Bizim futbol üzrə müxtəlif yaş qrupları üzrə kollektivlərin, eləcə də əsas milli komandanın göstəriciləri nikbinliyə qətiyyən əsas vermir. Əksinə, aşkar hiss olunur ki, bu müstəvidə xeyli geriləmişik. Uğursuz nəticələr bir-birini əvəz edir. Üfüqdə isə ümidverici bir şey görünmür. Hər şeydən əvvəl ona görə ki, futbolun gələcəyi haqqında düşünən yoxdur. AFFA və klublar bu gün nəticə qazanıb işlərin qaydasında olması görüntüsünü yaratmaq istəyir.
Bizimyol.info xəbər verir ki, ölkə futbol təsərrüfatında həftənin ən məyuseducu xəbərlərindən biri, bəlkə də, birincisi Qəbələ Futbol Akademiyasının fəaliyyətini dayandırması oldu. Bu akademiyanın ölkə futboluna faydasını əminliklə vurğulamaq mümkündür. Qəbələdəki futbol məktəbi sayəsində milli çempionatda nə qədər istetdadlı futbolçu peyda olurdu.
Ümumiyyətlə, belə akademiyalar olmadan ölkə futbolunun gələcəyini düşünmək olmur.
Akademiya niyə bağlandı? Çünki “Qəbələ” futbol klubu bütün gücünü çempionata yönəltmək istəyir. Aşağı liqada keçirilən bir il dərs olub. AFFA-dan akademiyanın yaşaması üçün pul almaq asan görünməsin. Yəqin “Qəbələ”də düşündülər ki, çempionatda uğurlu çıxışla avrokuboklara vəsiqə qazanmaq olar, orada da “Qarabağ” kimi pul qazanmaqla maliyyə vəziyyətini düzəltmək. Ölkə futbolunun gələcəyi yenə heç kimə lazım olmadı.
“Bakı” klubunu xatırlayırsınız? Necə gözəl işlər planlaşdırılmışdı. Təlim-məşq bazasına söz ola bilməzdi. Orada yaxşı futbolçular yetişirdi. İndi bazanın yerində çoxmərtəbəli binalar ucalır.
Gözümüzün qabağında necə ölkələr futbolda uğur qazanır. Uzağa getmədən Gürcüstanı misal gətirək. Avropa Çempionatının final mərhələsində gözəl çıxış etdilər. Gənclər arasında qitə birinciliklərinin də daimi iştirakçısına çevriliblər. Hələ Dünya Çempionatına vəsiqə şansı da qalıb. Hamısı uşaq futboluna lazımi qayğının nəticəsidir.
Özbəkistan və İordaniya ilk dəfə Dünya Çempionatının final mərhələsində iştirak edəcək. Lüksemburq, Farer adaları kimi cırtdan ərazilərdə belə, milli komandalar daha inamlı görünməyə çalışır. Biz isə sanki dünya futbolunun autsayderlərindən biri olmaq üçün çalışırıq.
Bəsit tövsiyə kimi səslənsə də, hər şeydən əvvəl uşaq futbolunun qayğısına qalmalıyıq. Kağız üzərində çox iş görülüb, indi gerçək əməllər zamanıdır. Akademiyalar bağlanmamalıdır, əksinə, sayları artmalıdır. Gürcüstanı milli komandasının lideri Xviça Kvaratsxeliya kimi istedadlar söz yığını yox, məqsədyönlü iş sayəsində yetişir, ortaya çıxır.
