumatına görə, ötən ilin eyni dövrü ilə müqayisədə İsraildən gələnlərin sayı 2,8 dəfə, Tacikistandan 2 dəfə, Çindən 1,7 dəfə, İordaniyadan 45,6 faiz, Hindistandan 32,9 faiz, Qırğızıstandan 32,1 faiz, İspaniyadan 28,8 faiz, Yaponiyadan 26,7 faiz, Pakistandan 22,5 faiz, ABŞ-dən 20,2 faiz, Qazaxıstandan 17,7 faiz, Birləşmiş Ərəb Əmirliklərindən 16,6 faiz, Kanadadan 15,5 faiz, Niderlanddan 10,7 faiz, İtaliya və Misirdən 10 faiz artıb. Qeyd edilib ki, gələnlərin 24,2 faizi Rusiya Federasiyası, 18 faizi Türkiyə, 11 faizi Hindistan, 9 faizi İran, 4,7 faizi Gürcüstan, 3,6 faizi Qazaxıstan, 2,9 faizi Pakistan, 2,5 faizi Səudiyyə Ərəbistanı, 2,2 faizi Birləşmiş Ərəb Əmirlikləri, 1,9 faizi İsrail, hər birindən 1,8 faiz olmaqla Özbəkistan və Çin, 1,5 faizi Ukrayna, 1,4 faizi Türkmənistan, 1,1 faizi Küveyt, 1 faizi Belarus, 11,4 faizi digər ölkələrin vətəndaşları olmuşdur.

Gələnlərin 70,2 faizini kişilər, 29,8 faizini qadınlar təşkil edib. 2024-cü ilin yanvar-aprel ayları ilə müqayisədə Avropa İttifaqına üzv ölkələrdən gələnlərin sayı 1,8 faiz artaraq 27,8 min nəfər, körfəz ölkələrindən gələnlərin sayı 3,4 faiz azalaraq 117,8 min nəfər, MDB ölkələrindən gələnlərin sayı 9,2 faiz azalaraq 243 min nəfər olub, digər ölkələrdən gələnlərin sayı isə 12,2 faiz artaraq 347,2 min nəfər təşkil edib. Ölkəmizə gələn əcnəbilər və vətəndaşlığı olmayan şəxslərin 71,8 faizi hava, 26,6 faizi dəmir yolu və avtomobil, 1,6 faizi isə dəniz nəqliyyatından istifadə edib. Göründüyü kimi, Azərbaycana ilin sonunadək 2 milyon turist gələcəyini nəzərə alsaq, ölkəmiz ən çox turist səyahət edən ölkələrin siyahısına düşməsinə hələ uzun illər lazımdır.

Nigar Abdullayeva
“Cebheinfo.az”