Bir neçə gün əvvəl Suraxanı rayonu Mənzil Kommunal Təsərrüfat Birliyinin rəisi Mais Məmmədovla bağlı ilginc iddiaların yer aldığı bir məlumatı təqdim etmişdik. Məlumatda deyilirdi ki, qanunsuz tapşırıqları və fəaliyyəti ilə böyük narazılıq yaradan, xüsusən də MKTB əməkdaşlarının canını boğazına yığan rəis Mais Məmmədov barəsində Prezident İlham Əliyevə və Bakı meri Eldar Əzizova şikayət getdiyi də iddia olunur.
"DİA-AZ"ın məlumatına görə, xəbərlərdən aydın olurdu ki, Tik-Tok platformasında videomüraciət yayan Cavid adlı MKTB işçisi Mais Məmmədov və onun briqada rəhbəri barəsində faktlar açıqlayıb. Qeyd edək ki, sözügedən şikayətçi 2-ci qrup əlildir, 400 manat əmək haqqı alır və vəzifəsi məişət tullantılarını yığışdırmaqdır. Ancaq Mais Məmmədovun idarəçiliyi həddini aşır və işçilərə qanunsuz əmrlər verilir. Məsələn, elə MKTB işçisi Caviddən tələb olunur ki, 7 hektar ərazisi olan Neftçilər parkının döşəməsini yuyub silsin. O isə deyir ki, nə sağlamlığı buna imkan verir, nə də vəzifəsi bu işi görməkdir. Sadəcə, məişət tullantılarını yığmaq borcu var. Çıxışında şikayətçi deyib ki, Suraxanı baxımsız vəziyyətdədir, MKTB rəisi isə qanunsuz əməlləri ilə məşğuldur.
Qeyd edək ki, ümumiyyətlə, Suraxanını xarabalığa çevirən MKTB rəisi Mais Məmmədovun fəaliyyəti kütləvi narazılıq yaradıb. Suraxanı sakinləri bildirirlər ki, Yeni Günəşli və digər ərazilər tör-töküntü, səliqəsiz, bərbad vəziyyətdədir. Mais Məmmədovu isə yalnız gəlir və biznesi maraqlandırır. Bu da Baş Prokurorluq yanında Korrupsiya ilə Mübarizə Baş İdarəsinin Suraxanı MKTB-də araşdırmalar aparmasını zəruri edir. Çünki bir MKTB rəisi postu nə qədər gəlirlidir ki, Mais Məmmədovu oliqarxa çevirib. Onun Yeni Günəşli ərazisində "Neo servis" və başqa avtomobil satışı mərkəzi, o cümlədən iaşə obyektləri, maşın kolleksiyası var. Tutduğu vəzifədən istifadə edərək rayonun ayrı-ayrı qəsəbələrində biznes obyektləri tikdirib.
Mətbuatda yayılan xəbərlərə görə, ona aid Yeni Günəşli qəsəbəsində yerləşən «Qrand» şadlıq sarayını, Şabran rayonundakı dəvə fermasını, eləcə də digər ticarət obyektlərini göstərmək olar. Adıçəkilən məmur ölkə qanunlarının əksinə iş tutur».
Maraqlıdır, Mais Məmmədov MKTB rəisi maaşı ilə bu biznesə necə sahib olub? O baxımdan hüquq-mühafizə orqanlarının yoxlamaları zəruridir. Necə ki "qara maskalı"lar icra başçılarının kabinetinə gələrək" onlara "sürpriz" edirlər, eynilə Suraxanı rayon MKTB rəisinin kabinetində də oxşar mənzərəyə zərurət yarana bilər.
Yerli sakinlər də deyirlər ki, Mais Məmmədovdan şikayətçidirlər. Hazırda rayonda səliqə-sahman yox, zibil yeşikləri tapılmır, amma abadlığa ayrılan vəsait qəhətə çıxır.
Yada salaq ki, Suraxanı MKTB-yə 74, 62, 63, 68, 103, 104 və 105 saylı MKİS-lər daxildir. Birliyin rəisi Mais Məmmədov isə ona tapşırılan işlərin öhdəsindən gələ bilmir. Birliyin tabeliyində olan mənzil-kommunal istismar sahələrinin rəisləri MKTB rəhbərinə hər ay tələb olunan səviyyədə «qulluq» edirlər. Suraxanı rayonu ərazisində heç kim Mais Məmmədovun razılığı olmadan eyvan artıra, dama su çəni qoya, yaxud mənzilinin daxilində əlavə dəyişiklik edə bilməz. «Jek» rəisləri hər gün cavabdeh olduqları ərazilərə çıxıb müşahidə aparırlar. Belə halla qarşılaşan kimi isə Mais müəllimə məlumat verirlər. Birlik rəisi özünə yaxın adamları həmin şəxslərin yanına göndərib görülən işin qarşılığında nəysə verməli olduqlarını bildirirlər. Bununla razılaşmayan şəxslərin iş görməsinə qətiyyən icazə verilmir.
Eyni zamanda, Suraxanı rayon Mənzil-Kommunal Təsərrüfatı Birliyinin nəzarətində olan ərazilərdə anti-sanitariya baş alıb gedir. Qurumun balansında kifayət qədər texnikanın olmasına baxmayaraq, rayonun bir sıra qəsəbələri zibillik içində itib-batır. «Jek»lərdə əməlli-başlı özbaşınalıq hökm sürür. Belə ki, rəislər vətəndaşlara lazım olan arayışları hansısa maraqlarının qarşılığında verirlər.
Əlavə edək ki, Mais Məmmədov artıq 30 ilə yaxındır sözügedən vəzifənin başındadır. Bəs onu keçmiş və indiki icra başçısı üçün vacib edən hansı səbəblərdir?
"DİA-AZ"a bu barədə yazan oxucular isə bildirir ki, Mais Məmmədov 1996-cı ildən vəzifə başındadır. Oxucu yazır: "Vəzifədən elə yapışıb ki, zəli kimi qopmur. 5 icra başçısı dəyişib. Bu hələ də yerində qalıb. Dağıdır rayonu... Dədəsindən varislik qalıb buna? Bu vəzifə şəxsi biznesinə çevrilib bunun.
O əlil işçiləri işlətdiyi "Neftçilər" parkına məxsus olan restoranı da dədə malı kimi mənimsəyib və parkla üzbəüz olan binaları da o tikir. Svetaforun yanında olan ərazini hasara alıb və bir hissəsində obyekt açıb: "Şah Elektroniks"..."
Hər halda bu faktlarla bağlı qarşı tərəfin hansı formada reaksiya verdiyi də məlumdur. Belə ki, sosial hesablarımızda bu məlumatların bir hissəsinin təqdimatından sonra hərəkətə keçən Mais Məmmədovun trolları saxta rəyləri ilə sanki ortadakı gerçəkliyi gizlətməyə çalışdılar. Amma fakt faktlığında qalır və çox hörmətli rayon rəhbərliyi nə qədər ki, gec deyil bu məmurla bağlı faktları ən azından özü araşdıra bilmirsə, əlaqədar qurum və şəxslərə təqdim etsin... Çünki onlarda daha çox bilgi var... hər halda...
Məsələ diqqətimizdədir...
