Vergilər Nazirliyi ölkədə vergi borcunu ödəməyən şirkət və fiziki şəxslərin siyahısını açıqlayıb. Nazirlikdən verilən məlumata görə, həmin şirkətlər arasında "Azərenerji" ASC-nin "Gəncə regional elektrik şəbəkəsi" MMC, "Azərsu" ASC-nin "Birləşmişsukanal" MMC və "Sutikinti" müəssisəsi, "Doppelmayr Seilbahnen GmbH" kanat yollarının tikintisi şirkətinin filialı, "Hess (ACG) Limited" neft şirkətinin Bakı nümayəndəliyi, "Karasu Development Company" neft şirkətinin Kayman adalarında qeydiyyata alınmış nümayəndəliyi, "Petroleum Services Group SA" şirkəti, MILK-PRO süd emalı şirkəti, "Bakı Şərab-2" müəssisəsi, "Rotary Engineering" şirkətinin Bakı filialı və digər şirkətlər var. Ümumilikdə siyahıda 405 hüquqi və fiziki şəxs yer alıb. 2015-ci ilin yanvar ayı ilə müqayisədə vergi borcunu ödəməyənlərin sayı 6,6 faiz artıb.
Xatırladaq ki, nazirlik bir müddət əvvəl də vergidən yayınan şirkətlərin adını açıqlamış və "Bakı Şərab-2" ASC-nin də adı siyahıda yer almışdı. Müəssisənin hər dəfə Vergilər Nazirliyinin tərtib etdiyi siyahıda yer alması diqqətimizi çəkdiyindən "Bakı Şərab-2" ASC-nin fəaliyyəti ilə bağlı araşdırma apardıq. Araşdırmalar nəticəsində öyrəndik ki, firma tərəfindən hazırlanan spirtli içkilər o qədər də keyfiyyətli deyil: "Keyfiyyətsiz, tərkibi müvafiq standartlara cavab verməyən spirtdən hazırlanan içki məhsullarından zəhərlənmə halları tez-tez baş verir. Zavodda istehsal edilən içkilərin tərkibinə antifriz, odekolon və digər kimyəvi maddələr qatılır. İçkilərə vurulan metil spirti insanda korluq yaradır. "Bakı Şərab-2"də istehsal olunan məhsullar firma mağazaları ilə yanaşı, paytaxtın digər dükanlarında da satışa çıxarılır. Tərkibi bilinməyən içkilərin sərbəst şəkildə satılması insanların həyatı üçün böyük təhlükə yaradır. Zavodda hazırlanan içkilərdən 200-300 qram qəbul edəndən sonra adamı yuxu tutur, başgicəllənməsi, mədə qıcqırması baş verir və qusma olur. Ən təhlükəli hallardan biri müəssisədə istehsal edilən saxta alkaqollu içkilərin şadlıq evlərinə verilməsidir. Toylarda baş verən kütləvi zəhərlənmələrin səbəblərindən biri elə "Bakı Şərab-2"nin məhsullarına görədir. Laboratoriyalar normal işləmir. İçkilərin zərərli olub-olmadığını müəyyən edə bilmirlər. Etanol spirtinin yüksək olması ölümə bərabərdir. Spirtli içkilərin qablaşdırılmasında da nöqsanlar mövcuddur. Belə ki, məhsulun şüşəsində boğaz hissədə, qapağın yerləşdiyi yerdəki boşluq xəttində üzük formasında maska deyilən iz qalır. Bu da ondan irəli gəlir ki, həmin məhsulun hazırlanmasında təmizlənmiş sudan istifadə edilməyib". Araşdırmalar nəticəsində öyrəndik ki, "Bakı Şərab-2" ASC-nin İdarə Heyətinin sədri Rabil Hüseynovdur. Özəl qaynaqların bildirdiyinə görə, nazir müavinlərindən biri ilə kirvə, həmçinin səfirlərdən biri ilə yaxın qohumluq əlaqələrinə malik olan Rabil Hüseynov məhz onların sayəsində vergidən yayınmağa müvəffəq olur: "ASC sədri dəfələrlə yuxarıların təzyiqi ilə üzləşib, amma hər dəfə himayədarlarının köməyi ilə yaranmış problemləri yoluna qoymağı bacarıb. Bir neçə il əvvəl isə Rabil Hüseynov maliyyə vəsaitlərinin bir hissəsini Türkiyə və Rusiyaya çıxarmağa başlayıb. Buna səbəb zavod rəhbərinin yuxarılarla problem yaşamasıdır. Rabil Hüseynovun oğlu Qabil Hüseynli hazırda Türkiyədə yaşayır və atasının ordakı biznesini idarə edir. Həmin biznes sahələrinə son zamanlar Azərbaycandan sərmayə yatırılır.
Rabil Hüseynovun Rusiyadakı biznesini isə İsa adlı şəxs idarə edir. Rusiyada biznes sahələri quran İsa adlı şəxsin "Bakı Şərab-2" ASC-nin rəhbərinə çox yaxın olduğu bildirilir. Rabil Hüseynov son dönəmlərdə baş nazirin keçmiş müavini, "Milyarderlər İttifaqı"nın aparıcı şəxslərindən biri hesab olunan, Rusiya Azərbaycanlıları Federal Milli-Mədəni Muxtariyyətinin ("AzerRos"un) Ağsaqqallar Şurasının sədri Abbas Abbasovla biznes münasibətləri qurub. Deyilənə görə, hazırda Abbas Abbasov Rabil Hüseynova Rusiyadakı biznesini genişləndiməyə yardımçı olur. Zavod rəhbərinin həmçinin Bakıda bir sıra iri obyektləri var. Bunlar "Metkartinq", "Neolit" restoranı və digərləridir. Daha doğrusu, "Neolit" restoranı onun Yaşar Məlikov adlı qohumuna məxsusdur. Bundan başqa "Bakı Şərab-2" ASC-nin hesabına milyonlar qazanan Rabil Hüseynovun Saatlıda yüz hektarlarla torpaq sahələri, onlarla təsərüfat və paytaxtın müxtəlif yerlərində sayı-hesabı bilinməyən şərab və ərzaq marketləri olduğu da qeyd olunur". Araşdırmalar zamanı məlum oldu ki, Rabil Hüseynovun oğlu Şahin Hüseynli 2012-ci ilin yanvar ayının 2-də Bakının məşhur "Neolit" restoranında qanlı insident törədib. Bakı Şəhər Baş Polis İdarəsi və Bakı Şəhər Prokurorluğunun yaydığı məlumatda deyilir ki, yanvarın 2-də Bakı şəhər sakini Hüseynli Şahin Rabil oğlu sərxoş vəziyyətdə əylənmək üçün "Neolit" restoranına gəlib. Lakin o, özünə məxsus "Yaguar" markalı avtomobili restoranın qarşısında düzgün saxlamayıb. Nəticədə restoranın əməkdaşları ilə aralarında mübahisə yaranıb. Restoranın əməkdaşlarının iradlarını qəbul etməyən Şahin Hüseynli intizama dəvət edilsə də, əksinə, o, bundan daha da əsəbiləşib. Və avtomobilinin yük yerində gəzdirdiyi özünə məxsus 16 kalibrli, yivsiz qoşalülə ov tüfəngindən restoranın giriş qapısına atəş açıb. Bu zaman "Neolit"də istirahət edən çoxsaylı insanlar vahiməyə düşərək restoranı tərk edib, foyedə olmuş Nağıyev Fəxrəddin Firdovsi oğlu isə açılmış atəş nəticəsində bədəninin müxtəlif nahiyələrindən xəsarətlər alıb. Dərhal hadisə yerinə gələn Nizami Rayon Polis Idarəsinin əməkdaşları Şahin Hüseynlini zərərsizləşdirib. Faktla bağlı Nizami Rayon Polis İdarəsinin Istintaq Şöbəsində Cinayət Məcəlləsinin 221.3-cü (xuliqanlıq, silah tətbiq etməklə) maddəsi ilə cinayət işi başlanıb, hadisə yerinə baxış keçirilib. Şahin Hüseynlinin cinayətdə istifadə etdiyi tüfəng maddi sübut kimi götürülüb. Cinayətin törədilməsində təqsirli bilinən Şahin Hüseynliyə həmin maddə ilə ittiham elan olunmaqla barəsində məhkəmənin qərarı ilə həbs qətimkan tədbiri seçilib. Amma aradan bir müddət keçdikdən sonra Şahin Hüseynli atasının və yüksək vəzifəli qohumlarının sayəsində həbsdən çıxmağı bacarıb. Yayılan məlumatlara görə isə, "Bakı Şərab-2" ASC-nin İdarə Heyətinin sədri Rabil Hüseynovun oğlu Şahin Hüseynli əvvəllər Bakı Şəhər Prokurorluğunda işləyib. 2005-ci ildə parlament seçkilərinə qatılaraq mandat sahibi olmaq istəyib. Lakin cəhdi baş tutmayıb. Bundan sonra rayonlardan birinə icra başçısı təyin edilmək üçün çaba göstərib. Bu dəfə də uğursuzluqla nəticələnib. Onu da qeyd edək ki, Rabil Hüseynov "Vinzavod"un direktoru olsa da, idarəetməni Kamran adlı kürəkəninə tapşırıb. Maraqlıdır ki, dövlətə vergi ödəməkdən imtina edən şirkətin rəhbərliyi bu günə kimi məsuliyyətə cəlb olunmayıb. Bu fakt Rabil Hüseynovun yüksək vəzifəli şəxslər tərəfindən himayə olunmasının bariz göstəricisidir. Biz isə hesab edirik ki, dövlətə milyonlarla ziyan vuran şirkətlərin rəsmiləri, o cümlədən "Bakı Şərab-2" ASC-nin rəhbəri Rabil Hüseynovun barəsində qanunvericilik səviyyəsində təcili tədbirlər həyata keçirilməlidir. \\ GünBakı \\
Yazıda adıçəkilən bütün şəxslərin münasibətini dinləməyə hazırıq.
(Ardı var)
