.
“Azərbaycan artıq Ermənistanın göstərişli, imitasiya xarakterli addımlarına inanmaq istəmir və real nəticələr gözləyir”
Azərbaycan xarici işlər naziri Ceyhun Bayramov postmünaqişə dövründə regional bərpa, quruculuq və sülh səyləri, habelə normallaşma prosesini təhdid edən çağırışlardan ətraflı bəhs edib. Nazir Ermənistan konstitusiyasında Azərbaycana qarşı mövcud ərazi iddialarının, keçmiş münaqişənin qalığı olan ATƏT-in Minsk qrupu kimi qurumların hələ də ləğv olunmamasının sülh sazişinin imzalanmasının qarşısını aldığını diqqətə çatdırıb. XİN başçısı Ermənistanın Azərbaycan və Naxçıvan arasında maneəsiz əlaqənin təmin olunması öhdəliyini yerinə yetirməməsi barədə də məlumat verib. C.Bayramov çıxışı zamanı indiki Ermənistan ərazilərindən qovulmuş azərbaycanlıların, Qərbi Azərbaycan İcmasının hüquqlarının bu ölkə tərəfindən kobud şəkildə pozulmasının, onların hüquqlarının inkar olunmasının dayanıqlı sülh və etimad quruculuğuna maneə olduğu xatırladıb. Bununla yanaşı, Ermənistanın xarici işlər naziri Ararat Mirzoyan ATƏT-in fəaliyyətdə olan sədri Elina Valtonenlə telefonla danışıb. Bildirilib ki, tərəflər Ermənistan-ATƏT əməkdaşlığı məsələlərini müzakirə ediblər. Mirzoyan Ermənistan və Azərbaycan arasında nizamlanma prosesində son müzakirələri, o cümlədən sülh müqaviləsinin imzalanmasına yönəlmiş səylər barədə danışıb.
Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov Sherg.az-a deyib ki, məsələyə İran-İsrail müharibəsi fonundan baxsaq, əslində, Ermənistanın çıxış yolu yoxdur. Ekspert vurğulayıb ki, İrəvan hökuməti anlayır ki, uzun müddət davam gətirə biləcək vəziyyətdə deyil:
"Münaqişədən sonra başlamış sülh danışıqlarının sonuncu mərhələsində prosesi ləngitmək, sülhü yubatmaq, öhdəliklərə əməl etməmək, əslində, ilk növbədə İrəvanın özünə sərf etmir. Amma Ermənistan da özbaşına deyil. Görünür, Ermənistana verilən təlimatlar odur ki, zamana oynamaq lazımdır. Ona görə də İrəvan hökumətinin başçısı bir yandan sülhdən danışsa da, digər tərəfdən həm sülhə zidd açıqlamalar səsləndirirlər, həm də real addımlar atmırlar. Azərbaycan oturub Ermənistanı gözləyə bilməz ki, İrəvanın ürəyi nə vaxt istəsə, o zaman sülh imzalanacaq. Bakının konkret şərtləri var və sülh sazişi həmin şərtlərin icrasından sonra imzalanmalıdır. Ermənistan hökumətinin sülh danışıqlarını ara-sıra intensivləşdirmək cəhdi, yaxud görüntüsü münasibətləri nizamlamaq təşəbbüsüdür. Tələbimiz odur ki, Ermənistan göstərməlik addımlar atmasın, sülhü imitasiya etməsin. Amma İrəvan rəsmilərinin ATƏT rəhbərliyi ilə mütəmadi təmasları xoşniyyətli deyil. Məqsəd sözügedən qurumu hansısa formada prosesə cəlb etməkdir. Həm də Minsk qrupunun buraxılmasını yubatmağa çalışırlar".
