Bu həftə Ukraynanın Müdafiəsi üzrə Təmas Qrupunun növbəti iclası - Ramşteyn formatı keçiriləcək. Bu, 25-ci, lakin liderlər səviyyəsində ilk görüş olacaq. Ukrayna Gələcək İnstitutunun hərbi eksperti, Ukrayna Ali Radasının Milli Təhlükəsizlik və Müdafiə Komitəsinin məsləhətçisi İvan Stupak UNİAN-a yazdığı analitik məqalədə görüşlə bağlı proqnozlarını bölüşüb.
Onun sözlərinə görə, Ramşteyn formatında daha çox siyasi bəyanatlar verilir: “Təbii ki, mən istərdim, görüşün nəticələrinə əsasən, mərmi, sursat, texnikanın daha çox istehsalı və Ukraynaya çatdırılması qərarı verilsin. Ancaq adətən Ramşteyn daha çox siyasi bəyanatlarla yadda qalır. Belə görüşlərdə keçmişdə görülən işlər və gələcəkdə atılacaq addımlar müzakirə olunur. Məsələn, Ukrayna üçün nə etdilər, nə etmədilər, qərarlar harada işləmir, harada problemlər var, onların olmaması üçün nə etmək lazımdır və s. müzakirə olunur. Güman edirəm ki, bu dəfə hipotetik sülh danışıqları, müharibə başa çatdıqdan sonra dünyanın hipotetik quruluşu ilə bağlı müəyyən məsələlər gündəmdə ola bilər. Yeni dünyanın necə görünəcəyi, Ukraynanın orada hansı yeri tutacağı və s. Amma biz konkret qərarlar istəyirik”.
“Düşünürəm ki, Ukraynanın “sülh planı” müzakirə ediləcək. Baxmayaraq ki, Ukrayna Prezidenti Volodimir Zelenski Ağ Evdə bu planı açıqladıqdan sonra bütün müttəfiqlər onun mahiyyətindən məlumatlıdırlar. Ola bilsin ki, onlar planla bağlı fikirlərini ifadə edəcəklər: nəyi bəyənirlər, nəyi bəyənmirlər”, - deyə ekspert vurğulayıb.
“Qərb tərəfdaşlarının Rusiyanın dərinliklərinə uzaqmənzilli silahlarla zərbə endirmək icazəsi barədə qərar üzərində ayrıca dayanmaq istərdim. Əslində Ramşteyndə bu mövzunun müzakirəsini NATO-nun baş katibi Mark Rutte Kiyevə gələndə açıqlamışdı. Əminəm ki, görüşdə onların effektivliyi və nəticələri müzakirə olunacaq”, - deyə Stupak əlavə edib.
Ekspert bildirib ki, Ukraynaya Rusiyanın dərinliklərinə zərbəyə icazənin verilməsinin əleyhinə olmayan ölkələr var: “Məsələn, Hollandiya. Amma ABŞ-ın, Fransanın, Almaniyanın, İngiltərənin bizə təqdim etdiyi xüsusi silahlar yoxdur. Əslində başqa ölkələr də Rusiyanın dərinliklərinin vurulmasına icazə barədə Ağ Evin nə deyəcəyini gözləyir. Çünki bu qərar ABŞ-dan asılıdır. ABŞ Prezidenti isə Ukraynanın ona belə icazə vermək üçün tutarlı arqumentlər irəli sürmədiyini bəyan etdikdən sonra Kiyev Vaşinqtona Rusiyada vura biləcəyi obyektlərin konkret siyahısını göstərib. Bu, danışıqları irəli apardı ki, fikrimcə, bizim müttəfiqlərimizi razı salmaq şansımız var”.
“Beləliklə, Ramşteyn formatında keçirilən görüşdə liderlər ünsiyyət quracaqlar, lakin hər hansı kardinal qərarların açıqlanacağını düşünmək olmaz”, - deyə Stupak fikrini tamamlayıb.
AYNA.az
