Xaçmaz rayonu,Ruslan İmamverdiyev küçəsi, ev 11-də yaşayan Balamirzə Mikayılov tərəfindən “Hürriyyət” qəzetinin redaksiyasına şikayət məktubu daxil olub. Şikayətçi qəzetimiz vasitəsilə Əmək və Əhalinin Sosial Müdafiəsi naziri Anar Əliyevə müraciət edir:
“Hörmətli Anar Əliyev!
Mən, Mikayılov Balamirzə, İkinci Qarabağ Müharibəsinin iştirakçısı, 3-cü qrup əlil Mikayılov Elvinin atasıyam. Oğlumun dizdən aşağı bir ayağı yoxdur. Sizin rəhbərlik etdiyiniz nazirlik ona 3-cu qrup əlillik təyin edib.
Övladım Mikayılov Elvin 30 dekabr 2024-cü il tarixində həqiqi hərbi xidmətdə olarkən minaya düşmüşdür. Bunun nəticəsində onun sağ ayağı dizdən aşağı amputasiya olunmuşdur. Bundan əlavə, onun bel nahiyəsində də qəlpələr var. 45 günə yaxın Dövlət Sərhəd Xidmətimin (DSX) Hərbi Hospitalında müalicə alıb.
İyul ayında övladıma 3-cü qrup əlillik təyin edilib. Bir neçə dövlət qurumuna müraciət edərək, övladıma 2-ci qrup əlillik verilməsini tələb etsəm də, heç bir qurum bu şikayətimə baxmamışdır. Bundan başqa, övladıma 4400 manat sığorta pulu təyin olunsa da, “travma pulu” verilməmişdir.
Hörmətli Nazir!
Əmək və Əhalinin Sosial Müdafiəsi Nazirliyinin qərarına hörmətlə yanaşmağa çalışsam da, ədalətsizlik açıq-aşkar görünür. Belə ki, oğlumun əmək qabiliyyəti yoxdur, amma 3-cu qrup əlillik təyin edirsiniz. Bu uşaq aldığı təqaüdlə necə iynə-dərmanını alsın? İndi bir çox xəstələrə 3-cü qrup əlillik təyin olunur. Əli, ayağı üstündə olan şəxslər də az deyil.
Keşkə imkan olaydı, əlilliyin meyarları müəyyənləşməzdən əvvəl parlamentdə olan deputatların bir neçəsinin bəzi əzalarını kəsəydilər. Kimisinin əl barmaqlarını, kimisinin dizdən aşağı ayağını, kimisinin başının yarısını kapronla yığaydılar. Həmin deputatlar parlamentə sağalıb gələndən sonra əlillik meyarlarının müəyyənləşdirilməsi üçün səsvermə olaydı. Yalnız bu halda onlar ədalətli qərar verib, qanun layihəsini parlamentdə müzakirəyə çıxarardılar. Əks təqdirdə, əli, ayağı olmayanı anlaya bilməzlər. İş qabiliyyəti olan da 3-cü qrup alsın, bir ayağı olmayan da?!
Əlbəttə, mən aqressiv ata kimi nəzərinizdə qalmaq istəmərəm. Amma, cənab nazir, siz deyin bu haqsızlıq deyilsə, bəs nədir?!”
Məsələ ilə bağlı Dövlət Tibbi-Sosial Ekspertiza və Reabilitasiya Agentliyindən “Hürriyyət”ə bildirdilər ki, Xaçmaz rayon sakini, 2006-cı il təvəllüdlü Mikayılov Elvin Balamirzə oğlu əlilliyinin qiymətləndirilməsi ilə bağlı tibb müəssisəsi tərəfindən rəsmiləşdirilən forma-88 göndərişi əsasında 10.07.2025-ci il tarixdə Dövlət Tibbi-Sosial Ekspertiza və Reabilitasiya Agentliyində əyani müayinə edilib:
“Agentliyin həkim-ekspertlərinin əyani müayinəsi zamanı vətəndaşın hazırki sağlamlıq vəziyyətinin qanunvericiliyə uyğun olaraq orqanizmin funksiyalarının 50% pozulmasına görə müddətsiz əlillik təyinatına əsas verməsi barədə qərar qəbul edilib.
Qeyd edək ki, Nazirlər Kabinetinin 13 may 2022-ci il tarixli 187 nömrəli qərarı ilə təsdiq edilmiş “Əlilliyin müəyyən olunması meyarları”na əsasən, sağ baldırın yuxarı 1/3 travmatik ampultasiyasından sonrakı güdülü” diaqnozu orqanizmin funksiyalarının 50% pozulmasına görə müddətsiz əlillik təyinatına əsas verir”.
