Onu işlədiyi sferada çox "yaxşı” tanıyırlar. Özünün dediyinə görə, olduqca vicdanlı və dürüst fəaliyyət göstərib… Hətta o qədər vicdanı "təmiz” olub ki, rəhbərlik etdiyi "Real MTK”da belə insanların necə aldadılmasına rahatca göz yummağı da bacarıb. Nəticədə, tilovuna saldığı insanlar bir də onda ayılıblar ki, külli miqdarda pullarını, əmlaklarını fırıldaqçının birinə peşkəş veriblər. Yüzminlərlə pul verib, obyekt və mənzil almış insanlar adi bir dələduzun qurbanı olublar.
Yəni biz bu qədərmi saf millətik? Yəni insanları aldatmaq bu qədərmi asandır? Hadisələrin gedişatına nəzər salsaq görərik ki, İlham Qasımov uydurduğu yalanlarına nəinki özünü, hətta başqalarını da inandırmağı bacarıb. Dediyinə görə, onun kifayət qədər yüksək vəzifəli tanış məmurları olub və o, böyük işlər görmək üçün məhz böyük məbləğlərdə "şirinlik” də verib. Demək, aldadılan insanlar məhz bu yolla tələyə salınıb. Bunu, dələduzluqda ittiham olunan İlham Qasımov öz məhkəməsində etiraf edib. Hətta demək olar ki, hər dinləmədə hansısa bir dövlət orqanının və ya yüksək dövlət məmurunun adını çəkərək, onlara külli miqdarda rüşvət verməsiylə bağlı iddialar irəli sürüb. Bunda İ.Qasımovun məqsədi nə idi?! Özünü təmizə çıxarmaqmı, yoxsa kimlərdənsə dəstək alaraq, cənab Prezidentin təyin etdiyi dövlət məmurlarına qarşı ləkələr yaxmaq?! Bu məsələdə cavabsız suallar o qədərdir ki…
Fakt isə odur ki, məhkəmənin qərarına əsasən, dələduzluqda ittiham olunan İlham Qasımov 15 il müddətinə azadlıqdan məhrum olundu. Amma… Məsələnin başqa bir tərəfi də var… Qulaq şahidlərinin dediyinə görə, "Real MTK” nın əməkdaşları israrla bildirirlər ki, "şefləri” tezliklə azadlığa çıxacaq. Qeyd edək ki, hökm verilmədən öncə Qasımovun adamları Ağır Cinayətlər Üzrə Məhkəmənin hakimi Zeynal Ağayevə 350 000 dollar verildiyini və qərarın onların xeyrinə olacağını yazırdılar. Ancaq istədikləri olmadı və 350 000 söhbətinin blef olduğu üzə çıxdı. İndi görəsən, kim bunlara söz verib?
İ.Qasımovun vəkilləri həm də hər yerdə çox gülünc bir iddia səsləndirirlər: İlham müəllim, günahsızdır, ona böhtan atıblar. Onu həbsdə 2 nəfərin – Gülağa Tənha (məşhur şair) və Müqəddəs Sultanovun (Baş prokurorluğun vəzifəli şəxsi) sifarişi ilə cəza kəsiblər. Hətta deyilənə görə, İlham Qasımova yaxın olan bəziləri gizlincə onu da pıçıldamağa başlayıblar ki… Gülağanın da, Müqəddəsin də pulu qaytarılıb və buna görə də İlham müəllim tezliklə yenə işinin başına dönəcək. Görəsən yaxınları "işinin başı” dedikdə, nəyi nəzərdə tutur? İ.Qasımovun narkotik ticarətiylə məşğul olması iddiasınımı? Dövlət məmurlarına şər atmasınımı? (Məsələn, Hacıbala Abutalıbov və müavinlərinə 4 milyon rüşvət verdiyini deməsi… ) Yoxsa sadə, sıravi Azərbaycan vətəndaşlarını illərdir rəzil vəziyyətinə qoymasınımı?
İlham Qasımovun "Sahil D”-yə direktor təyin etdiyi və "Real MTK” da mühasibi olan Ədilağa adlı birisi hətta o qədər cızığından çıxmışdı ki, İlhamın işini aparan Baş prokuror yanında Korrupsiyaya qarşı Mübarizə Baş İdarəsinin müstəntiqi Rəşad Mansurovun vəzifə səlahiyyətindən sui-istifadə etməsini həyasızcasına məhkəmədə səsləndirirdi. O, çəkinmədən deyirdi ki, Rəşad Müqəddəs Sultanovun tapşırığı ilə İlham müəllimin şirkətlərində çalışan bütün işçiləri dindirərək, onlara hədə-qorxu gəlib və İlhamla bağlı verdikləri izahatı məcburi şəkildə onun əleyhinə dəyişdirirmiş.
Sözsüz ki, olduqca absurd və yalan dolu bu fikirlər reallıqdan tam uzaqdı və həqiqət deyilənlərin yox, faktların diktəsində idi. Faktlar isə daha qorxulu məqamlardan danışırdı: İlham Qasımov təkcə yerli iş adamlarına qənim kəsilməmişdi… Onun fırıldaqçı nəfsinin arenası genişlənirdi. Hədəf qardaş ölkənin biznes sektorunda kifayət qədər nüfuzu olan və Azərbaycan bazarına sərmayə qoymaq istəyən vicdanlı insanlar idi. Məsələn, Türkiyənin tikinti sektorunda kifayət qədər məşhur olan "Mərcansoy” brendi kimi…
Brendin sahibi "Mərcansoy”Şirkətlər qrupunun sahibi Mövlanə Əli Mərcan 2007-ci ildə Azərbaycana gələrək, burada tikinti sektoruna investisiya yatırtmaq istəyib. Bədbəxtlikdən elə ilk gündən ortaq tanışlar türk iş adamını dələduz "işbaz” İlham Qasımov və onun ortağı Sahib İbrahimovla tanış edib. Vəssalam. Mərcanın Bakı macəraları başlayıb. Yüksək faiz adı ilə ortaqlıq təklifi alan iş adamı tezliklə Bakıda ucaldılacaq ən yaraşıqlı binalarda onun da yatırımı və zəhməti olacağı ümidi ilə pullarını fırıldaqçılara çemodanla verib. Bəli, yalnış oxumadınız, Qasımovla İbrahimov pulu nəğd yolla alıblar. Bu fakt özü-özlüyündə Qasımovla İbrahimovun Eldar Mahmudovun ”krışa”sı altında hərəkət etdiyini göstərir. Çünki milyonlarla nəğd dolları heç kim sabiq MTN şefindən xəbərsiz ölkəyə gətirə bilməzdi. Dubay, Çin, Rusiya və Türkiyədə daxil olmaqla, nəğd köçürmələrin hamısına Mahmudov-Çovdarov ikilisi nəzarət edirdi.
Türkiyəli iş adamının sözlərinə görə, beləcə onun illərlə aldanışı başlayıb. Dəfələrlə sərmayə qoyduğu tikintidə işlərin necə getdiyini bilmək üçün əraziyə gələn Mövlanə bəy içəri buraxılmayıb. Müxtəlif bəhanələr,əsassız söhbətlər şübhələrə yol açıb. Nəticədə, aldadıldığını hiss edən iş adamı məsələdən hər iki dövlətin yüksək vəzifəli məmurlarını agah etmək istəyib. Məsələ ilə bağlı Daxili İşlər Naziri Ramil Usubov şəxsən göstəriş verib və Mütəşəkkil Cinayətkarlığa Qarşı Mübarizə idarəsi işə başlayıb. İlham Qasımovun bir mənzili bir neçə adama, özü də müxtəlif qiymətlərlə satdığı aşkarlanıb. Hətta araşdırma zamanı o da məlum olur ki, tikintisinə 10 milyon dollara yaxın pul qoyan Mövlanə bəyə vəd olunan mənzillər də əlindən çıxıb. Çünki fırıldağın və hərisliyin pik həddində olan İ.Qasımov artıq o evlərə də müştəri tapıbmışвЂ¦ Beləcə, milyonları əlindən çıxan iş adamı Mərcan ömrü boyu heç kimin vurmadığı zərbəni qardaş bildiyi ölkənin vicdansız işbazından alır. Onu da qeyd edək ki, Azərbaycanda yaşadığı bu qədər müsibətlər Mərcan ailəsinin ölkəmizə olan sevgisini azaltmayıb. Sadəcə, pozulan hüququnun bərpasını və mənimsənilən milyonlarını geri istəyir. Qasımov-İbrahimov cütlüyünün fırıldaqlarının cəzasının günahsız Azərbaycan vətəndaşlarının evsiz qalaraq ödənilməsini istəmir, tam əksinə, Azərbaycan hökumətindən dələduzların mənimsədiyi pullarını geri qaytarması üçün yardım istəyir.
Sözsüz ki, bu qədər əlahəzrət faktın qarşısında dırnaqarası işbaz öz cəzasına çatmalıydı… Çatdı da – 15 il…
Amma bu 15 il haqqı tapdanan insanların, pulu göyə sovrulan iş adamlarının, ümidi puç olan evsizlərin yarasına məlhəm ola biləcəkmi? Onların çəkdikləri maddi və mənəvi ziyanın dəyərini kim ödəyəcək? Ya da heç ödəniləcəkmi? Suallar yenə də cavabsız qalır… Amma əminik ki, cavabsız qalan bu sualların bir gün mütləq nöqtə vaxtı olacaq. Çünkü bu həyatda heç nə cavabsız və cəzasız qalmır… Necə ki, İlham Qasımovun arxalandığı Eldar Mahmudov və Akif Çovdarovun imperiyaları başlarına yıxıldı. O da cəzasını layiqincə çəkəcək…
Yenicag.az
