Ermənistan Baş naziri Nikol Paşinyan bütün ermənilərin katolikosu II Qaregindən sonra ölkənin birinci prezidenti Levon-Ter Petrosyanı qarşıdakı parlament seçkilərinə qədər zərərsizləşdirmək qərarına gəlib.

Teleqraf xəbər verir ki, bu barədə “Joqovurd” qəzeti məlumat yayıb.

Erməni nəşrinin yazdığına görə, hakim “Vətəndaş Müqaviləsi” partiyasının üzvlərinə Ter-Petrosyan və II Qaregini dəstəkləməmək barədə xəbərdarlıq edilib:

“Mənbələr bildirirlər ki, hökumət Ter-Petrosyan və komanda yoldaşlarını 2026-cı ilin iyununda keçiriləcək parlament seçkilərinə qədər zərərsizləşdirmək qərarına gəlib. Təsadüfi deyil ki, Ermənistan Baş naziri Aparatının rəhbəri Araik Arutyunyan Levon Ter-Petrosyanı seçki saxtakarlığında ittiham edib. Arutyunyan onu “seçki saxtakarlığının xaç atası” adlandırıb.

Parlamentin vitse-spikeri Ruben Rubinyan da II Qaregini dəstəkləyən birinci prezidenti hədəfə alıb”.

Nəşr qeyd edir ki, Nikol Paşinyanla Levon Ter-Petrosyan arasında gərginlik ikincinin II Qaregini və baş nazirə qarşı müxalifətin impiçment təşəbbüsünü dəstəkləməsi ilə bağlıdır.

Xatırladaq ki, bundan əvvəl Ermənistan Baş naziri Nikol Paşinyan bütün ermənilərin katolikosu II Qregini subaylıq andını pozmaqda ittiham edib. Paşinyanın sözlərinə görə, subaylıq andını pozaraq övlad sahibi olan Qaregin artıq Erməni Apostol Kilsəsinin rəhbəri ola bilməz.

Ermənistan hökumətinin başçısı Erməni Apostol Kilsəsinə yeni katolikosun seçilməsi üçün seçkilərə və bu məqsədlə koordinasiya şurasının yaradılmasına çağırıb.