Sentyabrın 22-də metronun “Əhmədli” stansiyasının yaxınlığında Bakı Türk Anadolu Liseyinin yeni binasının açılış mərasimi keçirilib. Mərasimdə gün Elm və təhsil naziri Emin Əmrullayev ilə Türkiyənin milli təhsil naziri Yusuf Tekin də iştirak edib.
Bizimyol.info xəbər verir ki, sözügedən bina əvvəllər Əhmədli qəsəbəsində Şahmat məktəbinin binası olub. Elm və Təhsil Nazirliyi ilə Türkiyə Milli Təhsil Nazirliyi arasında imzalanmış protokol çərçivəsində Türkiyənin Azərbaycandakı Səfirliyinin Təhsil Müşavirliyinin koordinasiyası ilə Şahmat Məktəbinin binası Bakı Türk Anadolu Liseyinin istifadəsinə verilib.
Liseydən bildirilib ki, Bakı Türk Anadolu Liseyində şagird sayının artması, metronun “Nizami” stansiyasının yaxınlığında – Əlibəy Hüseynzadə 77 ünvanında yerləşən hazırkı binanın tutumunun tam dolması uzun müddətdir əlavə binaya ehtiyac yaratmışdı. Bu üzdən yeni tənzimləmə həyata keçirilib.
Qərar verilib ki, liseyin 10, 11 və 12-ci sinif şagirdləri, həmçinin 9-cu siniflərdən 9-A və 9-B qrupları tədris fəaliyyətlərini sentyabrın 22-dən Əhmədli qəsəbəsindəki yeni binada davam etdirəcəklər.
Bu qərarı bir neçə gündür ki, köçürülməsi nəzərdə tutulan yuxarı sinif şagirdləri və onların valideynlərinin əksəriyyəti etirazla qarşılayıb. Onlar bildirir ki, belə bir qərar vardısa, onlara köçürülmədən 1 həftə əvvəl yox, bir il, heç olmasa, bir neçə ay əvvəl deyilməli idi. Valideynlərin sözlərinə görə, aralarında elələri var ki, liseyə yaxın olsunlar deyə, “Nizami” metrostansiyasının yaxınlığında ev kirayələyiblər.
Bundan başqa, Türkiyə universitetlərinə daxil olmaq üçün hazırlıq kursları da hazırkı binanın ətrafında yerləşir. Bu da yuxarı sinif şagirdlərinin “Əhmədli”yə getmək istəməməsinin səbəblərindən biridir:
“Burada təhsil alan şagirdlər onsuz da uzaq məsafədən gəlirlər. Əhmədli də şəhərin kənarıdır. Tıxac olan şəhərdə uşaqların vaxtı elə yollarda gedəcək. Belə çıxır ki, dərsdən çıxandan sonra yenidən hazırlıq kusrlarına görə bir də “Nizami”yə qayıtmalı olacaqlar. Bu, şagirdlərə əlavə əzab-əziyyət verməkdir. Deyirlər ki, şagird sayı çoxdur, sıxlıqdır. Haqlıdırlar. Daha məntiqli olardı ki, aşağı sinifləri köçürsünlər”.
Buraxılış sinif şagirdləri heç olmasa, onlara əvvəlki binada qalmağa icazə verilməsi üçün imza toplayıb, lisey rəhbərliyinə təqdim ediblər. Lakin müsbət cavab ala bilməyiblər.
Hələlik aşağı sinif şagirdləri Əlibəy Hüseynzadə 77 ünvanındakı mövcud binada qalsa da, onun da gələcəkdə sökülməsi istisna olunmur. Çünki o binanın ətrafı söküntü zonasıdır. Ətrafdakı bir və ikimərtəbəli binalar sökülüb.
Bizimyol.info xəbər portalının əldə etdiyi məlumata görə, Nəsimi rayonunda yerləşən həmin ərazidə söküntü aparan şirkət “Vialon” MMC-dir. Bu şirkət Cəlil Məmmədquluzadə küçəsindən Mərdanov qardaşları küçəsinədək (əvvəlki “Təzə bazar”), həmçinin Salatın Əsgərova küçəsindən (“Şirvanşah” restoranı) Sübhi Salayev küçəsinədək (Məşədi Dadaş məscidi) olmaqla ümumilikdə 8.6 hektar ərazi ayrılıb. Bakı Türk Anadolu Liseyinin mövcud binası da bu ərazinin koordinatları daxilinə düşür.
Qeyd edək ki, “Vialon” MMC-nin rəhbəri Vüqar Qasımov keçmiş deputat, tikinti və un maqnatı kimi tanınan Əsabil Qasımovun qardaşıdır.
