Sabiq nəqliyyat naziri Ziya Məmmədov ailə biznes-imperiyasına daxil olan aktivləri itirməkdə davam edir. 2018-ci il aprelin 1-dən belə obyektlərdən biri olan Qubadakı beşulduzlu “Quba Rixos” hoteli rebrendinq edib.
Hoteli Ziya Məmmədovun əlindən əslində 2015-ci ildə almışdılar. O dövrdə hakimiyyətdə Ziya Məmmədova inamsızlıq yaranmışdı və nəqliyyat naziri olaraq səlahiyyətləri çox ciddi şəkildə məhdudlaşdırılmışdı. Həmin günlərdə belə xəbərlər yayılmışdı ki, Ziya Məmmədova oğlu Anar Məmmədovun idarə etdiyi “Garant Holdinq”ə daxil olan beşulduzlu “Rixos Quba Azərbaycan” hotelini təhvil vermək tapşırılıb. Hotelin sahibi dəyişidirilib və fəaliyyətini davam etdirib. Yeni sahibləri isə 2018-ci il aprelin 1-dən hotelin adını “Quba Palace”yə dəyişiblər.
Hotelin baş meneceri Kənan Ağayevin sözlərinə görə, “Quba Palace” yüksək səviyyəli xidməti ilə sektorda uğurlu və peşəkar imicini saxlayaraq yeni brendini daha da məşhurlaşdırmağa çalışacaq. Hotel rəhbərliyi “Rixos” brendinin hotelin adından çıxarılmasının yeni çağırışlarla əlaqəli olduğunu bildirib: ““Rixos” brendi regionu tərk etmək haqqında qərarını açıqlayaraq rəsmən həm Azərbaycan, həm də Gürcüstan bazarından çıxır. Nəticə etibarilə aprel ayından Azərbaycandakı “Quba Rixos” hoteli “Quba Palace”, Gürcüstandakı “Rixos Borjomi” isə “Borjomi Likani” adını daşıyacaq. Biz daha çox turist cəlb etmək, hotelimizin böyük potensial və imkanlarından səmərəli şəkildə istifadə etmək istəyirik. Əminik ki, yaxın bir müddətdə “Quba Palace” bazarda daha güclü bir brend kimi tanınacaq".
Qeyd edək ki, Azərbaycanda ilk və yeganə qolf meydançasına malik “Quba Palace” (keçmiş “Rixos”) hotel kompleksi 2013-cü ildə istifadəyə verilib. Maraqlıdır ki, Ziya Məmmədovun oğlu Anar Məmmədov hoteli 2015-ci ildə təhvil versə də, rəhbərlik etdiyi “Garant Holdinq”in saytında http://www.garant.az/az/Layih%C9%99l%C9%99r/2333 ttp://www.garant.az/az/Layih%C9%99l%C9%99r/2333 hələ də hotelin “Rixos Quba Azərbaycan”ın holdinqə daxil olduğu haqda məlumat qalmaqdadır. Onu da qeyd edək ki, 2011-ci ildə Ziya Məmmədovun oğlu Anar Məmmədov Azərbaycan Qolf Federasiyasını qeydiyyatdan keçirib. Özü də həmin federasiyanın prezidenti seçilmişdi. 2 il sonra isə Anar Məmmədov “Rixos Quba Azərbaycan”da ölkədə yeganə qolf meydançasını da istifadəyə vermişdi. 2015-ci ildə “Rixos Quba Azərbaycan” Məmmədovların ailə holdinqlərinin tərkibindən çıxarılandan sonra Anar Məmmədov Azərbaycan Qolf Federasiyasını maliyyələşdirməkdən də imtina edib. Hazırda federasiyanın qapıları bağlıdır. Federasiya maliyyə çatışmazlığına görə uzun müddətdir ki, heç bir beynəlxalq yarışlara da qatıla bilmir. İşçilər də aylarla əmək haqqı almadıqdan sonra işə çıxmaqdan imtina ediblər.
Yada salaq ki, Ziya Məmmədovun ailə holdinqi bir vaxtlar Bakının sərnişindaşıma nəqliyyatında inhisarçı mövqedə olan “Transgate” MMC-yə sahib idi. Ziya Məmmədovun kreslosu laxlayandan sonra “Transgate”ə məxsus avtobuslar istifadəyə yararsız adı ilə Bakını əhatə edən marşrut xətlərindən çıxarıldı. MMC-yə məxsus 10-dan çox marşrut başqa daşıyıcılara təhvil verildi. Məmmədovların Bakının mərkəzində ucaltdıqları və bir vaxtlar hər kəsin Ziya Məmmədovun klanı üçün “xilas kəməri” hesab etdiyi “Trump Tower” də artıq özgəninkiləşdirilib.
Ziya Məmmədov hakimiyyətdəki mövqelərini itirdiyi günlərdə onun oğlu Anar Məmmədovun özünə dost elan etdiyi Donald Tramp ABŞ-da prezidentliyə namizəd idi. Trampın prezident seçilməsindən sonra Azərbaycanda buna ən çox sevinən Məmmədovlar ailəsi idi. Ziya Məmmədovun karyerasının qürub etdiyi bir zamanda oğlu Anar Məmmədovun dostu Trampın supergüc dövlətin prezidenti seçilməsi ciddi tramplin ola bilərdi. Belə iddialar da vardı ki, Ziya Məmmədov Trampın prezident seçilməsi şərəfinə ziyafət təşkil edib. Oğlu Anar Məmmədov da ABŞ seçkilərinin nəticəsini toy-bayrama çevirmişdi. Hətta belə xəbərlər dolaşırdı ki, Ziya Məmmədov yolunun vitse-prezidentliyə açıldığını düşünür, revanşa hazırlaşırmış.
Lakin çərxi-fələk tam əksini ortaya qoydu. Tikinti maqnatı olan milyarder Donald Tramp azərbaycanlı oliqarx Anar Məmmədova görə ölkəsində kəskin tənqidə məruz qaldı, iş o yerə çatdı ki, Donald Trampın adını daşıyan dəbdəbəli hotellər şəbəkəsinin Azərbaycandakı binası üzərindən “Trump Tower” sözləri söküldü. Halbuki 2014-cü ildə Tramp bəyan etmişdi ki, “Trump İnternational Hotel & Tower Baku” “Trump Organization”un standartlarını daşıyan ən yaxşı qlobal inkişaf layihələrindən biridir. Trampın adını daşıyan binaların çoxu kimi Bakıdakı hotel də ona məxsus deyildi. Bina Məmmədovun nəzarət etdiyi “Garant Holdinq” tərəfindən tikilmişdi və onun şirkətinə məxsus idi.
Tramp adının bu hoteldə istifadə edilməsinə və layihə ilə bağlı təcrübəsinə görə sərfəli komissiyon haqqı olaraq 2,5 milyon dollar alıb. Yayılan maliyyə sənədlərindən məlum olurdu ki, Anar Məmmədovun hotelini idarə etmək üçün “THC Baku Hotel Manager Services LLC”, “THC Baku Hotel Manager Services Member Corp.” , “THC Baku Services LLC” və “THC Baku Services Member Corp.” adlı şirkətlər təsis edilib. Həmin şirkətlərin ikisində Donald Tramp 100 faiz, ikisində isə 99 faiz paya malikdir. Hotelin Trampın dəbdəbəli hotellər zəncirinin bir hissəsi kimi idarə olunacağı haqda da xəbərlər vardı. Amma bu baş vermədi. Hoteldən “Trump Tower” sözləri söküləndən sonra Ziya Məmmədovun rəhbərlik etdiyi nazirlik də yenidən təşkil edildi. Ziya Məmmədov və komandası işsiz qaldı.
Hakimiyyətin bu gedişi sabiqə çevrilən Ziya Məmmədovun çox ciddi narazılığına səbəb olub. Oğlunu ölkədən çıxaran sabiq nazirin mövcud hakimiyyətə qarşı gizli savaşın passiv üzvünə çevrilməsi iddiaları da var. Onun baş nazirin sabiq 1-cü müavini Abbas Abbasovla əlaqəli şəkildə hazırda hakimiyyətə qarşı xaricdən hücumlar edən mühacir kəsimə dəstək verməsi xəbərləri də gəlməkdədir. Hər prezident seçkisi öncəsi təşkil edilən belə hücumların daha kəsərli olması üçün iş aparılır. Bu iddialar doğrulsa, o zaman Ziya Məmmədovun da prezident seçkilərindən sonra başının dərddə olacağı qaçılmazdır.
“Yeni Müsavat”
