DİA.AZ: - Hüseynov Əbülfət Ağa oğlu tərəfindən prezident İlham Əliyevə, Dövlət Torpaq və Xəritəçəkmə Komitəsinin sədri Qərib Məmmədova, Ədliyyə naziri Fikrət Məmmədova, Ekologiya və Təbii Sərvətlər naziri Hüzeyn Bağırova, Baş Prokuror Zakir Qaralova və digər dövlət qurumlarının rəhbərlərinə şikayət dolu məktub ünvanlanıb. DİA.AZ bildirir ki, İmişli rayonu Bəhramtəpə qəsəbəsi sakini Hüseynov Əbülfət Ağa oğlu yazdığı müraciətində deyir:
“Bəhramtəpə Bələdiyyəsinin sədri İman İbrahimovla İmişli Torpaq şöbəsinin müdürü V. Məmmədov birləşərək, mənim ailəmin əlində icarə müqaviləsi olduğu halda, torpaq sahəmizdən 5 hektarını alqı-satqı yolu ilə tamami ilə qəsəbə sakini olmayan Həşimov Tahir Mütəllim oğluna satmış və yeddinci ildir ki, ailəmizin dolanışıq mənbəyi olan bu sahəni əlimizdən almağa nail olmuşdular. Arxaları Mehdi Səlimzadə olan, bu insanlar sənədləşməni bir günün içərisində gizli yolla həll etmiş, satılan torpaq sahəsi Dövlət Torpaq Komitəsinin kadastrından keçməmiş Beyləqan Ərazi Reestr Xidməti də həmin sahəyə kupça vermişdir. 22 noyabr 2013-cü il, ANS televiziyasında Mehdi Səlimzadə haqqdan-ədalətdən, korrupsiyadan danışdı, amma onun adamları bizim ailənin əlindən çörəyimizi alıblar. Qonşuluğumuzda olan 15 hektar sahə isə kənd təsərrüfatının inkişafı üçün nəzərdə tutulduğu halda, təyinatı Nazirlər Komitəsi tərəfindən dəyişdirilmədən, Azərbaycan Respublikası Qanunvericiliyində nəzərdə tutulmayan sahə kimi alqı-satqı yolu ilə qum-çınqıl karxanası üçün satılmışdır. Ölkənin yeraltı sərvəti alqı-satqı predmeti olmadığı halda, 10 ilə yaxındır ki, yazdığım ərizə və şikayətlər adıçəkilən nazirliklərin məmurları tərəfindən ciddi araşdırılmadığından artıq onlar tərəflikdən təhdid və təhqir obyektinə çevrilmişəm. Çünkü, əks tərəfin arxası Mehdi Səlimzadədir. Araz çayı boyunca çayın mühafizə zolağı və sahili gizli olaraq qanunsuz yolla talan edilir. Adıçəkilən nazirliklərin məmurları talan edənləri və talançılara icazə verənlərin müdafiəçiləri rolunda çıxış etdiklərində, heyvanlarımızın örüş və otlaq sahələri əlimizdən alınıb və kənd təsərrüfatı sahəmizə, yeganə dolanışıq mənbəmiz də əlimizdən alınsa da heç bir tədbir görülmür.
Görülməyə qoymayan isə yenə də Mehdi Səlimzadədir. İmişlinin hazırki başçısı V. Hacıyev isə yüzlərlə ərizə və şikayətlərimizi çox güman ki, qeydiyyatdan keçirmədən, arxivə atdırır. Başa düşmürəm ki, İmişli RİH-də mənim məktublarıma saxta cavablar yazanlar kimlərdi? Bələdiyyələrlə İş Mərkəzi Bəhramtəpə Bələdiyyəsinin maliyyə planını yoxlasa da, təftiş zamanı yeraltı sərvətlərin alqı-satqı predmeti olmaması barədə torpaq sahəsinin alqı-satqısı zamanı Dövlət Kadastr Planının hansı səbəbdən sənədlər arasında olub-olmamasını araşdırmır, izahat tələb etmir. Sahil boyu ərazilərdə Bələdiyyəyə məxsus torpaq sahlərinin talan edilməsini təftiş etmək əvəzinə, məni məhkəmələrə müraciət etməyə sövq edirlər. Qarşı tərəfin güclü müdafiəçiləri olduğunu dərk etdiyimdən, mən bu gün aciz bir azərbaycanlıyam. Özümü və ailəmizi yad və kimsəsiz hesab edirəm. Amma prezidentin son kadr təyinatlarını görəndən sonra, xüsusi ilə Heydər Əsədovu Kənd Təsərrüfatı naziri təyin edəndən sonra inanıram ki, bizim ailəyə kömək olunacaq. Ölkəmin rəhbəri də, prezidenti də, ağsaqqalı da İ. Əliyevdir. Atası, ümumilli liderimiz mərhum H. Əliyev babamın dostu olmuş İ. Əliyevdə H. Əliyevin oğludur. Odur ki, hörmətli prezidentə, bir daha üzümü tutub, xahiş edirəm ki, qaldırdığım məsələləri obyektiv, hərtərəfli təftiş edilərək, əmlakımızın qəsəbəmizə yad olan arxalı, qoçu dəstəsi olan Həşimov Tahir Mütəllim oğlundan, Mehdi Səlimzadənin adamlarından alınıb, özümüzə qaytarılmasına göstəriş verəsiniz.
Bildirirəm ki, oktyabr ayı Qərib Məmmədov Salyanda şikayətçiləri qəbul edərkən, mən də orada idim. Sadaladığım faktlar barədə ona məlumat verdim. Komitə sədri İmişlinin torpaq şöbə müdürü Vüqar Məmmədovu ayağa qaldırdı və hədələdi. Sən demə, bu adam üzünə imiş. Təəssüf edirəm ki, həmin vaxtdan bəri mənim verdiyim faktların biri də araşdırılmadı. Eyni zamanda ekologiya nazirliyinin əməkdaşları İmişliyə gəlib, şirinlik alıb, qayıdırlar. İman İbrahimovun və Vüqar Məmmədovun müdafəçisi rolunda çıxış etməklə, işlərini bitmiş hesab ediblər. Kiloqaramlarla yazdığım məktublar beləcə ört-basdır edilib. Məni yollarda əsir-yesir qoyublar. Ailəmi ruzusuz qoyublar. İ. İbrahimov təklikdə and-aman edir ki, T. Həşimovu 7 ildə bir dəfə olsun görməmişəm. Ona qərarı və müqavilənin təsdiq olunmuş variantını RİH başçısının kabinetində təsdiq edərək, veriblər. Onun, hətta, bu haqda ərizəsi belə olmayıb. Ədliyyə nazirliyinin regional şöbəsi də Mehdi Səlimzadənin təkidi ilə qanunsuzluqlara göz yumur, hər dəfə mənə aldadıcı cavablar yazır.
İ. İbrahimov Araz çayının mühafizə zolaqlarından və sahilindən qanunsuz olaraq istifadə edir. Ərazinin yeraltı sərvətləri talan edilərkən, ünvanlanmış şikayətlər əsasında araşdırma aparmağa gələn ekoloqlar, lazımı araşdırma aparmaq əvəzinə, traktor sürücüsünə cərimə yazmaqla, işlərini bitmiş hesab edirlər. Əslində, belə bir addım da, qanunla müəyyən edilməmişdir. Digər tərəfdən, Meliorasiya və Su Təsərrüfatı ASC-nin rəhbərləri mənim şikayət ərizəmi, İmanovlara şərait yaradan, onlarla iş birliyi quran Mirqoca Mirişovun üstünə göndərirlər, o da hər dəfə məni günahkar hesab edir. Ona görə də Mirqocanın Qulubəyli kəndində mal-qara ferması, İmişlidə, Bakıda villası, H. Aslanov küçəsində, dəyəri 100 000-lərlə ölçülən bazar tikintisinə başlamağı imişlilərin gözü önündədir. Nazirlik və komitələrin yerli vəzifə sahiblərinə ünvanlanan məktublarda bildiriləndə ki, çalışın ona kömək edin, o halda onların mənə köməklikləri yox, çomaqları dəyir.
Cənab prezident!
İnanıram ki, göndərdiyim məktublar sizə çatmır. Ümüdvaram ki, nə vaxtsa çatacaq, ya da mən sizinlə görüşəcəyəm. Məktublarla əlaqədər Prezident Administrasiyasının kuratorları da yerli məmurları müdafiə edir. Mənə təklif olunan məhkəmə predmetindən istifadə edə bilmirəm. Çünkü qarşı tərəf çox güclüdür. Odur ki, bir daha sizdən xahiş edirəm ki, göstərdiyim qanunsuzluqların araşdırılması üçün aidiyyatı qurumlara müvafiq tapşırıqlarınızı verəsiniz”.
