Azərbaycan Demokratik Partiyasının sədri Sərdar Cəlaloğlu Türkiyədə baş verən son hadisələrlə bağlı Sitat.info-ya danışıb.
O bildirib ki, CHP-nin hakimiyyətə gəlməsi Azərbaycan və türk dövlətləri üçün ümidverici gələcək vəd etmir: "Xüsusilə 44 günlük müharibə zamanı CHP-nin mövqeyi və hökumətə qarşı ittihamlarını nəzərə alsaq, bu Azərbaycanın strateji maraqlarına uyğun deyil. “CHP-nin təkbaşına iqtidara gəlməsi mümkün deyil. Lakin müxtəlif qüvvələr, o cümlədən Erdoğana rəqib olan çevrələr CHP-ni dəstəkləyir. Ekrem İmamoğlu isə PKK ilə əməkdaşlıq da daxil olmaqla bir sıra məsələlərlə bağlı ittiham olunur və onun əleyhinə əsas ittihamlar məhz CHP üzvləri tərəfindən irəli sürülür"
S.Cəlaloğlu vurğulayıb ki. istintaq 3 ildir davam edir: "Üç ildən artıqdır ki, İmamoğlu ilə bağlı istintaq işi aparılır. O, öz həbsinə siyasi məzmun qazandırmağa çalışıb və bu məqsədinə nail olub. Əgər İmamoğlu hüquq-mühafizə orqanları ilə əməkdaşlıq etsəydi, bəlkə də həbsinə ehtiyac qalmazdı. İstanbula ayrılan pulların mənimsənilməsi, mitinqlərdə hakimiyyətdən narazı kütlələrin iştirakı və bəzi qüvvələrin vəziyyətdən istifadə edərək aranı qarışdırmaq istəməsi Türkiyədə vəziyyəti daha da gərginləşdirir".
“Əgər gərginlik davam edərsə, Türkiyədə hərbi vəziyyət elan oluna bilər”- Azərbaycan Demokratik Partiyasının sədri sonda bildirib.
