Bu günədək Gədəbəyin möcüzələr diyarı olması haqda nələrisə eşitmişdik, amma əsl həqiqətlər haqda o qədər də xəbərdar deyildik. Elə ki, bir çox sahibkarlar kimi, əslən Gədəbəy rayonundan olan Əliyev Oqtay Qara oğluna məxsus 38 kvm-lik mağaza da, 12 fevral 2015-ci il tarixdə rayon rəhbərliyinin vermiş olduğu qanunsuz tapşırıq əsasında yerlə-yeksan edildi, o halda bilib başa düşdük ki, belə bir olayların baş verməsini eşitdikcə, heç də hər kəs təəccüblənməməlidir. Çünki, bu günədək təkcə Oqtay Əliyev deyil, neçə-neçə sahibkarlar Ramiz Yediyarovun tətbiq etdiyi zorakı idarəçiliyin iztirabından zinhara gəlmiş və son anda olmazın müsibətlərlə də üz-üzə qalmışlar. Məsələn, Oqtay Əliyevin mağazasını icra başçısından aldığı tapşırıq əsasında yerlə-yeksan etdirən və bu gün də Gədəbəy şəhər icra nümayəndəliyinə rəhbərlik edən Şahbaz Bayramovdan soruşmaq lazımdır ki, mağazanın içərisində, hansı ki, ərzaqla dolu dəmirdən olan seyf anbarı neynəyib? Əgər bunun araşdırılmasına ehtiyac yaranarsa, o halda “Rabitə Bank”a müraciət edib, vaxtilə həyata keçirilmiş çəklişlərə bir daha istinad etmək olar.
Onu da qeyd edək ki, Oqtay Əliyev ötən ilin sentyabrında ona məxsus mağazanın söküləcəyi barədə əvvəlcədən xəbər tutur və dərhal “Rabitə Bank”ın rəhbərliyinə bu haqda məlumat da verir. Çünki, o, mağazasını vaxtilə banka girov qoymuş və sahibkarlıq fəaliyyətini daha da genişləndirmək məqsədilə, qeyd olunan bankdan 50 min manat məbləğində kredit götürübmüş. Bank rəhbərliyi çox keçmir ki, səlahiyyət verdiyi Mansur Osmanovun icra başçısı ilə görüşməsini və problemin varlığına birlikdə aydınlıq gətirilməsi qərarına gəlir. Və həmin şəxs də, məlumatı verən Oqtay Əliyevlə Ramiz Yediyarovun qəbulunda olub, onun iştirakı ilə birlikdə müzakirə aparmaq istəsə də, həmin vaxt elə şərait yaradılır ki, Mansur müəllim icra başçısı ilə təkbətək görüşməli olur. Ümumi söhbət zamanı icra başçısı bankın səlahiyyətlisinə bildirir ki, “biz mağazaya onun qiymətləndirilmiş dəyəri məbləğində kompensasiya verə bilməyəcəyik. Hətta, bu barədə fikirləşib ona məlumat verilməsi üçün, Ramiz Yediyarov şəxsi mobil nömrəsini Mansur Osmanova da verir. Elə ki, ümumi söhbətin məğzi barədə Oqtay Əliyev ətraflı məlumatlandırılır və o, həmin an bankın səlahiyyətlilərinə bildirir ki, “mən artıq heçnə istəmirəm. Yalnız istəyim sahiblik etdiyim və tam mülkiyyətimdə olan mağazamın dəyərləndirilmiş qiymətini, xarab edilmiş ərzaqla bərabər, tam yarasız hala salınmış şəxsi avadanlıqlarımın müəyyən edilmiş dəyərini, mağazada qalan otuz illik hesabat sənədlərimi tələb edirəm. Bu mənim həm haqqım, həm də qanunla müəyyən edilmiş hüququmdur” deyir.
Faciəli hal odur ki, olmazın olaylarla üz-üzə qalan Oqtay Əliyevin, bu günədək döymədiyi qapı, narahat etmədiyi vəzifə sahibləri qalmayıb. Amma, nə fayda! Çünki, sahibkarlıq fəaliyyəti ilə məşğul olan bu şəxsin, ötən səkkiz ay müddətində ayrı-ayrı qurumlara ünvanladığı müraciətlərə bir kimsə, o cümlədən rayon rəhbərliyi də cavab vermir. Belə olan halda ortaya çoxsaylı suallar çıxır ki, görəsən Ramiz Yediyarov və digər vəzifə sahibləri kimə arxalanırlar ki, bu qədər saymazyanalıq edirlər?
Onu da qeyd edək ki, Oqtay Əliyev etdiyi müraciətlə bağlı bu ilin 01 oktyabr günü PA olur və təsadüf nəticəsində Ramiz Yediyarovla həmin qurumda üz-üzə gəlir. Heç on dəqiqə vaxt keçmir ki, ona icra hakimiyyəti aparatında aparıcı vəzifə sahibi olan şəxs tərəfindən iki dəfə zəng olunur və bildirilir ki, “sən ora getmə, gəl bura, üzləşdiyin problemləri biz burada həll edəcəyik”. Həmin vəzifə sahibinin etdiyi telefon zəngi əsasında o, 02 oktyabrda Gədəbəydə olur və istəyir ki, şəxsən Ramiz Yediyarovla görüşüb üzləşdiyi problemlərin varlığına birlikdə aydınlıq gətirə bilsin. Çox təəssüflər olsun ki, nahar fasiləsindən sonra Oqtay Əliyev təkrar icra hakimiyyəti aparatına getsə də, o rəhbərliklə deyil, müavinlə görüşməli olur. Çünki, Oqtay Əliyevin istəyini icra başçısına çatdıran müavin, son anda rəhbərliyin yanından əliboş qayıdır.
Buna səbəb “mənim onu qəbul etməyə vaxtım yoxdur” deyə, icra başçısının verdiyi tapşırıq əsas gətirilir. O, 05 oktyabr günü səhər saatlarında təkrar Gədəbəydə olsa da, yenə də oxşar stiuasiya ilə üz-üzə qalır. Yəni, başçı bu dəfə də onu qəbul etmir. Baxmayaraq ki, bu ilin 14 sentyabr günü Oqtay Əliyev PA olarkən, həmin qurumun yüksək çinli vəzifə sahibləri ona bildirirlər ki, “sənin müraciətlərinə baxmışıq və problemlərinin həlli üçün Gədəbəy rayon rəhbərliyinə müvafiq tapşırıqlarımızı da vermişik. Sən get ora, rəhbərlik səni qəbul edib problemlərinin həllinə köməklik edəcək” deyirlər.
Artıq Ramiz Yediyarovun bu cür addımları onu sübut etməyə tam əsas verir ki, o, PA-nın səlahiyyətlilərini də saya salmır. Bu da birbaşa ölkə rəhbərinin yürütdüyü siyasətə xəyanət etməkdən başqa bir şey deyil. Çünki, cənab İlham Əliyev dəfələrlə televiziya çıxışlarında vurğulayıb ki, “mən kimi hansı vəzifəyə təyin edirəmsə, ilk növbədə belə bir tapşırığımı verirəm ki, gedin əhali ilə işləməyi bacarın, onların problemlərini həll edin, qayğılarına qalın” deyir. Bu belə olduğu halda, görəsən ölkə rəhbərinin verdiyi tapşırıq niyə Gədəbəydə yerinə yetirilmir? 35 ilik iş təcrübəsi olan sahibkar, bu gün səbəb nədir ki, problemlərinin həlli üçün qapıları döyməyə məcbur qalır?
Bir məqama da toxunaq ki, Oqtay Əliyev 05 oktyabr günü Gədəbəydə olarkən, ona növbəti dəfə “tor” qurulduğunu hiss edir və tez də rayonu tərk etməyə məcbur olur. Çünki, o, haqqını tələb etmək məqsədilə, bu ilin 20 iyun günü icra hakimiyyətində olarkən, rayon rəhbərliyinin hüquq-mühafizə orqanı əməkdaşlarına vermiş olduğu tapşırıq əsasında, onu 15 sutka həbs də edirlər. Guya ki, həmin gün Oqtay Əliyev xırda xuliqanlığa yol vermiş və ictimai asayişi də hansısa formada pozubmuş.
Diqqəti cəlb edən hal odur ki, “Rabitə Bank” bu gün də Oqtay Əliyevlə qərəzçiliyə getmir və öz nümayəndəsini nə vaxt icra hakimiyyətinə göndərirsə, həmin şəxsə qeyd olunan qurumdan yalnız boş-boş vədlər verilir. Belə olan halda bankın səlahiyyətliləri ona bildirirlər ki, “əgər istəyirsənsə səni efirə çıxaraq və efirdə qanuni sənəd-sübutunla danış. Qoy hər kəs, o cümlədən ölkə rəhbəri də, Gədəbəydə tətbiq olunan və əksər sahibkarları gözümçıxdıya salan Ramiz Yediyarovun zorakı idarəçiliyi haqda, ətraflı məlumat əldə edə bilsin”.
Bütün bunlara baxmayaraq, problemlərinin həll olunacağına hələ də ümid bəsləyən Oqtay Əliyev, bu gün də inanır ki, haqq-ədalət qalib gələcək və Azərbaycan qanunlarının aliliyi, ona üzləşdiyi problemlərin həllində yardımçı da olacaq.
Bu gün elə bir vəziyyət əmələ gəlib ki, təkcə Oqtay Əliyev deyil, Ramiz Yediyarov idarəçiliyindən zinhara gələn və əslən Gədəbəydən olan Mahmudov Natiq Nuru oğlu, Səfərov Vaqif Qara oğlu, Sarıyev Mübariz İsrafil oğlu, Əbilov Nizami Xəlil oğlu, Məmmədov Qasım Nəriman oğlu, Qafarov Elyar Həşim oğlu, Elman İbrahimov və digər şəxslər, artıq qərara gəliblər ki, yaxın vaxtlarda 40-50 nəfər ailə üzvlərinin iştirafı ilə birlikdə PA-nın qarşısında etiraz aksiyası keçirsinlər.
