.
İyulun 7-də Avropa Komissiyasının (AK) sədri Ursula fon der Leyen Avropa Parlamentinin Strasburqda keçiriləcək plenar iclasında şəxsən iştirak edəcək.
Teleqraf xəbər verir ki, iclasda koronavirus pandemiyası zamanı vaksinlərin satınalınmasında ciddi pozuntular səbəbindən ona etimadsızlıq səsverməsi müzakirə olunacaq.
AK rəhbərinə qarşı ittihamların müzakirəsinin yerli vaxtla saat 18:00-da (Bakı vaxtı ilə 20:00) baş tutacağı gözlənilir. Səsvermə isə iyulun 10-da, yerli vaxtla saat 12:00-da (Bakı vaxtı ilə 14:00) keçiriləcək.
Mayın 14-də Avropa Ədalət Məhkəməsi fon der Leyeni 2021-2023-cü illərdə koronavirusa qarşı vaksinlərin alınmasına dair müqavilələr haqqında məlumatların gizlədilməsinə görə məsuliyyətə cəlb edib.
Məhkəmə həmçinin AK rəhbərinə COVID-19 peyvəndlərinin alınması ilə bağlı ən böyük sövdələşmə ilə bağlı "Pfizer" əczaçılıq şirkətinin direktoru Albert Burla ilə SMS yazışmalarını açıqlamağı tələb edib. "New York Times"-ub sorğusunun cavabında AK SMS mesajlarının arxivləşdirilmədiyini söylədi. Məhkəmə izahatı qeyri-kafi hesab edib.
U. Fon der Leyen o vaxt üçün sınaqları tamamlanmamış COVID-19 peyvəndinin alınması üçün müqavilə bağlamaqda ittiham olunur. Onun bu qərarı Aİ ölkələrinin əvvəlcədən razılığı olmadan "Pfizer" rəhbəri ilə SMS yazışmalarından sonra verdiyi iddia edilib. Nəticədə buna Aİ büdcəsindən 35,8 milyard avro xərclənib.
