Ağdaş rayonu, Üzeyir Hacıbəyov küçəsi 17 sakini Məlikov Qorxmaz Ağasaleh oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, Daşınmaz Əmlakın Kadastrı və Reyestri Publik Hüquqi Şəxsin 17 saylı Yevlax Ərazi İdarəsinin Ağdaş şöbəsinin rəisi Mahir Əliyev, Ağdaş Notariusu və Ağdaş Rayon Bələdiyyəsi tərəfindən haqsızlığa məruz qalıb:
“Mən, Məlikov Qorxmaz Ağasaleh oğlu, yazaraq xahiş edirəm ki, müraciətimi dərc edəsiniz.
Qeyd edim ki, Daşınmaz Əmlakın Kadastrı və Reyestri Publik Hüquqi Şəxsin 17 saylı Yevlax Ərazi İdarəsinin, şəxsən Ağdaş şöbəsinin rəisi Mahir Əliyev, Ağdaş notariusu və bələdiyyəsi tərəfindən haqsızlığa məruz qalan sadə bir vətəndaşam. Bu üç qurum rayonda sözün əsl mənasında "at oynadırlar", insanları diri-diri öldürürlər. Elə mən də haqsızlığa məruz qalmış vətəndaşlardan biriyəm.
2023-cü ilin noyabr-dekabr aylarında Ağdaş Rayon Notariusunda mənim adımdan vərəsəlik açılıb. O vaxtdan 2025-ci ilin martına qədər mənim başıma elə oyunlar açdılar ki, sadəcə deyiləsi deyil. Təsəvvür edin, ata-ananın dörd övladıyıq, kiçik oğul mənəm...
Bu müddət ərzində Ağdaş, Yevlax, Göyçay yollarında qaldım. Bütün nazirliklərə, Respublika Prokurorluğuna, Ədliyyə nazirinə 3-4 şikayət məktubu göndərdim. Onlar nə etdilər? Şikayətlərimi baxılması üçün bu qurumların üstünə göndərdilər. Nəticədə şikayətlərim bu rüşvətxorlar tərəfindən ört-bastır edildi və edilməkdə davam edir.
Ən maraqlısı budur ki, 2023-cü ildə vərəsəlik açılıb, 2 ay qabaq sözügedən 3 qurum 16 sot həyəti bölüb, çıxarış veriblər. Bunu da məndən 2025-in mart ayına kimi gizlədiblər. Yəni həyət, mülk 4 övlad arasında bğlünməyib, 2 övlada verilib.
Ədliyyə Nazirliyidən mənə cavab verilir ki, biz sizə və digər bacı-qardaşlarınıza bərabər hüquqlu şəhadətnamə vermişik. Doğru deyirlər. Həmin şəhadətnaməni mən əldə etmişəm. Təsəvvür edin, nazirlik övladlara bərabər şəhadətnamə verir, reyster idarəsi, Ağdaş notariusu öz bildiyini edir. Nəyin müqabilində? Əlbəttə, rüşvətin.
Ən axırda Ağdaş Rayon İcra Hakimiyyətinə bütün sənədləri göndərdim, ölçü götürülməyini xahiş etdim. Hətta icra başçısı ilə şəxsi görüş istədim, mane oldular.
Artıq şikayətlərə qətiyyən cavab vermirlər. Çünki haqsızdırlar. Biz dövlət içində dövlətik deyən Mahir Əliyev, notarius, Göyçay Regional İdarəsi şikayətlərə baxmırlar, hətta bütün şikayətləri ört-basdır edirlər. Sizcə, bu qanunsuzluq, rüşvətxorluq, özbaşınalıq öz həllini tapacaqmı? Əldə etdiyim sənədlərlə bu özbaşınalıqları istənilən qurumun qarşısında sübut etməyə hazıram.
Mən sizin sayt və qəzet vasitəsilə səlahiyyətli qurumlardan kömək istəyirəm. Xahiş edirəm, bu özbaşınalıqlara son qoyulsun. Vətəndaşları bəzi qurumlardan soyutmayın. İnamımızı itirməyin".
