Ötən ay – dekabrın 27-də “Azərbaycan bayrağını təhqir edən direktor haqqında SENSASİON FAKTLAR - "Məktəbə öz adını vermək istəyir..." sərlövhəli yazı dərc etmişdik. Həmin yazıda Astara rayon Ziya Bünyadov adına 2 saylı tam orta məktəbin direktoru Həsənova Maya Əliməmməd qızının Azərbaycan bayrağına hörmətsizlik etməsindən bəhs olunurdu. Qeyd edilirdi ki, direktor məktəb binasının üzərindən asılan bayrağın dalğalanmasının qarşısını almaq üçün onu 3 yerdən bağlayıb. Buna valideynlər etiraz etsə də, Azərbaycan Respublikasının Dövlət bayrağı haqqında Qanununa zidd olaraq, direktor onlara əhəmiyyət verməmişdi…
Bütün bunlar haqda ötən məqaləmizdə geniş məlumat verdiyimizdən, bu yazımızda təkrarçılığa yol verməyə ehtiyac görmürük. Amma onu da bildirək ki, həmin informasiya işıq üzü gördükdən sonra valideynlər və sözügedən məktəbin müəllimləri tərəfindən redaksiyamıza çoxsaylı zənglər daxil oldu. Bu zaman məlum oldu ki, direktor Maya Həsənova bu biabırçı hadisədən nəticə çıxarmaq əvəzinə, bayrağı birdəfəlik məktəb binası üzərindən götürüb. Bu haqda ​da “Direktor dövlət bayrağının məktəb binasından asılmasına imkan vermir – VALİDEYNLƏR ETİRAZ EDİR” sərlövhəli yazımızda dəyərli oxucularımızı bilgiləndirmişdik.
Direktorun qanunsuzluğu haqda məlumat verən mənbə deyirdi ki, ümumiyyətlə, pensiya yaşını keçən Maya Həsənovanın sağlıq durumunda problem var: “Direktorun sağlamlığı yerində deyil, sərbəst hərəkət edə bilmir, axsaya-axsaya yeriyir, yaddaşı tez-tez itir. Bu səbəbdən də çox vaxt dərslərini başqa müəllimlər keçir, amma onun adı gedir”.
Həmçinin o da vurğulanırdı ki, məktəbdə direktorun qol çəkməli olduğu sənədlərə çox vaxt onun əvəzinə katibəsi imza atır və möhür vurur: “Halbuki direktorun möhürü altında katibənin imza atması tamamilə qanunsuzluqdur”.
Məlum etirazlardan sonra isə direktor müəllimləri toplayaraq bildirib ki, kimin nə etməsindən asılı olmayaraq 70 yaşına qədər bu vəzifədə çalışacaq. Hətta o, kimlərəsə acıq verirmiş kimi, məktəbin ona məxsus olduğunu, özəlləşdirəcəyini və 2 ildən sonra öz adını daşıyacağını deyib”.
Təbii ki, direktorun bu kimi qanunsuz əməlləri təkcə valideynlərin deyil, müəllimlərin də etirazına səbəb olub. Ən azı ona görə ki, sözügedən məktəbdə direktor olmağa layiq olan müəllimlər olsa da, pensiya yaşını keçən və artıq idarəçilik potensialı tükənmiş M.Həsənovanın öz kreslosundan ikiəlli yapışması gənc kadrların önünə sipər çəkib. Halbuki, bu məktəbə daha gənc və perspektivli bir şəxs rəhbərlik etsə, bu, tədrisin keyfiyyətini yaxşılaşdırmaqla yanaşı, dirktorun ətrafına topladığı savadız, təcrübəsiz qohumlarının da tədricən yeni və layiqli kadrlarla əvəzlənməsi nəticəsində məktəbdə savadlı müəllimlər üçün də yeni perspektiv açmış olar. Hansı ki, ötən yazımızda da qeyd etmişdik ki, hazırda təkcə 6 nəfər ibtidai sinif müəllimi, eləcə də digər müəllimlərin əksəriyyəti direktorun qohumudur...
Lakin belə aydın olur ki, Astara rayon Təhsil Şöbəsinin müdiri Qızbəs Məmmədova ilə Maya Həsənovanın “işgüzar işbirliyi” uğurlu alındığından, direktorun bütün qanunsuz əməlləri birinci tərəfindən ört-basdır edilir və o, açıq-aşkar himayə olunur. Məsələn, qeyd etdiyimiz kimi, həmin məktəbin özündə direktorluğa layiqli namizədlər olsa da, Təhsil Şöbəsi onların qabağını kəsərək, M.Həsənova ilə müqaviləni hər il uzadır.
Əldə etdiyimiz məlumata əsasən, Astara rayon Ziya Bünyadov adına 2 saylı tam orta məktəbin direktorluğuna layiqli namizədlərdən biri, əksər müəllimlərin və valideynlərin direktor vəzifəsində görmək istədiyi tarix müəllimi Hüseynova Şahsənəm Elman qızının qarşısı da saxtakarlıqla kəsilib. Bu fakt məhkəmə sənədlərində və hakmin çıxardığı qərarda da öz əksini tapır. Lakin bu məsələdən öncə Astara rayon Təhsil Şöbəsinin müdiri Qızbəs Məmmədovanın Ş.Hüseynova barəsində rayon İcra Hakimiyyətinin şifahi sorğusuna cavab olaraq göndərdiyi müraciətlə oxucularımızı tanış edək:
“Astara rayon Təhsil Şöbəsi şifahi sorğunuza cavab olaraq bildirir ki, 1978-ci ildə anadan olmuş Hüseynova Şahsənəm Elman qızı 2004-cü ildən Z.Bünyadov adına Astara şəhər 2 saylı tam orta məktəbin rus bölməsində ixtisası üzrə tarix müəllimi işləyir. O, ixtisası üzrə rus bölməsində işləyən yeganə müəllimdir, ixtisasını yüksək səviyyədə bilir, savadlı və təcrübəlidir. Şahsənəm Hüseynova müəllimlərin diaqnostik qiymətləndirilməsində iştirak etmiş və 51 bal toplamışdır. Rayonun ümumtəhsil məktəblərindən şəhər 4 nömrəli, Pensər 1 nömrəli, Pensər 2 nömrəli və Şahağac 1 nömrəli kənd tam orta məktəblərində vakant qalmış direktor vızifələrindən birini tutmaq üçün Şahsənəm Hüseynova elektron ərizə ilə Təhsil Nazirliyinə müraciət etmişdir. Bildiririk ki, Şahsənəm Hüseynovaya şəhər 2 nömrəli tam orta məktəbin rus bölməsində tarix müəllimi kimi işləmək üçün zəruri ehtiyac yaranmışdır. Ona görə də onun rayonun yuxarıda adları çəkilən məktəblərin hər hansı birində direktor vəzifəsində işləməyi məqsədəmüvafiq hesab edilməmişdir”.
Məlumat üçün bildirək ki, bütün bu qanunsuzluqlardan sonra 26 dekabr 2017-ci ildə Hüseynova Şahsənəm Elman qızının iddiası əsasında Şirvan İnzibati-İqtisad Məhkəməsində hakim Allahverdiyev Zaur Mirzağa oğlunun sədrliyi ilə məhkəmə prosesi keçirilib. Belə ki, Şahsənəm Hüseynova Astara Təhsil Şöbəsinə qarşı iddia qaldıraraq, onun tərəfindən Təhsil Nazirliyinin məktəb direktorlarının işə qəbul müsabiqəsindən qanunsuz olaraq kənarlaşdırılmasına etiraz edib.
Məlumata əsasən, Astara Təhsil Şöbəsinin müdiri Qızbəs Məmmədova və işlədiyi məktəbin rəhbərliyi tərəfindən dəfələrlə mükafatlandırılan Ş.Hüseynova sözügedən müsabiqədə iştirak etmək üçün elektron qaydada ərizə ilə qeydiyyatdan keçib. 23 iyun 2017-ci ildə onun ərizəsinin qəbul olunduğu və müsabiqəyə buraxıldığı qeyd edilsə də, 25 iyun 2017-ci ildə yerli təhsil idaretmə orqanının mənfi rəyi əsasında, o, növbəti mərhələyə buraxılmayıb. Təhsil Şöbəsinin mənfi rəyinə “əsas” olaraq Astara rayon İcra Hakimiyyətinə göndərdiyi müraciətdə əks olunan fikirlər göstərilib.
Odur ki, bu qanunsuzluqlardan sonra məhkəmə Ş.Hüseynovanın iddiasının qismən əsaslı olduğunu qərara alıb: “Belə ki, iddia mümkün iddia olmaqla yanaşı, həm də qismən əsaslıdır”.
Məhkəmə təsdiq edir ki, Astara Təhsil Şöbəsinin müdiri Qızbəs Məmmədova namizəd barəsində Təhsil Nazirliyinini Müsabiqə komissiyasına heç bir qanuni əsas olmadan mənfi rəy təqdim etmiş və məhz həmin mənfi rəyə əsasında Şahsənəm Hüseynovanın müsabiqədə iştirakı məqsədəmüvafiq hesab olunmamışdır. Ona görə də məhkəmə hesab edir ki, cavabdehin imtinası qanunsuz hesab olunmalıdır.
Yekun olaraq məhkəmə qərara alıb ki, “iddia tələbi qismən təmin olunmalı, Hüseynova Şahsənəm Elman qızının Azərbaycan Respublikası Təhsil Nazirliyinin Müsabiqə komissiyasının ümumtəhsil müəssisələrinə direktor vəzifəsinə işə qəbulla bağlı müsabiqədə iştirakından imtinası qanunsuz hesab olunmalı və Hüseynova Şahsənəm Elman qızının ümumtəhsil müəssisələrinə direktor vəzifəsinə işə qəbulla bağlı imtahana buraxılması məsələsi məhkəmənin hüquqi mövqeyi nəzərə alınmaqla, yenidən araşıdırılması Azərbaycan Respublikası Təhsil Nazilriyinə həvalə edilməlidir”.
Hurriyyet.org
