“1990-cı illərdən başlayaraq ölkələr arasında sərvət fərqi genişlənməyə başladı. Bu dövrdə beynəlxalq münasibətlərdə yeni yaranmış yola düzələn Cənubi Qafqaz regionunun ölkələri də ard-arda müstəqillik əldə etdilər. Bundan sonrakı periodda region ölkələri arasında ayrı-ayrılıqda və bütövlükdə keçdiyimiz yol məlumdur. Bu günün reallıqları isə qloballaşma fenomenindən uzaqlaşaraq regional inteqrasiya tendensiyasını diktə edir. Xüsusilə də ticarət, nəqliyyat və İKT kimi sahələrdə regional əməkdaşlıq özünü daha qabarıq formada büruzə verir”.

Bu barədə Bizimyol.info xəbər portalına Milli Məclisin İqtisadi siyasət, sənaye və sahibkarlıq komitəsinin sədr müavini Azər Badamov danışıb. Deputat bildirib ki, ölkələr qloballaşmanın faydalarını həyata keçirmək imkanlarını gücləndirməklə boşluqları aradan qaldıra, həmçinin regional əməkdaşlıqlara üstünlük verməklə güclənə bilərlər: “Təbii ki, “ən yaxşı” siyasət özünə güvənmək hesab edilsə də, regional əməkdaşlıq qloballaşma ilə bu siyasət arasında orta yol təklif edir. Yəni, regional əməkdaşlıq ölkələrin güclü tərəflərindən istifadə edə və qloballaşmanın çətinliklərinin öhdəsindən gəlməyə kömək edə bilər”.

Azər Badamov qeyd edib ki, tarix boyu qarşıdurmalara şahidlik edən bölgəmiz üçün regional iqtisadi əməkdaşlıq nisbətən yeni bir fenomendir: “Gürcüstan ən çətin məqamlarda Azərbaycandan dəstək görüb. Önəmli məqam odur ki, Azərbaycan beynəlxalq hüquqla dövlətlərin ərazi bütövlüyü və suverenliyi prinsipinə ən ali səviyyədə yanaşır. “Heç vaxt işğalla barışmamaq” tövsiyəsi qədər yanaşması da təmkinli və uzaqgörən siyasət tələb edir.

Azərbaycanla Gürcüstan arasında Bakı-Tbilisi-Ceyhan neft kəməri, Cənub Qaz Dəhlizi, Bakı-Tbilisi-Qars dəmir yolu kimi olduqca önəmli təşəbbüslər var. Bu meqa layihələrdən iki ölkəyə, bu ölkələrin xalqlarına, bütövlükdə sözügedən layihələrdən bu və ya digər şəkildə iqtisadi və siyasi pay götürən ölkələrin xalqlarına yalnız və yalnız fayda var. Niyə görə də təməli sağlam üzərində qurulan layihələrin sayı artırılmasın? Bunun üçün önümüzdə geniş perspektivlər, fürsətlər mövcuddur. Yetər ki, düzgün dəyərləndirilsin, regional və qlobal balans düzgün tutulsun. Bu mənada qeyd etməliyik ki, cənab Prezident İlham Əliyevin yürütdüyü siyasi yol izlənilir, öyrənilir. İcrasına artıq başlanılan və nəzərdə tutulan layihələrdən sadəcə Gürcüstan və Azərbaycan deyil, bir çox ölkə xalqları yararlanacaq. Son zamanlarda dövlət başçılarının ən ali səviyyədə səfərləri, iki ölkə liderləri arasında mövcud olan şəxsi əlaqələr, xüsusilə Baş nazir İrakli Kobaxidzenin ardınca Gürcüstan Prezidenti Mixeil Kavelaşvili ilə də davam edən eyni müsbət tendensiya əlaqələrin inkişafında, dərinləşdirilməsində həm Gürcüstanın, həm Azərbaycanın xüsusi diqqət göstərdiyi amildir”-deyən deputat vurğulayıb ki, mövcud reallıqlar fonunda Gürcüstanın səfirlik üçün paytaxt Tbilisidə Azərbaycana torpaq verməsi etimadın, inamın, xüsusi diqqətin göstəricisidir. Bu həm dövlətlərarası münasibətlərin, həm də ictimai əlaqələrin inkişafına daha da müsbət təsir edəcək. Regionun təhlükəsizliyi və rifahı regional aktorlardan müştərək, koordinasiyalı addımlar tələb edir. Bir daha məlum olur ki, Gürcüstan və Azərbaycan ən önəmli məsələlərdə anlaşmalı addımlar atır.

Azər Badamov əlavə edib ki, ərazi bütövlüyü və suverenliyimizi bərpa etdikdən sonra forma dəyişdirən xarici siyasətimizdə region ölkələri prioritet təşkil edir: “Dövlət başçımız bunu aydın şəkildə hər bir tərəfin də diqqətinə çatdırdı ki, xaricdən nə qədər basqı olsa da region ölkələri ilə bizi qarşı-qarşıya qoymaq planları iflasa uğrayacaq. Bir halda ki, təklif edilən ən böyük layihələr belə regional əməkdaşlıqdan keçir, ya da daha dəqiq ifadə etsək, biri digəri ilə sıx şəkildə bağlıdır niyə görə də region ölkələri sülhdən uzaq düşməlidirlər. Eyni coğrafiyada yaşayan xalqların əbədi düşmən olmasından biz itirə, başqaları yararlana bilər. Buna fürsət vermək olmaz. Cənab Prezident bildirir ki, tranzit olmaq imkanı Ermənistana verilmişdi. Gürcüstan kimi o da tranzit ola bilərdi. Hələ də bu fürsət pəncərəsi açıqdır, bu dəfə də dəyərləndirilməsə, tamamilə siyasi təcridə düşəcəklər”.