Azərbaycanda ən çox şikayət olunan qurumlardan biri, bəlkə də birincisi Azərbaycan Dövlət Su Ehtiyatları Agentliyidir. Keçmiş adı ilə “Azərsu” adlanır. Lakin bu qurumun əsl adı “AzərYEZİD” olmalıdır. Ona görə ki, yay, qış demədən, insanların suyunu kəsir, vətəndaşın düşdüyü çətin duruma məhəl qoymur.
Təəssüflə qeyd etməliyik ki, çoxsaylı şikayətlərə rəğmən, bu quruma “dur” deyən yoxdur. Təkcə mətbuatda deyil, agentliyin sosial platformalarına daxil olduqda da əsasən tənqidlərə rast gəlirik. İnsanlar haqsız da deyillər. Amma gəlin görün, qurumun öz-özünə yazdığı təriflər nə qədər çoxdur. Səhifəyə daxil olursan, sanki “Şakiranın profilidir”. Öz-özünə tərif deməkdən bezmirlər.
Dünən səhər, 22.01.2026-cı il tarixində saat 07:30-dan etibarən Xətai rayonu, Ceyhun Həsənov küçəsi və digər ərazilərdə su yenə kəsilib. Artıq saat artıq 14:00-dur, hələ də su verilmir. Bu acınacaqlı vəziyyətlə bağlı Agentliyin mətbuat xidmətə bizə sadəcə səbrli olmağımızı məsləhət bilir. Qaynar xətt isə dünəndən “günün sonuna kimi veriləcək” deyir. Bu gün isə bildirirlər ki, “narahat olmayın, bəzi ərazilərə su verilib, sizin ünvana da veriləcək”.
Səbrdən başqa onsuz da əlimizdən heç nə gəlmir. Çünki insanları səbrdən çıxaran bu özbaşına qurum haqqında tədbir görən yoxdur.
Agentliyin elanını olduğu kimi dərc edirik:
“Yay mövsümündə suya artan tələbatın tənzimlənməsi və su keyfiyyətinin yaxşılaşdırılması istiqamətində görüləcək işlər çərçivəsində magistral xəttin qəzalı hissələrinin dəyişdirilməsi ilə əlaqədar 22.01.2026-cı il tarixində gün ərzində Xətai rayonunun bəzi ərazilərinə suyun verilməsində müvəqqəti fasilə yaranacaq.
Anlayışla qarşıladıqlarına görə abonentlərə minnətdarlığımızı bildiririk.
‘955’ Çağrı Mərkəzi (7/24)”
İnsanları susuz qoymaq bir yana, hələ yalanlarına don geyindirməyi də bacarırlar. Əsas odur ki, cibləri dolsun, agentlik rəhbərliyinin yaşadığı evlərdə su, qaz, işıq kəsilməsin. Onlar üçün nə fərqi var, gün sonu və yaxud da bir neçə gün.
Hər kəsə bəllidir ki, icra hakimiyyətləri tərəfindən su çənləri artıq illərdir yığışdırılıb. Su kəsiləndə insanlar yalnız marketlərə qaçmaq məcburiyyətində qalırlar. Deməli, pulun yoxdursa, susuz ölməlisən.
Son zamanlar ayda 3–4 dəfə boruların partlaması, gecələr sayğacların quraşdırılması, Bakı–Qəbələ–Oğuz kəmərinin bərpası adı altında insanlara verilən zülmün başlıca məqsədi var. Bu da Azərbaycan xalqını dövlətdən narazı salmaqdır.
Necə ola bilər ki, 400 manat maaş alan fəhlə gecə sayğac yenilənməsində iştirak etsin? Necə ola bilər ki, külli miqdarda vəsaitə alınan borular cəmi iki ilin içində deşilsin və ya partlasın?!
İnsanlar susduqca bu qurumun özbaşınalığı bitməyəcək. Vətəndaşlar sosial şəbəkələr vasitəsilə Prezidentə və Birinci vitse-prezidentə müraciət edilər, amma təəssüf ki, şikayətlər ünvanına çatmır.
İnsanların problemləri kifayət qədər çoxdur. Dolanışıq yoxdur. Narkomaniya, oğurluq, içki aludəçiliyi artıb. Su kimi əsas ehtiyac qaynağının günlərlə kəsilməsi bu problemləri daha da dərinləşdirir. Söhbət 2–3 saatdan yox, günlərlə davam edən kəsintidən gedir.
Azərbaycan Dövlət Su Ehtiyatları Agentliyi (“Azərsu”), yəni əslində “AzərYEZİD”, insafınız, vicdanınız olsun, insanları susuz qoymayın! Evində xəstəsi, əlili, imkansızı olanlar var. Aydındır ki, siz bunları düşünmürsünüz. Necə deyərlər, acın halından toxun nə xəbəri?!
Suyun kəsilməsi vətəndaşlara həm maddi, həm də mənəvi zərər vurur. Hara, kimə deyək dərdimizi? Niyə bu milləti ayağa qaldırmağa çalışırlar?
“Azərsu” rəhbərliyi və ya İctimaiyyətlə əlaqələr şöbəsi, zəhmət olmasa bu suallara cavab verin: Necə olur ki, eyni ərazidə bir ay ərzində üç dəfə qəza baş verir? Qəza olan borunu necə təmir edirsiniz ki, az keçməmiş yenidən “qəza vəziyyəti” yaranır?
Səhifənizdə özünüzə yalançı təriflər yazmaqla vəziyyət dəyişmir. Bu gün olmasa da, sabah vətəndaşların səsini Prezident eşidəcək və bunun da nəticəsi olacaq.
“Hürriyyət”
