Nəsimi, Babək, Beyrək… Ardınca da kolbasa reklamı. Dünən televizora baxanda təsadüfən qarşıma çıxdı. Təəccübləndiyim qədər də təəssüfləndim.
Azərbaycan kinosunun inciləri sayılan elə möhtəşəm filmlərdə yaratdığı obrazlardan sonra böyük aktyorumuz Rasim Balayevi kolbasa reklamında görmək, nə gizlədim, pisimə gəldi. Türklər demiş, “şaşırdım”, hətta utandım da. Onun yerinə yox, danışanda ağızlarına çullu dovşan sığışmayan kino qurumlarında rəhbər vəzifələri tutanların yerinə. Bəlkə də bu reklama çəkildiyinə görə çoxları Rasim Balayevi qınayır. Amma onu qınamaq lazım deyil. Adam illərdir oturub, film çəkiləcəyi və onu hansısa rola dəvət edəcəkləri günü gözləyir. Və gözləyə-gözləyə də ömrünün, yaradıcılığının neçə onilliklərini fövtə verib. Bir sözlə, gözləyə-gözləyə qocalıb.
Dəfələrlə verdiyi açıqlamalarda kommersiya filmləri və seriallara dəvətlər aldığını, lakin hər rola çəkilməyi də özünə, sənətinə yaraşdırmadığını söyləyib. Bir də “Nəsimi”, “Babək”, “Dədə Qorqud” və digər ekran işləri səviyyəsində filmlər çəkiləcəyinə ümid bəsləməsə də, ən azı, səviyyəli filmlərdə rol alacağı günün həsrəti ilə yaşayıb. Və günlərin bir günü baxıb görüb ki, ey dadi-bidad, yaş gəlib çatıb 77-yə, iki yol arasında qalıb; nağıllarda deyildiyi kimi, bilmir it hürən tərəfə getsin, yoxsa, işıq gələn tərəfə…Amma arzuladığı kinonun tənəzzüldən çıxması üçün hələ də nəinki işıq, heç işıqucu görünmür, ki, görünmür.
Neyləsin, kamera, çəkiliş üçün darıxan aktyor buna görə də başını kolbasa reklamı ilə qatmağa məcburdur. Mənasız, bayağı, şit komediyaların zövqləri korladığı, bir-iki roliklə “mən sənətkaram, məndən yoxdur” deyib meydan sulayan “ulduzcuqların” at oynatdıqları bir zamanda “Nəsimi”nin kolbasa reklamına çəkilməsinə görə biz utanmalıyıq, Rasim Balayev yox.
Türkiyədə, Rusiyada, Hollivudda bu cür aktyorlar üçün xüsusi ssenarilər yazılır, xüsusi qonorarlar verilir, filmlər çəkilir, tamaşalar hazırlanır. Bizdə isə böyük aktyorların aqibəti göz qabağındadır. Siz deyin, indi Rasim Balayevin günahı nədir ki, dünya ulduzlarının yaşadığı ölkələrdə doğulmayıb.
Cəvahir Nehru - yenicag.az
