Son vaxtlar dönərdən zəhərlənmə hadisələrinin sayı artıb.

Cəld, ayaqüstü, qısa zamanda hazırlanan və nisbətən ucuz başa gələn dönərlə bağlı nəinki paytaxtda, eləcə də bölgələrdə vətəndaşlar problemlə üzləşirlər.

Qeyd edək ki, ötən il 9 nəfər Şəmkirdə dönərdən zəhərlənərək xəstəxanaya müraciət etmişdi. Bundan başqa toyuq dönərindən zəhərlənərək Zaqatala RMX-nın Təcili Yardım Şöbəsinə müraciət edənlərin sayı 40-a çatmışdı.

14-15 oktyabr 2024-cü il tarixlərində müxtəlif saatlarda ümumilikdə 21 nəfər olmaqla dönərdən zəhərlənmə şübhəsilə Tovuz Rayon Mərkəzi Xəstəxanasının Təcili yardım şöbəsinə hospitalizasiya olunmuşdu. Bugünlərdə isə Naxçıvanda dönərdən kütləvi zəhərlənmə olub.

Naxçıvan şəhəri H.Əliyev prospektində yerləşən “Kassap Döner” dönərxanasında 17 nəfərin qidadan zəhərlənməsi barədə Naxçıvan Yoluxucu Xəstəliklər Mərkəzi PHŞ-dən Naxçıvan Muxtar Respublikasının Qida Təhlükəsizliyi Agentliyinə məlumat daxil olub.

Məlumata əsasən, agentlik tərəfindən təxirəsalınmaz tədbirlər həyata keçirilib.

Belə ki, şübhəli məhsulların toxunulmazlığı təmin edilib, dönərxananın fəaliyyəti dayandırılıb.

Faktla bağlı araşdırma aparılır, nəticələri barədə ictimaiyyətə məlumat veriləcək.

Bu da bir faktdır ki, dönər bir çox dünya ölkələrində istehlak edilir. Bəs ölkəmizdə dönər istehlakı zamanı zəhərlənmələrin qarşısını necə almaq olar?

Məsələ ilə bağlı “Azad İstehlakcılar” İctimayi Birliyinin sədri Eyyub Hüseynov "Cebheinfo.az"-a bildirib ki, havanın isti keçməsi istənilən kimyəvi reaksiyanın güclənməsinə səbəb olan katalizatordur:

"Havaların isti keçəsi zamanı mallar da tez xarab olur, sıradan çıxır. Dönərxanalarda zəhərlənmələrin əsas səbəbini əsasən ətdə axtarırlar. Ətdən zəhərlənmələr çox nadir hallarda olur.

Ətdən zəhərlənmə halı olduqda pis qoxu verir, rəngi göyərir, ona heç heyvanlar da yaxın durmur. Ancaq dönərxanalarda yararlılıq müddəti 4 saat olan mayonezlər saxlanılır. Onlar müəyyən mənfi temperaturda saxlanılmalıdır. Bundan başqa bu gündən sabaha saxlanılan dönərlər də təhlükəli ola bilər.

Təəssüflər olsun ki, dönərxanalarda monitorinqlər aparanda bu kimi amillərə fikir verilmir. Dönərlər bu gündən sabaha qalmamalıdır. Sabaha qalan dönər soyuducuda saxlasan belə, o artıq çirklənmiş hesab olunur. Ona görə də elə etmək lazımdır ki, sabaha dönər qalmasın. Dönərdən zəhərlənmə halları illərdir ki, davam edir.

Bu gün AQTA işinin öhdəsindən gələ bilmir. Elə bir sənəd hazırlanmalıdır ki, bu dönərxanalarda olmalıdır. İstehlakçılar da bilməlidir ki, bu sənəd olan dönərxanadakı dönər təhlükəsizdir. Lakin hələ o sənəd də hazır deyil. Bişən dönərə o sənədin aid olub-olmadığı da başqa bir problemdir.

Ona görə mükəmməl üsul tapılmalıdır ki, dönərxanalarda zəhərlənmə halları minimuma ensin. Bu proses davam edəcək. Bunun da əsas səbəblərindən biri odur ki, AQTA-nın cəld yoxlama imkanları yoxdur.

Onlar planlı yoxlama həyata keçirirlər. Öncədən deyirlər ki, "sizi yoxlamağa gəlirik". Bu kimi hallara son qoyulmalıdır və cəld yoxlama, müdaxilə imkanlarına malik olmalıdırlar. Bununla yanaşı istehlakçılar da diqqətli olmalıdırlar".