Televiziya aparıcısı Vladimir Solovyov Rusiyanın dövlət televiziya kanalı “Rossiya 1”də yayımlanan müəllif proqramında özünəməxsus qərəz və isterik davranışla Azərbaycana qarşı növbəti dəfə hörmətsizlik nümayiş etdirib. Bu barədə Medianın İnkişafı Agentliyindən (MEDİA) məlumat verilib. 

Bildirilib ki, Ermənistanda hüquq-mühafizə orqanları tərəfindən saxlanılan yaxın dostu, erməniəsilli rusiyalı iş adamı Samvel Karapetyanın müdafiəsinə qalxan aparıcı bir neçə dəfə “Artsax” ifadəsini işlədib, Ermənistan hakimiyyətini “Artsaxı hədiyyə etməkdə” günahlandırıb. Canlı yayımda birbaşa erməni xalqına müraciət edərək onu da gələcəkdə “Artsaxın taleyi gözlədiyini” deyib. Qeyd olunub ki, real tarixi faktları təhrif edən, yaxın keçmişdə baş vermiş proseslərə qərəzlə yanaşan Vladimir Solovyov hər zaman Azərbaycana kin və nifrət bəsləyib, bu münasibət onun çıxışlarında açıq şəkildə özünü büruzə verib: "Solovyovun Ermənistan-Azərbaycan münaqişəsi, 44 günlük Vətən müharibəsi, Azərbaycanın ərazi bütövlüyünü və suverenliyini tam bərpa etməsi ilə bağlı müxtəlif vaxtlarda etdiyi çıxışlar həmişə qeyri-obyektiv olub, ziddiyyətli mahiyyət daşıyıb və Azərbaycanda adekvat reaksiyalara səbəb olub. Rusiyanın dövlət televiziya kanalının efirində belə destruktiv iddiaların yer alması narahatlıq doğurur, xalqımıza qarşı qəbuledilməz hesab edilir, ölkələrimiz arasında dostluq münasibətlərinin ruhuna və məsələ ilə əlaqədar Rusiyanın rəsmi mövqeyinə tamamilə ziddir. Jurnalist etikası və əxlaqi dəyərlərlə bir araya sığmayan bu nifrət nitqini yolverilməz hesab edir, qəti şəkildə pisləyir və qarşı tərəfin üzrxahlıq etməsini gözləyirik". 

Siyasi şərhçi Azər Niftiyev "Sherg.az"ə açıqlamasında deyib ki, Rusiyanın rəsmi dövlət televiziyası - “Rossiya 1” kanalında teleaparıcı Vladimir Solovyov özünü jurnalist olaraq yox, bir təxribatçı kimi aparır. Ekspert bildirib ki, Solovyov illərdir bu şakərindən qurtula bilmir:

 "Ermənistanda saxlanılan dostunu - Karapetyanı müdafiə bəhanəsi ilə ölkəmizə qarşı hədyanlar səsləndirir. Qondarma “Artsax” ifadəsini təkrar edərək, Azərbaycanın ərazi bütövlüyü əleyhinə fikirlər tirajlayır. Bu isə beynəlxalq hüquq, eləcə də Azərbaycan-Rusiya münasibətlərinə birbaşa hörmətsizlikdir. Bu həmin Solovyovdur ki, 44 günlük müharibə dövründə də manipulyativ bəyanatlar tirajlayıb ölkəmizin haqlı mövqeyini şübhə altına almaq niyyəti güdürdü. Ancaq "İt hürər, karvan keçər" misalında olduğu kimi, Solovyov kimilər dərin məyusluğa qərq oldular. Ermənistan cəmiyyətinə yenidən müraciət edən və “Artsax"ın taleyi sizi də gözləyir” söyləyən bu "pultla idarə edilən jurnalist" öz tədbirincə "suyu bulandırmağa" çalışır. Kreml, dövlət televiziyası vasitəsilə yayımlanan təxribatçı çağırışlara son qoymalıdır. Şübhəsiz ki, Azərbaycan cəmiyyəti bu şəkildəki davranışlara qarşı etinasız qala bilməz. Ölkənin ərazi bütövlüyü müzakirə mövzusu deyil və ola da bilməz. Bu, təkcə Azərbaycana yox, həm də regionda sülhə qarşı bir təhdiddir. Zaman göstərir ki, tarixi təhrif edənlər unudulur, həqiqətlər isə gec-tez öz yerini tutur".