Azərbaycanda icra hakimiyyətləri ilə bağlı islahatlar davam edir.

Bakı şəhərinin Xəzər, Qaradağ, Sabunçu, Suraxanı, Pirallahı, Binəqədi, Səbail, Nəsimi, Nərimanov, Nizami, Xətai və Yasamal rayonlarının icra hakimiyyəti başçıları aparatlarının nümunəvi strukturunda yenilənmə işləri aparılır. Yəni adıçəkilən icra hakimiyyətlərinin bir sıra şöbələri ləğv olunaraq sektorlarla əvəzlənib və ya birləşdirilib.

Həmçinin, icra hakimiyyəti başçısının şəhər və ya sahə inzibati ərazi dairəsi üzrə nümayəndəliklərinin nümunəvi strukturunda da dəyişikliklər edilib. İxtisar olunan əməkdaşların isə Dövlət İmtahan Mərkəzi (DİM) vasitəsilə müvafiq dövlət qurumlarında işlə təmin ediləcəyi qeyd olunur. Beləliklə, idarəetmə modelinin optimallaşdırılması prosesinə artıq start verildiyini söyləmək olar.

Azad Vətən Partiyasının (AzVP) sədri Akif Nağı “Cebheinfo.az”-a açıqlamasında bildirib ki, ölkədə idarəetmə sahəsində uğurlu islahatlar aparılır:

“Bu islahatların içərisində xüsusi diqqət yetirilməli olan vacib məsələlər var. Müəyyən məsələlərdə təkmilləşmə və dəyişikliklərin olması ilə bağlı sosial sifariş də var. Xüsusən də idarəetmədə, yerli icra hakimiyyətlərinin strukturlarında müəyyən dəyişikliklərə ehtiyac yaranıb. Hesab edirəm ki, bu addım çox mühümdür. Bəzi şöbələrin ləğv edilməsi icra hakimiyyətlərindəki işlərin yüngülləşməsinə və səmərəsinin artırılmasına xidmət edə bilər”.

Siyasətçi diqqətə çatdırıb ki, kadrların dövlət digər strukturlarında işlə təmin olunması onların vəzifələrinə daha məsuliyyətlə yanaşmasına səbəb olacaq:

“Onlar icra hakimiyyətlərində əldə etdikləri təcrübəni yeni iş yerində də tətbiq edəcəklər. Həm sözügedən kadrlardan digər dövlət strukturlarında istifadə, həm də dəyişiklik müsbət tendensiyadır. Yəni bütün bu addımlar idarəetmə sisteminin optimallaşdırılmasına yönəlib”.