VƏTƏNDAŞ CƏMİYYƏTLƏRİNİ İNKİŞAF ETDİR
Bu gün Polşanın Azərbaycandakı səfiri Mixael Lebenda Bakıda keçirilən konfransdakı çıxışında bildirib ki, demokratik islahatlar vətəndaş cəmiyyəti cəlb olunmadan həyata keçirilə bilməz. Aİ öz tərəfindən bu islahatları dəstəkləməyə hazırdır.
Azərbaycan QHT-nin keçirdiyi konfransda məqsəd sentyabrın 28-29-da Varşavada “Şərq tərəfdaşlığı” proqramında iştirakçı dövlətlərin başçılarının ikinci sammiti çərçivəsində keçiriləcək “Şərq tərəfdaşlığı” vətəndaş cəmiyyəti Forumuna təkliflərin hazırlanmasıdır.
Aİ-nin Azərbaycandakı missiyasının rəhbəri Rolan Kobia qeyd edib ki, hökumət və vətəndaş cəmiyyəti ilə əməkdaşlığın inkişafı Aİ üçün eynidir. O, QHT ölkələrini Varşava sammitinə öz təkliflərini təqdim etməyə çağırıb.
Azərbaycan XİN İnsan Hüquqları, Demokratikləşmə və Humanitar Problemlər İdarəsinin rəisi Əlimirzamin Əsgərov Turan-ın müxbiri ilə söhbətində deyib ki, Bakı “Şərq tərəfdaşlığı” proqramında fəal iştirak edir və milli maraqları nəzərə almaqla Avropa dəyərlərinə intreqrasiyanı dəstəkləyir.
Onun sözlərinə görə, QHT ilə hökumətin dialoquna gəlincə, belə dialoq var. O, buna misal olaraq indiki forum çərçivəsində vətəndaş cəmiyyəti nümayəndələrinin
ölkənin müxtəlif nazirliklərinin təmsilçiləri ilə görüşünü göstərib.
Əmək Hüquqlarını Müdafiə Liqasının rəhbəri Sahib Məmmədov “İnsan hüquqları və demokratiya” mövzusunda çıxış edib. O bildirib ki, vətəndaş cəmiyyəti birləşmə azadlığına zəmanətin gücləndirilməsini təklif edir. Əsasən QHT-nin qeydiyyatının sadələşdirilməsi və icazə sistemi əvəzində xəbərdarlıq sisteminin tətbiqi lazımdır.
O həmçinin toplaşma, ifadə, vicdan və dini etiqad azadlıqlarının reallaşmasına məhdudiyyətlərin aradan qaldırılmasının vacibliyini vurğulayıb.
2009-cu il referendumunda əksini tapmış vətəndaşların qanunvericilik təşəbbüsü ilə çıxış etmək hüququnun reallaşması mexanizmini nəzərdə tutan qanunun qəbulu təklif olunur.
Bundan əlavə, hüquq-məhkəmə, vəkillik sistemində islahatların aparılması, vətəndaşlara hüquqi yardım haqqında qanunun qəbulu tövsiyə olunur. Bununla yanaşı dövlət proqramlarının qəbulunda ictimai iştirakın təminatı nəzərdə tutulur.
İqtisadi və Sosial İnkişaf Mərkəzinin rəhbəri Vüqar Bayramov “İqtisadi inteqrasiya” mövzusunda çıxış edib. O, Azərbaycanın inkişaf etməkdə olan ölkə statusu ilə ÜTT-ya daxil olmasının sürətləndirilməsini təklif edib.
Bundan əlavə, ölkədə iqtisadi münasibətlərin liberallaşması, Rəqabət Məcəlləsinin, yeni Gömrük Məcəlləsinin qəbulu, xarici ticarətdə bürokratik gömrük prosedurlarının sadələşdirilməsi, mülkiyyət hüquqlarının müdafiəsi, kiçik biznesin maliyyə resurslarına çıxışı və Sahibkarlığa Kömək Milli Fondunun kreditlərinin paylanmasında şəffaflığın artırılması nəzərdə tutulur.
Həmçinin dövlət xərclərinin hərtərəfli təsnifatı ilə Büdcə Məcəlləsinin qəbulu təklif olunur.
İqtisadi İslahatlar Mərkəzinin rəhbəri Qubad İbadoğlu “Ətraf mühit və enerji təhlükəsizliyi” mövzusunda çıxış edib. O, bu sahədə idarəetmənin təkmilləşdirilməsinin və vətəndaş cəmiyyəti ilə əməkdaşlığın təminatının vacibliyini qeyd edib.
Bərpa olunan və alternativ enerji mənbələrindən istifadə potensialının genişləndirilməsi, enerjiyə qənaət edən lampaların istehsalının təşviqi tövsiyə olunur. Karbon qazı tullantılarının azaldılması üzrə dövlət proqramlarının qəbulunun vacibliyi vurğulanır.
Açıq Cəmiyyət İnstitutunun (Soros Fondu) nümayəndəsi Cahangir Səlimxanov “İnsanlararası münasibətlər” mövzusundan danışıb. O, ilk növbədə tələbələr, vətəndaş cəmiyyətinin fəalları, jurnalistlər, idmançılar, elm və mədəniyyət sahələrinin işçiləri üçün viza rejiminin sadələşdirilməsini əsas bəndlərdən biri hesab edib.
Bundan əlavə, “çoxdillilik”, yəni vətəndaşların, xüsusən gənclərin bir neçə Avropa dilini öyrənməsi təşviq edilib.
Aİ-nin Bakıdakı missiyasının rəhbəri Məryəm Hacıismayılova Aİ-nin vətəndaş cəmiyyəti institutlarını dəstəklədiyini bildirib. Bu dəstək treninqlərin keçirilməsində, monitorinqlərin keçirilməsinə yardımın göstərilməsində, QHT koalisiyasının yaradılmasında, hökumət müəssisələri ilə dialoqun təşviqində özünü göstərə bilər.
Varşava forumunda Azərbaycanı V.Bayramovla yanaşı hüquq müdafiəçiləri İlqar İbrahimoğlu, Emin Hüseynov, Sahib Məmmədov, ekspertlər Qubad İbadoğlu və Leyla Əliyeva təmsil edəcəklər.
