Tovuz rayonunun Əyyublu kənd sakini Təvəkkül Bayramov bələdiyyə sədrinin ondan rüşvət aldığını dediyinə görə cəzalandırılıb.
Bizimyol.info xəbər verir ki, 66 yaşlı Təvəkkül Bayramov bildirir ki, bələdiyyə sədri Yaşar Məmmədov torpaq sahəsinə görə ondan 3200 manat pul istəyib. Onun sözlərinə görə, bu pulu verməyə razılaşıb və onu həmin vaxt Əyyublu bələdiyyəsinin torpaqşünası işləyən Fərruxa verərək, onun vasitəsilə göndərib.
Həmin torpaq sahəsinə materiallar gətirdərək, orada tikinti aparmaq istəyəndə icra hakimiyyətinin nümayəndələri gəlib və icazə verməyib. Bundan sonra Təvəkkül Bayramov “Qərb Region TV” internet televiziyasına müsahibəsində bələdiyyə sədri Yaşar Məmmədovun ondan rüşvət aldığını deyib.
Buna görə Yaşar Məmmədov kənd sakinini xüsusi ittiham qaydasında məhkəməyə verib. Onun Cinayət Məcəlləsinin 147.2 (ağır cinayətdə ittiham etməklə böhtan atma) və 148-ci (təhqir) maddələri ilə cəzalandırılması üçün məhkəmədə iddia qaldırıb.
Təvəkkül Bayramov məhkəmədə özünü təqsirli bilməyib. O bildirib ki, Tovuz Rayon İcra Başcısına müraciət edərək, ona torpaq sahəsi ayrılmasını xahiş etmişdi. Müraciətinə müsbət cavab verilib və ona torpaq sahəsi ayrılıb. Lakin sahəsi kçik olduğuna görə həmin dövrdə bələdiyyənin sədri olan Yaşar Məmmədova müraciət edərək, əlavə torpaq sahəsi istəyib. Onun sözlərinə görə, Yaşar Məmmədov bunun üçün 3200 manat istəyib: “Razılaşdım və pulu həmin vaxtı bələdiyyənin torpaqşünası Fərruxa verdim. Həmin torpaq sahəsinə tikinti materialları gətirtdim. İcra hakimiyyətinin işçiləri gəlib, tikintiyə icazə verməyəndə başa düşdüm ki, Yaşar məni aldadıb, pulumu alıb. Pulu Fərruxa vermişəm, amma o da Yaşarın göstərişi ilə hərəkət edir. Ona görə müsahibə verib, olanları demişəm”.
Məhkəmədə dindirilən şahidlər Təvəkkül Bayramovla bələdiyyənin işçisi Fərrux arasında pul söhbəti olduğunu təsdiqləyib. Şahidlər bildirib ki, onları birlikdə söhbət edərkən, həmin vaxt Fərruxu pul sayarkən görüblər. Lakin məhkəmə qərara gəlib ki, Fərruxa pul verilməsi təsdiqlənsə belə, bu, Yaşar Məmmədova verilməsi anlamına gəlmir.
II qrup əlil olan 66 yaşlı Təvəkkül Bayramov həm təhqir, həm də böhtana görə təqsirli bilinib. Ona 1 il 6 ay azadlığın məhdudlaşdırılması və 1000 manat cərimə cəzası verilib. O, il yarım ərzində gecə saat 23.00-dan səhər saat 07.00-a qədər Tovuz rayonunun ərazisini tərk edə bilməz.
