ABŞ Prezidenti Donald Tramp mayın 25-də Rusiyanın Ukrayna şəhərlərinə dağıdıcı hücumundan sonra rusiyalı həmkarı Vladimir Putinin “tamamilə dəli olduğunu” bəyan edərək, Kreml sahibinə yönəlik nadir və kəskin tənqidi ilə ictimaiyyəti təəccübləndirib.

Teleqraf “The New York Times”a istinadla xəbər verir ki, Tramp sərt sözlərinə baxmayaraq, Kremlə qarşı yeni sanksiyaları dəstəkləmək və ya Ukraynaya əlavə yardım göstərmək istəmir.

Donald Tramp dünən jurnalistlərə açıqlamasında Putinlə bağlı nə baş verdiyini bilmədiyini söyləsə də, bir neçə saat sonra “Truth Social”da yazıb: “O, tamamilə dəli olub”.

Bəyanat ötən həftəsonu Rusiya Ukrayna şəhərlərinə irimiqyaslı bombardman həyata keçirdikdən, yaşayış məntəqələrini, universitet yataqxanalarını və digər mülki hədəfləri vurduqdan sonra verilib. Amma Tramp yeni zorakılıq dalğasını Rusiyaya qarşı yeni sanksiyaların tətbiqi və Ukraynaya hərbi yardımı artıracağı ilə əlaqələndirməyib.

Sözlərlə hərəkətlər arasındakı bu ziddiyyət analitiklərin tənqid obyektinə çevrilib.

Analitik Yan Bremmer nəşrə deyib: “Rusiya atəşkəsdən imtina etdi, amma Tramp getdikcə geri çəkilir. Ukraynaya dəstək amerikalılar üçün əhəmiyyətini itirməkdə davam edir”.

Onun proqnozlarına görə, bu, Rusiyadan yeni təcavüz dalğasına səbəb ola bilər.

Ötən gün Tramp həmçinin Putinlə sülh danışıqlarına doğru bir addım kimi “möhtəşəm telefon danışığı” apardığını bildirib. Amma sonradan məsuliyyəti yenidən Ukrayna Prezidenti Volodimir Zelenskinin üzərinə atıb və deyib ki, Kiyev və Moskva oturub razılığa gəlməlidir. Həmçinin ABŞ Prezidenti vropa ölkələrinin liderlərinə Putinə sərt təzyiq göstərmək fikrində olmadığını açıq şəkildə deyib.

Danışıqlarla tanış olan Qərb rəsmilərindən biri söyləyib: “Tramp mahiyyətcə geri çəkildiyini bəyan edib”.