Lerik rayon sakini, sabiq dövlət qulluqçusu, Azərbaycan Jurnalistlər Birliyinin üzvü İlham İbadov tərəfindən “Hürriyyət”in redaksiyasına növbəti şikayət məktubu daxil olub. Qəzetimiz vasitəsilə Lerik rayonundan deputat seçilən İqbal Məmmədova açıq məktub ünvanlayan müəllifin yazısını olduğu kimi dərc edirik:
Sənin Milli Məclisə deputat seçilməyin və hansı yollarla buna nail olmağın bir lerikli olaraq mənə bəllidir. Deputat seçkisindən sonra sən xalqdan üz çevirdin. Əgər yadındadırsa, Osyodərə ərazisinə göndərdiyin maşınları geri qaytaranda mən ayağa qalxdım. Camaatın qarşısına çıxdım. Onda dedim ki, leriklidir, maşın göndərib, texnika göndərib, sağ olsun, qoy camaat üçün abadlıq işləri görülsün. Neçəsi ilə qanlı-bıçaq oldum. Lakin yolumdan dönmədim. Axı onda nə biləydim ki, sən deputat seçiləndən sonra elə mənim də başıma olmayan oyunları açacaqsan?!
Səndən əvvəlki deputat Miri Qənbərov həmişə kütlə ilə sıx və yaxından əlaqə saxlayırdı. Tez-tez camaatla görüşər, onların dərdinə qalardı. Sən isə deputat mandatı alan aydan məni çörəyə məhtac qoymusan. Evimdə 2-ci qrup əlil və onkoloji xəstə var. Onun dava-dərmanını zorla ödəyirəm. Özü də indiki çətin zamanda. Hələlik bir lerikli olaraq açmadığım məsələlər çoxdur. Lakin “Relax” İstirahət Mərkəzində törətdiyiniz qanlı olaylar təkcə leriklilərə zərbə deyil, dövlətə və dövlətçiliyə zərbədir.
Yəqin yadındadır, sən ikinci dəfə deputat mandatı uğurunda mübarizə apararkən mənim doğulub boya-başa çatdığım kənddə oldun. Guya əhali ilə görüşə gəlmişdin. Orada Züvüç kəndinin sakini Xanəli Əmrəliyevin el içində sənə dediklərini mətbuat etikasına görə yazıya gətirmək istəmirəm. Ancaq sən onu yaxşı xatırlayırsan. O, sənə nələr dedi, sən nələr etdin...
Xanəli Əmrəliyev rayonda hüquq-mühafizə orqanlarına həftələrlə ayaq döydü. Nüfuzlu bir şəxsin zəngindən sonra bu hədə-qorxulara son qoyuldu. Sən o qədər həddini aşmışdın ki, lerikli olan bir şəxsi də “Relax” İstirahət Mərkəzinə boş baxmaq üçün 5 manat rüsum aldırırdın. Bu, nə Bəşər qanunlarına, nə də Müstəqil Azərbaycan Respublikasının qanunlarına sığan bir olay deyildi. Sən isə qorxmadan, çəkinmədən hər şeyə gedirdin. Bir qədər fikrimizi dəqiqləşdirsək, Rövnəq Abdullayevə bel bağlamışdın.
Deputat seçildikdən sonra yerli-yersiz informasiyalar yayılırdı. Bu informasiyalar kim və kim tərəfindən yayılırdısa, onlar ölkə Prezidenti cənab İlham Əliyevin siyasi kursuna zərbə vururdular. Rayonda şayələr dolanırdı ki, guya Lerikin icra başçısı Azərbaycan Dövlət Neft Şirkətinin Birinci vitse-prezidenti Xoşbəxt Yusifzadənin kürəkənidir. Bu informasiyalar bir yana, mən Xoşbəxt Yusifzadəni yalnız qiyabi tanıyıram. Yəni mətbuat səhifələrindən. Deməkdə məqsədim odur ki, informasiyaların rayonda bu şəkildə yayılması əhalini xaos və anarxiyaya aparıb çıxarırdı. Hamı qorxu altında qalmışdı. Ancaq bu qorxu uzun çəkə bilməzdi. Leriklilərin əli yuxarılara çata bilməsə də, Ulu Tanrı tədbir gördü. “Relax” İstirahət Mərkəzində sənin oğlun və qardaşın oğlu olmaqla 6 qohumun həbs edildi.
Sən əvvəlcə bu faktı da pərdələməyə çalışdınız. “Yeni Müsavat” qəzetinin 20 avqust 2019-cu il tarixində qeyd olunur ki, deputat İqbal Məmmədov yalan danışmaqla oğlunu həbsdən kənar saxlamaq istəyir. Üstəlik, deputatın obyektində vergilərin dövlət büdcəsindən yayınması da faktlarla ortaya qoyulub. Məsələnin daha ciddi şəkildə araşdırılmasının İqbal Məmmədovun deputat mandatı ilə vaxtından əvvəl vidalaşması ilə nəticələnə biləcəyi ehtimalı da vardır. Həmçinin, qəzet yazır: “Bizə çatan məlumata görə, iqtidar deputat İqbal Məmmədovun ailəsinin “dövlətə meydan oxumaq” kimi qavranılan davranışına hakimiyyət tərəfindən çox sərt reaksiya veriləcək”.
Lerik rayonunda yerləşən “Relax” İstirahət Mərkəzində Vergilər Nazirliyinin əməkdaşları döyüldü. İstirahət Mərkəzinə yoxlamaya göndərilən vergi işçiləri əraziyə buraxılmadı. Hətta iş o yerə çatmışdı ki, köməyə çağırılan polis işçiləri də “Relax” İstirahət Mərkəzinə buraxılmadı. Vergi işçilərinə kütləvi şəkildə güc tətbiq olundu. Nəticədə sənin oğlun və qardaşın oğlu başda olmaqla, daha 4 nəfər haqqında cinayət işi başlandı.
Yuxarıda qeyd etdik ki, köməyə çağırılan polis işçiləri də istirahət mərkəzinə buraxılmadı. Bu məsələnin də kökü var. Ona görə ki, Lerik rayon Polis Şöbəsinin sabiq rəisi işləyən H.Məlikov soyadlı birisi sizə daha çox yaxın idi. Hətta Lerik rayon İcra Hakimiyyətinə məxsus olan ikimərtəbəli hoteli də ona peşkəş etmişdiniz. Həmin hotel hal-hazırda satışa qoyulub və Lerik camaatında o güc yoxdur ki, o hoteli özü üçün ala bilsin. 120 min ABŞ dolları hansı binəva leriklidə ola bilər? Bax, budur sənin etdiklərin!
Mən bir lerikli olaraq “Relax” İstirahət Mərkəzinə heç vaxt bir qonaq da apara bilməmişdim. Ona görə ki, ona maddi imkanlarım çatmırdı. Lakin sən Lerikin qanuni əmlakı olan 14 hektardan çox meşə sahəsini ələ keçirtmişdin. Orada 142 nömrədən ibarət istirahət otaqları var idi. O otaqlarda yalnız leriklilərin haqq deyən dillərini kəsənlər, haqqı görən gözlərini isti küllə qorlayanlar yatırdı. Onların çoxusu da havayı qalırdı. Çünki onlar ölkə paytaxtında sənə daha çox lazımlı adamlar idilər.
Bu yaxınlarda mən ölkə mətbuatında “Relax” İstirahət Mərkəzi ilə bağlı çap olmuş yazıları oxuyanda xəcalət hissi keçirirdim. Necə də keçirməyim?! Axı, sən də leriklisən! Sənin də şəxsiyyət vəsiqəndə Lerik vətəndaşı olmağın qeyd olunub. Sən həcc ziyarətinə getmisən. O adı qorumalı idin. O adın uğurunda son damla qanınadək mübarizə aparmalı idin. Bu, sənin bir müsəlman olaraq borcun idi. Sən isə baş verən bu boyda olaylardan sonra mandatını təhvil vermirsən. Heç olmazsa, deputat həmkarın Rafael Cəbrayılovdan ibrət dərsi götür. Bir ziyalı olaraq hesab edirəm ki, bu yolu tutsan, bu addımı atsan, sənin üçün daha sərfəli olar.
Yadındadırsa, Milli Məclisin şöbə müdirinin tapşırığı ilə sənin qəbulunda oldum. “Kaspi Yıldız” şirkətində. Orada səninlə söhbət etdik. Ailə vəziyyətimi sənə danışdım. Mən bilirdim ki, bu görüşü təşkil etdirən İbrahim Yusifzadədir. O görüşdə də bol-bol vədlər verdin. Nəticə isə olmadı. Sən ziyalılara lerikli olaraq diqqət və qayğı ilə yanaşmalı idin. Bu, mənim qarşılaşdığım olaydı. Bəlkə çoxları da mənim günümə düşüb, daha böyük əziyyətlərlə qarşılaşıb.
Və sonda... Ölkə ictimaiyyəti bilir ki, “Relax” İstirahət Mərkəzi sənin obyektindir. Bu biznes obyektində leriklilərə şərəf gətirməli idin. Hələlik uzun-uzadı söhbət açmaq fikrim yoxdur. Hesab edirəm ki, tezliklə həmkarın Rafael Cəbrayılovun qərarına sən də qoşulacaqsan. Bu variant daha məqbuldur, daha sərfəlidir”.
Redaksiyadan: Qarşı tərəfin mövqeyini dərc etməyə hazırıq.
