Azərbaycanın qonşu ölkələrlə quru sərhədləri bağlı saxlaması imkansız əhalini yay aylarında dincəlmək üçün dağ rayonlarına getməyə vadar edir.

Adətən istirahət üçün Gürcüstana üz tutan Gəncəbasar bölgəsinin sakinləri də bu imkandan məhrum olduqları üçün ətraf dağ rayonlarına gedirlər.

Belə yaşayış məntəqələrindən biri də Daşkəsənin Xoşbulaq kəndidir. Olduqca sərin və müalicəvi əhəmiyyətli təmiz havası olan Xoşbulaqda imkanlı vəzifəli şəxslərin çoxsaylı villaları da var.

Bir neçə gün əvvəl Daşkəsənin 95 illik yubleyi çərçivəsində adıçəkilən kənddə yarmarka təşkil olunmuşdu.

Gununsesi.info-nun əməkdaşı da minlərlə insanın qatıldığı yarmakada iştirak edib. Tədbir haqqında yerli icra hakimiyyətinin press-relizini dərc etsək də diqqəti başqa bir məsələyə yönəltmək qərarına gəldik.

Rayon məkəzindən təxminən 10 km məsafədə yerləşən Xoşbulağa asfalt yol çəkilib.

Ancaq turist axınının çox olduğu bu kəndin içərisindəki yollar isə Xoşbulağın ölkə ilə bir olan məşhur adına yaraşmır.

Açığı adıçəkilən kəndə yolumuzu salanda düşünürdük ki, dillər əzbəri olan bu kənd özünün abad yolları, küçələrinin təmizliyi ilə göz oxşayır.

Ancaq düşündüklərimizin əksinin şahidi olduq.

Səfalı təbiətilə əhatə olunan kənd yolları keçilməz vəziyyətdədir. Küçələrinin hər tərəfi isə zibil poliqonunu xatırladan Xoşbulaq kəndindəki zibilliklər isti havanın təsirindən ətrafa üfunət saçır.

Təbii ki, burada yerli icra hakimiyyəti ilə yanaşı dövlətin aiddiyyatı qurumlarının da görməli olduğu işlər var.

Yol çəkilişi üçün Azərbaycan Avtomobil Yolları Dövlət Agentliyi kənd yollarına vəsait ayırmalıdır. Yuxarıda qeyd etdiyimiz kimi kənd ölkənin ən çox insan axınının etdiyi bir kənddir.

Hətta bu kənddə ölkə başçısının rəsmi iqamətgahı da var.

Təkcə bu fakt kifayyət edir ki, Azəravtoyol kəndin yollarına əncam çəksin.

Yerli icra hakimiyyətinin üzərinə düşən isə yol kənarlarını zibilliklərdən təmizlətməkdir. Küçələrdə zibil qutuları yerləşdirmək də vacibdir.

Kənd sakinləri deyir ki, Xoşbulağın adını eşidib buraya gələnlər gördüklərinə inana bilmir.

Bizim inana bilmədiyimiz kimi…