Ölkəmizin səhiyyə sistemi bərbad vəziyyətdədir. Bu faktı heç kim inkar edə bilməz. Dövlət büdcəsindən hər il səhiyyə sektoruna ayrılan vəsaitlər artırılsa da, hələlik bu sahədə inkişafdan söhbət belə gedə bilməz. Bölgələrdə isə səhiyyə sistemi məhv olmaq həddinə gəlib çatıb. Bir sıra rayonlarda fəaliyyət göstərən tibb müəssisələrində ölkənin müvafiq qanunları yox, ayrı-ayrı fərdlərin, daha doğrusu baş həkimlərin tətbiq etdiyi qaydalar əsas rol oynayır. Səhiyyənin acınacaqlı halda olduğu rayonlarımızdan biri də Salyandır.
Nəzərinizə çatdırmaq istəyirik ki, bu vaxta kimi rayonun səhiyyə sistemində üzə çıxan neqativ məqamlarla bağlı saysız-hesabsız tənqidi məqalələr dərc olunub. Amma buna baxmayaraq, Salyan Rayon Mərkəzi Xəstəxanasının (RMX) rəhbərliyi, konkret olaraq Hüseynağa Həsənov fəaliyyətində dönüş yaratmaq istəmir ki, istəmir. Baş həkimin hansı səbəblərə görə vəzifəsinə yetəri qədər məsuliyyət göstərməməsi sirli məsələdir. Məlumat üçün bildirək ki, rayonda əhalinin sağlamlığını qorumaq məqsədi ilə 36 ambulator-poliklinika müəssisələri, 14 xəstəxana fəaliyyət göstərir. 1370 çarpayılıq bu tibb ocaqlarında 344 həkim və 917 orta tibb işçisi çalışır. Mərkəzi xəstəxananın yerləşdiyi bina 2008-ci ildə prezident İlham Əliyevin tapşırığı ilə əsaslı təmir olunub. 248 çarpayılıq olan xəstəxənada 9 şöbə-qəbul, terapiya, cərrahiyyə, yoluxucu xəstəliklər, anestezioloq-reanimasiya, kardioloji, doğum evi, mamalıq və oftolmaloji şöbə fəaliyyət göstərir. Adının çəkilməməsini xahiş edən sakinlərin redaksiyamıza verdiyi məlumata görə, Salyan Rayon Mərkəzi Xəstəxanasının baş həkimi Hüseynağa Həsənov vətəndaşları incitməklə məşğuldur: "Mərkəzi xəstəxananın binası müasir üslubda əsaslı təmir olunub. Bu hər birimizi qane edir. Bizi qane etməyən isə baş həkimin özbaşına əməlləridir. Çünki Hüseynağa Həsənov vətəndaşlara normal səviyyədə münasibət və tibbi xidmət göstərə bilmir. Bu səbəbdən bəzi sakinlər müayinə olunmaq üçün paytaxta üz tuturlar. Mərkəzi xəstəxanada çalışan həkimlərin əksəriyyəti xəstələrin maddi imkanı ilə maraqlanır. Əgər xəstənin cibi həkimi razı salırsa, ona ən yüksək səviyyədə xidmət göstərirlər. Yox əksinədirsə heç xəstənin üzünə belə baxmırlar. Xəstə yerdə can versə də, onunla maraqlanmırlar. Son üç il ərzində mərkəzi xəstəxana tamamilə acınacaqlı hala düşüb. Bunun tək səbəbkarı var, o da baş həkimdir. Xəstəxananın demək olar ki, bütün şöbələrində qanun pozuntuları mövcuddur. Həkim səhlənkarlığı doğum evində özünü daha qabarıq formada göstərir. Şöbənin bəzi həkimlərinin peşəkarlıq səviyyəsi çox aşağıdır və bu üzdən doğuş əməliyyatları zamanı müxtəlif fəsadlar üzə çıxır. Hüseynağa müəllim baş həkim vəzifəsinə təyin olunandan sonra bu sahədə vəziyyət daha da pisləşib. Doğum evində qeydə alınan xoşagəlməz halların bir çoxu şöbə müdiri və baş həkim tərəfindən ört-basdır edilir. Əhalinin salyanlı həkimlərə inamı qalmayıb". Sakinlər həmçinin bildirir ki, Salyan Mərkəzi Xəstəxanasında qeydiyyatda olan şəkərli və digər imtiyazlı xəstələr süni əngəllə qarşılaşırlar: "Bildiyiniz kimi, dövlət güzəştli kateqoriyadan olan insanların maddi durumunu nəzərə alaraq onlara pulsuz dərman preparatları, həmçinin tibbi ləvazimatlar ayırır. Təəssüflər olsun ki, şəkərli diabet, vərəmli xəstələr bu dərmanları ala bilmirlər. Daha doğrusu, həkimlər həmin xəstələrdən nəysə umurlar. Məsələn, şəkəri ölçən aparat diabetli xəstələrə nəyinsə qarşılığında verilir. Vətəndaşlar buna etirazlarını bildirəndə isə həkimlər deyir ki, gedin nə şikayətiniz varsa Hüseynağa Həsənova bildirin. Çünki bu şəraiti baş həkim yaradıb. Rayonun bütün səhiyyə müəssisələrində vəziyyət eynidir. Kənd yerlərində yaşayan insanlar artıq cana doyublar. Ona görə ki, kənd xəstəxanalarının çoxunda şərait yoxdur. Məsələn, Parçaxalac kənd Sahə Xəstəxanasında sakinlərə tələb olunan şəkildə tibbi xidmət göstərilmir. Pediatriya, terapiya və doğum şöbələrindən ibarət olan xəstəxanada 31 işçinin nəyə görə saxlandığı məlum deyil. Qış aylarında vəziyyət bir qədər də çətinləşir. Təcili tibb yardım maşınları istifadəyə yararsız vəziyyətdədir. Bu üzdən qış fəslində təcili tibbi yardım maşınları çağırılan ünvana vaxtında çata bilmirlər. Salyanın səhiyyə sistemində mövcud olan problemlər saymaqla bitib-tükənməz. Nazir Oqtay Şirəliyev vəziyyətə müdaxilə etməsə, baş həkimi cəzalandırmasa, mərkəzi xəstəxana, ümumilikdə rayonun səhiyyə sistemi bundan da ağır duruma düşə bilər". İrəli sürülən ittihamları araşdırmaq üçün qarşı tərəflə əlaqə saxlamaq istəsək də, cəhdlərimiz uğursuz alındı. Buna rəğmən, baş həkimin də münasibətini dərc etməyə hazırıq. Yəqin ki, Səhiyyə Nazirliyinin rəhbərliyi yaxın vaxtlarda Salyan RMX-nin fəaliyyətinə nəzarəti gücləndirəcək və baş həkimin barəsində lazımi tədbirlər görəcək. \\ gundelik-baku.com \\
