Neçə vaxtdır ölkə mətbuatı “Mars-M” şirkətinin Bakının Səməd Vurğun küçəsi, 120 ünvanında inşa etdiyi “Yasmin” biznes mərkəzi haqqında müxtəlif səpkili məlumatlar yayır. Yazılanların əksəriyyəti Azərbaycanı illərdi ağuşuna alan və ictimaiyyət arasında hədsiz narahatlıq yaradan ciddi bir məsələ -- pis niyyətli sahibkarın vicdan çərçivəsinə sığmayan qanunsuz əməlləri barəsindədir. "Yasmin"in direktoru Mərhəmət Bəşirovun burada törətdiyi qanunsuzluqlar da, paytaxtın ayrı-ayrı ərazilərində törədilənlərlə eyniyyət təşkil edir. Bir qrup iş adamının araz.az-ın redaksiyasına ünvanladığı müraciət də bu barədədir. Müəlliflər şikayət xarakterli bu müraciətlərində "Mars-M" və "Xalqbank" rəhbərlərinin onların əmlak hüquqlarını kobud şəkildə pozduqlarını xüsusi vurğulayırlar. Qeyd edirlər ki, onlar “Yasmin” biznes mərkəzində sahibkarlıq fəaliyyəti aparmaq məqsədi ilə qeyri-yaşayış sahələri alıblar. Bunun üçün külli miqdarda pul ödəyiblər. Buna baxmayaraq, aldıqları yeni tikilini "Xalqbank" əllərindən almaqda israrlıdır. Bu qanunsuzluqların acı nəticəsidir ki, onların da ümidləri, gələcəyə dair planları tamamilə puça çıxıb. Konkret desək, bir ətək pul töküb, bu ticarət mərkəzində obyekt alanlara ancaq sonradan məlum olub ki, bu şirkətin sahibi də, onların adına rəsmiləşdirilən obyektləri həmin banka uduzub. Yəni, 22 nəfər iş adamının üstündə 17 milyon dollarlıq "qumar" oynanılıb.
Aldadılan bu iş adamlarının sözlərinə görə, hələ ticarət mərkəzinin istismarından öncə, yəni, Fövqəladə Hallar Naziriliyi binanın təhvil-təslim aktını verməmişdən əvvəl “Mars-M” şirkətinin direktoru Mərhəmət Bəşirov onlarla alqı-satqı müqavilələri bağlayıb və bunun əsasında həmin qeyri-yaşayış sahələrini onlara satıb. Bu müqavilələr notarial qaydada təsdiqini tapıb da. Hətta alıcılara bu barədə maliyyə arayışları da verilib. Lakin...
Əlləri yerdən-göydən üzülən həmin iş adamlarının, son ümid yeri olaraq, ölkə başçısına ünvanladıqları müraciətlərində də, Mərhəmət Bəşirovun qanunsuz əməlləri barədə ətraflı məlumat verilir. Afət Ağazadənin, Sahib Quliyevin, Azər Mahmudovun, Akif Mahmudovun, Fuad Ramazanovun, Natəvan Bağırovanın, Əliağa Məmmədovun, Anar Hüseynovun, Zülfüqar Kazımovun, Yalçın Məlikovun, Adil Məmmədovun, Ədalət Zamanovun, Vüqar Həsənovun, Elçin Əliyevin, Qalıb Məmmədovun imzaladıları həmin açıq məktubda, müraciət müəllifləri “Mars-M” firmasının və “Xalq Bank” ASC-nin fırıldağının qurbanı olduqlarını deyirlər. Bildirirlər ki, onlar 2009-cu ildə “Mars-M” şirkətinin Bakının Səməd Vurğun küçəsi, 120 ünvanında inşa etdiyi “Yasmin” biznes mərkəzində sahibkarlıq fəaliyyəti aparmaq məqsədi ilə qeyri-yaşayış sahələri alıblar. Sonra onlara məlum olub ki, “Mars-M” şirkətinin “Xalq Bank”a borcu olduğu üçün, bank bunun qarşılığında sahibkarların obyektlərinə “əl qoyub”. Maraqlı olsun deyə, həmin məktubun tam mətnini oxucularımıza təqdim edirik:
“Cənab Prezident!
Sizə hazırkı müraciətimiz bizə qarşı edilmiş qanunsuzluqla bağlıdır. Bu qanunsuzluq nəticəsində həm əmlakımızdan məhrum olmuşuq, həm də əmlakımıza xərclədiyimiz pullardan. Ümid edirik ki, bizə qarşı edilmiş qanunsuzluğun araşdırılmasını nəzarətə götürərək, onlarla vətəndaşın haqqının pozulmasına, əmlakının qanunsuz ələ keçirilməsinə imkan verməyəcəksiniz.
Bizi bizləşdirən hal ondan ibarətdir ki, hər birimiz “Mars-M” firmasından (VÖEN 1500418111) həmin firmanın Bakı şəhəri, Nərimanov rayonu, S.Vurğun küçəsi, 120 ünvanında inşa etdiyi zirzəmi və 5 mərtəbədən ibarət qeyri-yaşayış binasından, daha çox 2009-cu il tarixdə olmaqla, 2009-2013-cü illərdə müxtəlif ölçülü qeyri-yaşayış sahələrinin milyonlarla qiymətləndirilən dəyərini tam ödəməklə almışıq. Bir çoxumuz həmin qeyri-yaşayış sahələrini, külli miqdarda pul xərcləyərək təmir etdirmişik və öz fəaliyyətimizlə bağlı təyinatına uyğun istifadə etmişik. Lakin, təəssüf ki, “Mars-M” firmasının və “Xalq Bank” ASC-nin bəzi vəzifəli şəxslərinin çirkin niyyətlə qurduqları və icra etdikləri plan nəticəsində hazırda əmlakımızdan məhrum olmuşuq. Əmlakı faktiki olaraq ələ keçirmiş “Xalq Bank” ASC binaya mühafizə yerləşdirməklə, bizim sahələrimizə girişimizə, qanuni F97748EF BD18 4F0B 8C7E C3CFF5522C9Fəsaslarla aldığımız əmlakımızdan təyinatına uyğun istifadə etməyimizə mane olmaqla yanaşı, illər əvvəl “Mars-M” firması ilə qurduğu kredit-ipoteka oyununun son mərhələsi olan məhkəmə mərhələsində əmlakımızı ələ keçirməsini leqallaşdırmaqla məşğuldur.
Onlarla vətəndaşın milyonlarla dəyərində olan əmlakından məhrum olmasına görə isə, yalnız bir nəfər – “Mars-M” firmasının təsisçisi Mərhəmət Bəşirov cinayət məsuliyyətinə cəlb edilməklə, guya qanunsuzluğa hüquqi qiymət verildi və qanunsuzluğu etmiş şəxs məsuliyyətə cəlb olundu görüntüsü yaradıldı. Bu da “Xalq Bank” ASC-nin qurduğu oyunun bir hissəsidir: cinayət işi məhz onun müraciəti əsasında başlanılıb və qanunsuzluğun bir tərəfi olmasına baxmayaraq, özünü zərərçəkmiş şəxs (?!) qismində tanıda bilib. Əslində, həm qanunsuzluğa düzgün hüquqi qiymət verilməyib, həm də bu qanunsuzluğu etmiş “Mars-M” firmasının digər vəzifəli şəxsləri, o cümlədən “Xalq Bank” ASC-nin aidiyyəti vəzifəli şəxsləri məsuliyyətdən tamamilə kənarda qalıblar.
Cənab Prezident!
Biz vicdanlı, qanunlara riayət edən, halallıqla öz işini icra edən, fəaliyyəti ilə cəmiyyətimizə, dövlətimizə faydalı olmağa çalışan sadə vətəndaşlarıq. İllərlə qazandıqlarımızla qeyri-yaşayış sahəsi alaraq, böyük ümidlərlə ailəmizi, cəmiyyətimizi, dövlətimizi daha da inkişaf etdirən yeni planlar qurmuşduq. Lakin bir qrup pis niyyətli insanın vicdansız, qanunsuz əməli nəticəsində bu ümidlərimiz, gələcəyə dair olan planlarımız tamamilə dağıldı. Onlarla insan və bu insanlarla bağlı olan yüzlərlə ətrafı maddi zərərə və mənəvi əzaba düçar oldu. Ancaq biz inanırıq ki, Prezidentimiz və Mehriban xanımımız bizi həmin vicdansızların vicdanına buraxmayacaq, vətəndaşının haqqını ona geri qaytaracaq. Biz buna əminik!
Göstərilənləri nəzərə alaraq, qeyd olunan məsələnin araşdırılmasını təcili olaraq nəzarətə götürməyinizi, əmlaklarımızın bizə geri qaytarılmasında köməklik etməyinizi və bu məsələ ilə əlaqədar bizi qəbul etməyinizi xahiş edirik”.
...Keçmişində qaranlıq məqamları kifayət qədər olan "Yasmin"in "baş qumarbazı"nın qanun çərçivəsinə sığmayan hərəkətləri göz önündədir. Bəs, əslində onun özü kimdir? Haqqında nə bilirik?
Öncə onu qeyd etmək vacibdir ki, bir vaxtlar Texniki Universitetin prorektoru vəzifəsində işləmiş Bəşir Bəşirovun oğlu olan Mərhəmət Bəşirovun adı 1993-cü ildən üzübəri törətdiyi müxtəlif cinayət işlərində hallanıb. Əslən Lerik rayonundan olan bu şirkət sahibinin tükürpədici hansı qanunsuz işlərə əl atmasını bir çoxları, hətta ölkə mətbuatı da yaxşı bilir. Sübutlar və tutarlı faktlar əsasında qələmə alınmış mətbu materiallardan məlum olur ki, Mərhəmət Bəşirov Təhsil Nazirliyinin sabiq şöbə müdiri Şahrza Əliyevlə iş ortağı olub. Şəriki kimi, nazirliyin iqtisadiyyat şöbəsinin müdirinin də, vəzifə tutduğu 20 ilə yaxın müddətdə adı yaxşı yöndən hallanmayıb. Məlumatlara görə, vaxtilə Şahrza Əliyev külli miqdarda büdcə vəsaitini öz şəxsi maraqları naminə istifadə edib. Bunun nəticəsində də, Mərhəmət Bəşirovla birlikdə böyük biznes imperiyası yaratmağa nail olub. Bir daha xatırladırıq ki, onların firması paytaxtda hündürmərtəbəli binaların tikintisi ilə məşğul olması ilə ad çıxarıb.
Apardığımız araşdırmalar zamanı öyrəndik ki, Mərhəmət Bəşirov haqqında 1993-cü ildə də külli miqdarda mənimsəmə faktına görə cinayət işi də qaldırılıb. Cinayət işinin qaldırılmasına səbəb isə, həmin illərdə onun “ANAM” banka rəhbərlik etməsi və başqa bir məsələ olub. Mərhəmət Bəşirov “ANAM” banka rəhbərlik etdiyi dövrlərdə vəzifəli şəxslərdən biri ilə qohum olub. Hətta həmin məşhur ailə ilə birlikdə fabrik inşa etmək istəyən Bəşirovun sonradan heç də yaxşı xasiyyətə malik olmadığı üzə çıxıb. Hətta onun əliəyrilik edərək, daha çox pul qazanmaq üçün hətta qohumlarını belə güdaza verəcəyi məlum olub və onların qohumluq əlaqələri pozulub. Bunun ardından müflis olan Mərhəmət Bəşirov Azərbaycandan qaçaraq, Ukraynaya sığınıb. Bir müddət Ukraynada başını saxlamağa çalışan Mərhəmət Bəşirov Azərbaycan hüquq-mühafizə orqanları tərəfindən axtarışa verilib. Onun külli miqdarda pulu mənimsədiyi aşkarlandığı üçün, həbsi barədə qərar çıxarılıb. Lakin Azərbaycanın nüfuzlu vəzifə sahibləri ilə çox yaxşı münasibətləri olan iş adamı onların yardımı ilə bir müddət həbsdən yaxasını qurtara bilib. Əldə etdiyimiz məlumatlara görə, onların sayəsində həbsdən yaxa qurtarmağı bacaran Mərhəmət Bəşirov tezliklə Ukraynanın ayrı-ayrı şəhərlərində çirkli biznes əməllərini davam etdirib. Məqsədi yalnız özünün çoxdankı bank arzusunu həyata keçirmək olub. 2003-cü ildən sonra isə, tikintiyə başlayıb. Bunun üçün ayrı-ayrı banklardan külli miqdarda kreditlər əldə edə bilib. Lakin 2008-ci ildə naməlum səbəblərdən Mərhəmət Bəşirov işini bina ilə birlikdə yarımçıq qoyaraq, Bakıya üz tutub. Xaricdəki yarımçıq tikililərinə isə, həbs qoyulub.
Azərbaycana qayıdan Mərhəmət Bəşirov yaxın dostu Şahrza Əliyevlə əl-ələ verərək, şəhərin ayrı-ayrı nöqtələrində iri ticarət obyektləri tikdirməyə başlayıblar. Hazırda “Yasmin” adı altında fəaliyyət göstərən ticarət obyektlərinin bir çoxu adıçəkilən şəxslərə məxsusdur. Deyilənlərə görə, ticarət mərkəzinin tikilməsi şəriklərə 40 milyon manata başa gəlib. Mərhəmət Bəşirovun MTK-ları tərəfindən tikilən belə obyektlərə sərf olunan pulların necə əldə edildiyi də dəhşətlidir.
Ukraynada məhkumluq həyatı yaşamış keçmiş bank müdiri iş ortağının xərcləri sayəsində bu səviyyəyə çatıb. Onların paytaxtda bir neçə tikinti şirkətləri də mövcuddur. Şahrza Əliyev və Mərhəmət Bəşirov sahib olduqları ticarət obyektlərindən, o cümlədən fahişə biznesindən il ərzində külli miqdarda gəlir əldə ediblər. Çirkin işlərin daha çox qeydə alındığı və milli mentalitetimizi məhvə aparan bu əxlaqsızlıq yuvasının birinin Azərbaycan Tibb Universitetinin bir neçə metrliyində yerləşməsi, baş verən əxlaqsızlıqların tələbələrin gözü qarşısında baş verməsi, azyaşlı qızların cinsi istismara məruz qoyulması, yetkinlik yaşına çatmayan bu qızların intim xidmətlər göstərməsi, üstəlik
qumarxana kimi tanınan bu hoteldə cərəyan edən digər qanun pozuntularının getdikcə çoxalması, imkanlı şəxslərin burada qumar oynamalarının səngimək bilmədən saylarının günbəgün artması dəhşətdir. Belə neqativ hadisələrə və burada açıq-aşkar yaşanan qadın ticarətinə aidiyyatı hüquq-mühafizə orqanları tərəfindən vaxtında reaksiya verilməməsinin səbəbi isə bambaşqa olub. Daha doğrusu, bir vaxtlar əlinin altında qisasçı dəstə saxlayan "Moren" ləqəbli Mərhəmət Bəşirovun bacısının keçmiş həyat yoldaşı, "Akula" ləqəbli Akif Mustafayevlə işbirliyində olması burada çox azyaşlı qızın həyatını məhv etməyə rəvac verib.
Adı sabiq milli təhlükəsizlik naziri Eldar Mahmudovla işbirliyində hallanan və çoxdandır qaçıb xaricə sığınan Akif Mustafayevin Mərhəmət Bəşirovla birlikdə törətdikləri qanunsuzluqların isə, sayı-hesabı yoxdur.
Mərhəmət Bəşirovun sahibi olduğu şirkətlərin dövlətə böyük miqdarda vergi borcunun olması barədə də əlimizdə təkzibolunmaz məlumatlar var. Lakin, o, buna da reaksiya verməyib. Onun bu arxayınçılığı da, Akif Mustafayevə güvənməsindən irəli gəlib və buna görə də, həmişə dövlətə vergi verməkdən qaçıb.
2016-cı ildə Mərhəmət Bəşirovun ölkədən çıxışının müvəqqəti məhdudlaşdırılması barədə də əlimizdə tutarlı faktlar var. Buna “Asnaf Sənaye Şirkəti” MMC tərəfindən borclu qismində ona qarşı iddia qaldırılması səbəb olub. Nərimanov rayon Məhkəməsi “Asnaf Sənaye Şirkəti” MMC-in iddiasını təmin edib. Qərarla razılaşmayan Mərhəmət Bəşirov apellyasiya şikayəti versə də, şikayəti təmin edilməyib.
“Mars-M” firmasının rəhbəri sonuncu dəfə Azərbaycan Respublikası Cinayət Məcəlləsinin 195.1-ci (Qanunsuz kredit alma və ya kreditdən təyinatı üzrə istifadə etməmə) maddəsi üzrə ittiham edilib. İş üzrə "Yasmin" ticarət mərkəzində özlərinə obyekt alan həmin 22 nəfər zərərçəkən şəxs qismində tanınıb. Cinayət işinin ibtidai istintaqı başa çatdıqdan sonra, işinin materialları baxılması üçün Yasamal rayon Məhkəməsinə göndərilib və hakim Hüseyn Səfərovun icraatına verilib. Törətdiyi külli miqdarda mənimsəmə fakına görə, o, hal-hazırda həbsdədir.
Araşdırmalarımız davam edir.
Yazının davamı olacaq.
