Onkoloji xəstələrin dövlət hesabına müayinə və müalicəsi qanunda nəzərdə tutulsa da, xəstələr və onların yaxınları bunun yalnız kağız üzərində qalmasından şikayətlənirlər.
Onlar bildirir ki, funksional diaqnostika, şüa diaqnostikası, laborator və endoskopik müayinələr xeyli vaxtdır icbari tibbi sığortaya daxil edilməsinə baxmayaraq, Milli Onkologiya Mərkəzində xəstələrdən bunun üçün külli miqdarda pul alınır.
Jurnalist Aytən Məmmədova da onkoloji xəstəlikdən əziyyət çəkən gənc qohumunun müayinəsinə görə ondan pul tələb olunmasıyla bağlı hadisəni ictimailəşdirib.
Gununsesi.info xəbər verir ki, hadisə iyulun 29-da Milli Onkologiya Mərkəzində baş verib. Aytən Məmmədova deyir ki, 25 yaşlı xalası qızı ağır formada onkoloji xəstəlikdən əziyyət çəkir. Ona invaziv duktal karsinoma diaqnozu qoyulub:
“Maddi imkanı da son dərəcə ağırdır. O qədər kasıbdılar, biopsiyanın nəticəsi məlum olanda, nəqliyyat puluna görə dərhal Bakıya gələ bilmədi. Nəticəni görəndən sonra həkim soruşur ki, niyə bu qədər gecikdirmisən, vaxtında müayinə olunmamısan? Yazıq qarın dolusu yemək tapa bilmirdi, həkimə getməyə hardan pul tapaydı?”
Jurnalist bildirib ki, Milli Onkologiya Mərkəzində bütün müayinələr zamanı xəstənin yaxınlarından xeyli məbləğdə pullar tələb olunub və alınıb:
“Biopsiyadan tutmuş, analizlər, başqa müayinələrə qədər, hamısı pul… Analizlər 250 manat, digərləri biri 120 manat istəyir, o biri 90 manat, gələn həftə sümük müayinəsinə gələcək, o da 130 manat deyib. İyulun 28-də müayinələrdən sonra özü rayona qayıtdı, KT-nin (kompüter tomoqrafiya) cavabını gözləyə bilmədi. Ertəsi gün mən getdim ki, götürüm. Tibb bacısı deyir ki, ödəniş olunmayıb, 92 manat verilməlidir. Deyirəm, qəbz verin, ödəyim. Cavab verir ki, bizdə qəbz verilmir, mənə ödəməlisiniz. Deyirəm, ay xanım, bazar deyil, siz də pomidor, kartof satmırsınız, sizə niyə verməliyəm? Cavab verir ki, bizdə belədir. Deyirəm, keçən ildən onkoloji xəstələr üçün ilkin müayinə, diaqnostika icbari tibbi sığortaya daxil edilib. O biri tərəfdən həkim mədəni şəkildə qayıtdı ki, bizə aidiyyəti yoxdur, “Semaşko”-filan kimi xəstəxanalara aiddir. Deyirəm, nə danışırsınız, necə yəni sizə aid deyil, siz özəl xəstəxanasınız?
Axırda dedim ki, nəticə əlinizin altındadır, 25 yaşlı gənc adamın vəziyyətini görürsünüz. İnsan qarın dolusu yemək tapıb yeyə bilməyib, indi də bu vəziyyətdə, siz hələ də ondan pul umursunuz, necə insanlarsınız?
Bundan sonra məni çölə çıxardılar. Beş dəqiqə sonra KT-nin nəticəsini gətirib, qəzəbli şəkildə verdilər”.
Qeyd edək ki, Onkoloji yardım haqqında qanuna görə bu xəstəlikdən əziyyət çəkənlərin dövlət hesabına tibbi yardım almaq hüququ var. Qanunun 12.1 maddəsində yazılıb:
“Onkoloji xəstələrin dövlət tibb müəssisələrində müayinəsi və müalicəsi üzrə tədbirlər dövlət büdcəsi vəsaiti hesabına maliyyələşdirilir”.
