Dövlət Miqrasiya Xidmətinin rəisi Firudin Nəbiyevin rəhbərlik etdiyi qurumun tətbiq etdiyi "sistem” nəinki minlərlə soydaşımızı, o cümlədən Azərbaycana sərmayə qoyan əcnəbi iş adamlarını da təngə gətirib.
Bu barədə Mia.az-a daxil olan məlumata görə, iş o yerə çatıb ki, hətta 20 l əvvəl Azırbaycan vətəndaşı ilə ailə quran, rəsmi nigaha daxil olan əksər Gürcüstanlı soydaşlarımız ya boşanmaya, ya da geri dönməyə məcbur qalıblar.
Maraqlı burasıdır ki, ailələrini dağıtmaq istəməyən Azərbaycan vətəndaşı olan kişilərin bəziləri hər üç aydan bir sərhəd keçib –qayıtmaq xərclərini qarşıya bilmədikləri, eyni zamanda, 5 illik qeydiyyat qeydiyyat üçün əvvəlcə hər il bir tələb olunan çoxsaylı sənədlər və xərclər, həmçinin buna sərf edilən əzab-əziyyəti göz önünə alaraq Gürcüstana köçüblər.
Qafqazın ən zəngin neft ölkəsi olmaqla öyündüyümüz Azərbaycandan köç edən vətəndaşlarımız, o cümlədən soydaşlarımız orada dilənçi gününə düşüblər. Bu azmış kimi, ən böyük problem hələ də qalır: bəs belə ailələrin Azərbaycan vətəndaşı olan övladlarının taleyi necə olacaq, onların övladları gələcəkdə hansı ölkədə hərbi xidmət keçəcək və s.
Bu və ya digər məsələlərlə bağlı Miqrasiya Xidmətinin adının çəkilməsini istəməyən əməkdaşlarının biri ilə söhbət etdik.
Həmin şəxsin Mia.az-a veridyi məlumata görə, hazırda Miqrasiya Xidmətində elə bir "sistem” davam edir ki, bundan sonra da qeyd edilən problem nəinki həll edilə, əksinə, ildən ilə daha da etiraz doğuracaq vəziyyət ala bilər. Çünki rəis Firudin Nəbiyev və komandası ya bilərəkdən, ya da savadsızlıqdan əngəllərin mövcud olmasına, hətta dərinləşməsinə çox maraqlıdır:
"Görün nə vəziyyət yaranıb ki, hətta ölkə rəhbərliyini də aldatmağa cəhd edirlər. Sizə adicə bir fakt deyim. Cənab prezident İlham Əliyev 20 gün əvvəl, daha dəqiqi, martın 16-da Dövlət Miqrasiya Xidmətinin əməkdaşlarının təltif edilməsi haqqında sərəncam imzalayıb.
Siz o sərəncamda adı olanlar haqda araşdırma aparsanız, görəcəksiz ki, bir-iki nəfər istisna olmaqla, Firudin Nəbiyev əslində, kimlərin adına təltif üçün təqdimat verib və bununla kimlərə hansı mesajları verib. Mən çox dərinə getmək istəmirəm. Sadəcə o təltif olunanlardan birinin adını çəkirəm.
Baxın, miqrasiya orqanlarında qulluqda fərqləndiyi və səmərəli fəaliyyət göstərdiyinə görə "Tərəqqi” medalı ilə təltif olunan Səfərov Rövşən Elxan oğlu kimdir? O, Miqrasiya xidməti rəisi Firudin Nəbiyevlə necə qohum olub? Axı, vaxtı ilə Dövlət Sərhəd Xidmətində işləmiş bu adama o yaşda birdən-birə niyə və kimə görə Miqrasiya Xidmətində ehtiyac yarandı? Və nəhayət, doğrudanmı o, səmərəli fəaliyyət göstərir?
Və yaxud "Miqrasiya orqanlarında qulluqda fərqlənməyə görə” medalı ilə təltif olunanlar - Abdullayev Ramil İntizam oğlu, Əhmədov Tural Rüstəm oğlu, Əliyev Pərviz Namiq oğlu, Hüseynova Əfsanə Məzahir qızı, İsayev Əli Arif oğlu, Kazumova Günay Şaiq qızı, Kərimova Zülfiyyə Ənvər qızı, Məmmədov Kənan Əsvər oğlu, Mirzəyev Elvin Əli oğlu, Mikayılov Bağır Mikayıl oğlu və Şirəliyev Kamil Güləli oğlu xidmətdə hansı vəzifələri tuturlar? Onların xidmətdə əsas işləri nədən ibarətdir?
Bu istiqamətdə kiçik araşdırma aparsanız, müvəqqəti və işçi qeydiyyatı, o cümlədən daimi yaşamaq üçün müraciət edən vətəndaşların nələr çəkdiklərinə də işıq sala bilərsiniz”.
Xidmətin əməkdaşı deyir ki, Firudin Nəbiyev bu sistemdə ötən il müavini təyin edilmiş Vəli Nağıyevə qədər ümumiyyətlə, heç kimi saymayıb: "O, indinin özündə də yalnız Vəli Nağıyevdən ehtiyat edir. Digər müavinləri isə ona zərrə qədər təsir göstərmək və ya təklif vermək səlahiyyətində deyil.
Yeri gəlmişkən, martın 16-dakı sərəncamla Dövlət Miqrasiya Xidməti rəisinin birinci müavini Vəli Nağıyevə II dərəcəli dövlət miqrasiya xidməti müşaviri ali xüsusi rütbəsi verilməsi də, buradakı Nəbiyev qruplaşmasını sanki yasa batırıb...”.
Müsahib deyir ki, hazırda Nəbiyev və onun qrupu elektron qeydiyyat və prezidentin fərmanıyla tətbiq edilən e-viza sistemi ilə şəffaf fəaliyyət göstərdikləri istiqamətində süni görüntü yaratmağa cəhd edirlər:
"Hələlik diqqətinizi elektron viza ilə bağlı məqsədli tətbiq edilən pöroblemə çəkim. Baxın, bu sistemlə Azərbaycana gəlmək istəyən turist və ya istənilən əcnəbi yalnız 1 aylıq viza ala bilər. Çox maraqlıdır, niyə bu sistemlə 2 və ya 3 aylıq viza almaq olmur?
Düzdür, Nəbiyev deyə bilər ki, bu, ondan aslı deyil. Yaxşı, o zaman ona sual verən lazımdır ki, bəs bu sistemlə bağlı layihəni, təklifləri, yekun müddəaları kim hazırlayıb, kim hökumətə təqdim edib? Və niyə bir aydan çox ölkədə qalmaq istəyən əcnəbidən əlavə sənədlər tələb olunur?
Özü də Azərbaycana gəldikdən sonra. Biz bu tip məhdudiyyətlərlə bura uzun müddətli turist axını cəlb edə bilərikmi?!
​Nəzərinizə çatdırım ki, başqa normal ölkələrdə bir aydan artıq viza almaq üçün bizdəki kimi tələblər yoxdur. Əgər 1 aylıq vizayla Azərbaycana gəlib, sonra bu vizanın müddətini uzatmaq istəsən, miqrasiya idarəsi o qədər sənəd istəyir ki, onları toplamaq qeyri-mümkündür. Məsələn, həkimdən elə sənəd verməlisən ki, obrazlı desək, saat kimi işləkliyin təsdiqlənməlidir. Yaxud, miqrasiya idarəsi az qala ulu babanın doğum şəhadətnaməsini tələb edir. Rüşvətsiz bu sənədləri burada almaq mümkündürmü? Və ya buna nə qədər zaman sərfiyatının getdiyi aydın deyilmi?”.
Məlumatlı şəxs müvəqqəti pulsuz qeydiyyatla bağlı problemə də toxunub:
"Ölkəmizə vizasız gələ və burada 90 gün yaşamaq istəyən insanlar üçün reklam çarxı hazırlayıblar. O çarxda deyilir ki, siz idarəyə bura gəlmədən evinizdən internet vasitəsi ilə qeydiyyata dura bilərsiz. Düzdür, bu, mümkündür. Amma məsələ budur ki, məsələn Rusiyanın Sibir vilayətindən və ya Gürcüstanın ucqar kəndindən gələn və heç bir internet anlayışı olmayan və ya hələ də bu sistemə güvənməyən əcnəbi neyləməlidir?
Əvvəla, onların heç çoxunun bu reklam çarxından xəbərləri yoxdur. İkincisi və ən əsası isə onlar ən etibarlı qeydiyyatı dədə-baba qaydasında, yəni birbaşa xidmətə gəlməklə, rəsmiləşdirmək və rahat olmaq istəyirlər. Bəs, Firudin Nəbiyev bu "paraqraf"la bağlı hansı şəraiti yaradıb?
Nzərinizə çatdırım ki, o, əvvəl Miqrasiya Xidmətinin Bakı Regional İdarəsin 8-10 nəfər işçi yığıb, bunu qeyri-rəsmi pullu xidmətə çevirdi. Beləliklə, müvəqqəti qeydiyyata düşən hər bir şəxsdən 3 manat "xidmət haqqı” toplanmağa başlanıldı. 5-6 ay əvvəl isə bu, idarə içində söz-söhbət yaratdı. Düzü, bunun pul üstə, yaxud qorxudan edildiyini bilmirəm. Ancaq fakt odur ki, həmin qeyri-leqal pulyığanlar idarənin binasından çıxarılıb, yaxınlıqdakı 9 mərtəbəli binanın birinci mərtəbəsinə yerləşdirildi. Və hazırda da bu pulyığma əməliyyatı idarə binasının 5 addımlığında eyni işçilər və sistemlə türklər demişkən, yenə də tıkır-tıkır işləməyə davam edir”.
Müsahibimizin ehtimalına görə, F.Nəbiyev ola bilər ki, nə vaxtsa buna görə cəzalandırıla biləcəyini də düşündüyü üçün önləyici tədbir də görüb:
​"O, dar ayaqda uşaqbaşı aldadırmış kimi, deyə bilər ki, bəs 3 manat "xidmət haqqı alan qrup” xidmətin işçiləri deyil. Hansısa özəl şirkətin işçiləridir və onlar sərbəst formada anket-sənəd doldura bilməyənlərə guya hüquqi yardım göstərir. Bəli, bu məsələdə düz deyir, o işçilər həqiqətən də Miqrasiya Xidmətinin rəsmi işçiləri deyil, lakin Firudun Nəbiyevin yaxın qohumunun təsis etdiyi MMC-inin işçiləridir. Dövlət Xidmətinə müraciət edənlərin hər biri də məqsdəli şəkildə onların üzərinə göndərilir. Ancaq ora daxil olanların hamısı həmin qızları Miqrasiya Xidmətinin rəsmi işçiləri olduğunu zənn edir. Və elə sanırlar ki, bu ödədikləri 3 manat da Miqrasiya Xidmətinin tətbiq etdiyi rəsmi xidmət haqqıdır. Axı, əcnəbi haradan bilir ki, kassa-fason yerdən cəzma-qaralı, istifadə edilmiş adı kiçik kağız parçasına vurulan möhürün özünün belə hüquqi əsası yoxdur?!
Və maraqlıdır ki, bütün bunları Miqrasiya Xidmətinin bütün rəhbər heyəti əla bilir, lakin göz yumurlar. İndi kim iddia edə bilər ki, Firudin Nəbiyevin burada hər hansı marağı yoxdur? Əksini iddia edirsə, o zaman miqrasiyaya 7-8 gənc və ya "Asan-xidmət”dəki kimi könüllülər cəlb edib, bunu pulsuz niyə həll etmirlər?”.
Xidmətin əməkdaşı iddia edir ki, çox rahatlıqla elə belə "xırda görünən proseslər"dən böyük pullar qazanırlar.
Sonda məlumatlı şəxs xidmət daxilində cərəyan edən çox maraqlı məlumatlardan da söz açıb. Bu və ya digər məqamlarla bağlı qarşı tərəfədən mövqe öyrənə bilmədik.
Qarşı tərəfin rəsmi mövqeyini də dinləməyə hazırıq.
