Periodista Digita nəşri (İspaniya) sensasiyalı məlumat yayıb. Artıq bu haqda oxumusunuz. Nəşrin yazdığına görə, Ermənistan Zəngəzur dəhlizinə nəzarəti ABŞ-ın hərbi şirkətinə verməyə razılaşıb. İddiaya görə, artıq belə bir memorandum da imzalanıb.
Söhbət Azərbaycanın əsas ərazisini Naxçıvan Muxtar Respublikası ilə birləşdirəcək və Ermənistanın "Sünik" adlandırdığı Zəngəzurun ərazisindən keçəcək 42 kilometrlik yoldan - dəhlizdən gedir. İspan nəşrinin iddiasına görə, həmin dəhlizə Amerika şirkətinə məxsus 1000 nəfər xüsusi təyinatlı əsgər nəzarət edəcək.
Ermənistan hökuməti isə bu iddiaları birbaşa təkzib etməyib. Xarici işlər nazirinin müavini Mnatsakan Səfəryan deyib ki, bu məsələ yalnız Erməmistanın suverenliyi, yurisdiksiyası və ərazi bütövlüyü çərçivəsində mümkündür.
Ermənistan rəsmiləri, baş nazir Nikol Paşinyan da daxil olmaqla, bu məsələyə birmənalı cavab verməyiblər. Əvəzində Paşinyan Rusiyanın Altay vilayətinə, guya ətraf mühitin mühafizəsi üzrə beynəlxalq konfransa gedir.
Diqqət edin: Ermənistanın üzvü olduğu Avrasiya İqtisadi İttifaqının, Kollektiv Təhlükəsizlik Müqaviləsi Təşkilatının iclaslarına qatılmayan Paşinyan Rusiyanın bir əyalətində "təbiəti qorumağa" gedir.
Təbii ki, inandırıcı deyil: Paşinyan Rusiyanın yüksək vəzifəli rəsmi şəxsləri ilə gizli danışıqlara gedir. O, ABŞ-ın Zəngəzur koridorunun icarəsi ilə bağlı təklifi, bu haqda Ermənistanın mövqeyi haqda Rusiya tərəfinə məlumat (oxu: izahat) verməyə gedir.
Azərbaycanın bu məsələyə dair mövqeyi qəti və aydındır: prezident İlham Əliyev lll Şuşa Qlobal Media Forumunda Reuters agentliyinin müxbirinin Amerika şirkətinin Zəngəzur dəhlizini icarəyə götürməsi ilə bağlı sualına cavabınds deyib ki, bu sual Ermənistan rəhbərliyinə ünvanlanmalıdır: "Bizim ərazidə heç bir operator, heç bir ticarətçi, heç bir icarədar ola bilməz. Ermənistan nə etmək istəyir? Onlar çox şey edə bilərlər, mənim bundan xəbərim yoxdur".
Yəni prezident bəyan etdi ki, Zəngəzur dəhlizinin icarəyə verilib-verilməməsi Ermənistana aid məsələdir, Zəngəzurun Azərbaycanda olan hissəsi - Şərqi Zəngəzur icarə predmeti deyil, ola da bilməz.
Bu arada Ermənistan mediası Kanada Kəşfiyyat və Təhlükəsizlik Xidmətinin təhlilinə istinadla məlumat verir ki, Zəngəzur dəhlizi haqda danışıqlar 12-18 ay uzana bilər. Yenə də Ermənistan mediasında Forbes-ə istinadla yazılıb ki, Ermənistan öz ərazisini icarəyə verməyin qəti əleyhinədir. Bununla belə xaricdəki bəzi erməni diaspor təşkilatları, Ermənistan müxalifəti Nikol Paşinyanın ölkə ərazisini ABŞ-a və Türkiyəyə satmağa hazırlaşdığını iddia edirlər.
Görünür ki, bu iddiaları müxalifət parlament seçkilərində Nikol Paşinyana qarşı aktiv istifadə etmək niyyətindədir.
